Bɔa 36

1Bezalɛli ń Ɔɔliabuo ń gɔ̃ide pɔ Dii ń gbá gɔ̃i ń ɔ̃nɔo aaɔ zĩpi kɛa dɔ̃ɔ pii, aai luakukĩi dɔ ń a pɔɔ pii lá Dii dìlɛwa.

2Ɔ̃ Mɔizi Bezalɛli ń Ɔɔliabuo sìsi ń gɔ̃ide pɔ Dii gɔ̃inakɛa pɔwa dɔ̃a kpàmá mɛ́ an nɔ̀sɛ ye zĩpi kɛaiɔ, aa mɔ ɔkpa zĩpiwa. 3Aa gba pɔ Isailiɔ mɔ̀ò Mɔiziɛ wà luakukĩi kɛò sɛ̀lɛ. Lagulɛdɔ Isailiɔ ìɔ mɔɛ̀ ń gbapiɔɛ. 4Ɔ̃ gɔ̃ide pɔ aalɛ luakukĩi zĩkɛpiɔ, an baade gò a zĩa, aa gɛ̀ aa ò Mɔiziɛ: 5Pɔ pɔ gbɛ̃́ɔ lɛ́ mɔ́ò zɔ̃ɔ dɛ lá Dii dìlɛ wà zĩkɛòa. 6Ɔ̃ Mɔizi mɛ̀ wà kpawakɛ bòou wà mɛ: Gɔ̃ɛ, nɔɛ, gbɛ̃e su mɔ́ ń luakukĩi gbapio lɔo. Ɔ̃ wà zɛ̀ màa, 7asa pɔ pɔ wà mɔ̀ò wà kpɛ́pi zĩkɛò fɛ̃̀ɛ.

Zwãakpɛdɔa

(Bɔa 26.1-37)

8Gɔ̃ide pɔ ku zĩkɛnaɔ guuɔ mɛ́ zwãakpɛpi kɛ̀ ń pɔlɛ lɛ kwi pɔ aa tã̀ ń bataɛao, aa kelubi gɔ̃inakɛ̀wà ń babuunao ń bagaaluladeo ń wɔ̃ɔtɛ̃nao. 9Pɔlɛpiɔ gbã̀a gãsĩsuu baakwi plaplasaiɛ, a yaasa sɔ̃, gãsĩsuu siiɔ̃siiɔ̃. Pɔlɛpiɔ zɔ̃ɔ sáa màa piiɛ. 10Aa pɔlɛpiɔ nàminami lɛ sɔsɔoɛ, 11ɔ̃ aa babuuna lɛtãn kpà wa dɔ̀dɔ zwãapiɔ lɛ́ɔwa 12mɛn blakwikwi, bapiɔ bɔaaa ń kɔ̃o piiɛ. 13Aa mɔkoolonaɔ pì ń vuao mɛn blakwi, ɔ̃ aa bapiɔ kàkau aa zwãakpɛ zwãapi dàòkɔ̃i.

14Aa blekã pɔlɛ tã̀ lɛ kuɛdo, kɛ́ wali ku zwãakpɛpia. 15Pɔlɛpiɔ lɛ do gbã̀a gãsĩsuu baakwiɛ, a yaasa sɔ̃, gãsĩsuu siiɔ̃. Pɔlɛ lɛ kuɛdopiɔ zɔ̃ɔ sáa màa piiɛ. 16Aa a lɛ sɔoɔ dàdakɔ̃i, ɔ̃ aa a lɛ sooloɔ dàdakɔ̃i lɔ. 17Aa balɛtãn kpà, aa dɔ̀dɔ zwãapiɔ lɛ́ɔwa mɛn blakwikwi, 18ɔ̃ aa mɔkoolonaɔ pì ń mɔgotɛ̃o mɛn blakwi, kɛ́ wà e bapiɔ kakau, wi kpɛ́ zwãapi daòkɔ̃i. 19Aa sãsa báa pɔ wa kɛ̀kɛ tɛ̃ɛɛɔ dàdakɔ̃i, kɛ́ wali ku zwãakpɛpia, ɔ̃ aa ayo báaɔ dàdakɔ̃i, kɛ́ wali kua lɔ.

20Aa lɛpusia lí ã̀ pɛpɛɛpɛpɛɛ zwãakpɛpi lipɛlɛɔ ũ. 21Lípiɔ gbã̀a gãsĩsuu kwikwiɛ, a yaasa sɔ̃, gãsĩsuu dodo ń kĩnio. 22Aa lipɛpɛɛpiɔ swãbɔ̀bɔ aa kpàaĩ mɛn plapla. Màa aa zwãakpɛ lípiɔ kɛ̀ pii. 23Aa lipɛpɛɛɔ kɛ̀ màa mɛn bao zwãakpɛpi gɛɔmidɔkĩi oi pɔ ũ, 24ɔ̃ aa a zɛbɔɔ pì ń ãnusuo mɛn bla, kɛ́ wali lí mɛn baopiɔ swã pɛpɛu, lí mɛndo iɔ zɛbɔ vĩ mɛn pla a swãɔ gɛ̃kĩi ũ. 25Aa lipɛpɛɛɔ kɛ̀ màa zwãakpɛ gugbãntoo oi pɔ ũ, 26ɔ̃ aa ń zɛbɔɔ pì ń ãnusuo mɛn bla, kɛ́ wali dilɛ mɛn pla wà lí mɛndo swã pɛpɛu. 27Aa lipɛpɛɛ kɛ̀ màa mɛn soolo zwãakpɛ bɛ'aɛ oi pɔ ũ, 28ɔ̃ aa lipɛpɛɛ kɛ̀ mɛn pla zwãakpɛ bɛ'aɛ oi golaɔ pɔ ũ. 29Aa a gola lí mɛn plapiɔ pàa aa nàkɔ̃wa za zĩlɛ e musu. Zã mɛndodo ɔ̃ aa vĩ. 30Zwãakpɛpi kpɛ́ lipɛpɛɛɔ mɛn swaaɔ̃ɛ ń ãnusu zɛbɔɔ mɛn gɛ̃o ń mɛndoo, lípiɔ pii ń a zɛbɔɔ màa mɛn plapla.

31Aa lɛpusia lí ã̀ pɔ̃ɔpɔ̃ɔ mɛn sɔo zwãakpɛ kpɛ do lipɛpɛɛɔ yebɔ ũ, 32ɔ̃ aa ã̀ mɛn sɔo a kpɛ do lipɛpɛɛɔ yebɔ ũ lɔ. Aa lipɔ̃ɔɔ pãleɔ ã̀ lɔ mɛn sɔo zwãakpɛpi bɛ'aɛ oi lipɛpɛɛɔ yebɔ ũ. 33Aa lipɔ̃ɔɔ pɔ aɔ ku guo aɔ pãa lipɛpɛɛɔla bɔa a lɛla e a lɛle kɛ̀. 34Aa vua kùlɛ lipɛpɛɛpiɔwa, ɔ̃ aa zã pì ń vuao lipɔ̃ɔɔpiɔ sɔlɔkĩi ũ. Aa vua kùlɛ lipɔ̃ɔɔpiɔwa lɔ.

35Aa zwãa kɛ̀ ń pɔlɛ pɔ wa tã̀ ń bataɛao, aa kelubiɔ gɔ̃inakɛ̀wà ń babuunao ń bagaaluladeo ń wɔ̃ɔtɛ̃nao. 36Aa lɛpusia lí ã̀ mɛn siiɔ̃ zwãapi lipɛlɛɔ ũ, ɔ̃ aa vua kùlɛwà pii. Aa lipɛlɛpiɔ mɔkoolona pì ń vuao, ɔ̃ aa a zɛbɔɔ pì ń ãnusuo mɛn siiɔ̃. 37Aa zwãa kɛ̀ kpɛ́pi lɛ́ pɔ ũ ń pɔlɛ pɔ wa tã̀ ń bataɛao, aa gɔ̃inakɛ̀wà ń babuunao ń bagaaluladeo ń wɔ̃ɔtɛ̃nao. 38Aa lɛpusia lí ã̀ mɛn sɔo a lipɛlɛɔ ũ, ɔ̃ aa a kũbɔɔ pì. Aa fùa kù lípiɔwa ń vuao, aa a mɔpɔ̃ɔɔ kpà ń vuao, ɔ̃ aa a zɛbɔɔ pì ń mɔgotɛ̃o mɛn sɔo.

Currently Selected:

Bɔa 36: Boo2024

Highlight

Copy