Bɔa 20

Yãdilɛa mɛn kwiɔ

(Iko 5.1-33)

1Lua yãɛ bee ò pii à mɛ̀: 2Mamɛ má Dii á Lua ũ, ma á bɔlɛ zɔbleu Egipi.

3Ásu àɔ diie vĩo, ma baasio.

4-5Ásuli pɔe taa kɛ à kulɛ à zɔbleɛ̀o, pɔ pɔ ku musu ge tɔɔlɛ ge í guun nò, asa ma Dii á Lua, mili sí sàao. Mi mae pɔ yemazioɔ yãvãi wi an buiɔnɛ ń musu e à gɛ pɛ ń sĩwɛnaɔ ń ń sɔ̃kpaɛɔwaɛ. 6Gbɛ̃́ pɔ yemazi aa ma yãdilɛaɔ kũaɔ sɔ̃, miɔ gbɛ̃kɛ vĩńnɔɛ e an bui lɛ́wa.#Nao 14.18

7Ma Dii á Lua ásuli ma tɔ́ sí pão, asa gbɛ̃́ pɔ ma tɔ́ sì pã, má tó aà bɔ pão.

8Àli kãmabogɔɔ dɔ̃ ma pɔ ũ. 9Àli á buazĩ ń á zĩ piio kɛ gɔɔ soolo, 10a soplade iɔ dɛɛ́ kãmabozĩ ũ, asa ma Dii á Lua ma pɔɛ. Ásuli zĩe kɛ gɔɔpi zĩ́o, apiɔ ge á nɛgɔ̃ɛ ge á nɛnɔɛ ge á zĩkɛna gɔ̃ɛ ge nɔɛ ge á pɔtuo ge nibɔ pɔ ku á bɛ. 11Asa gɔɔ soolo ɔ̃ ma musu ń dũniao kɛ̀ ń isiao ń pɔ pɔ ku ń guuɔ pii, ɔ̃ ma kãmabò a gɔɔ sopladepizĩ. Ayãmɛto ma baaadà kãmabogɔɔpiu, má dìlɛ ma pɔ ũ.#Daa 2.1-3

12Àli á de ń á dao kpɛla, kɛ́ à e à gɛ̃gɛ̃ busu pɔ ma Dii á Lua malɛ kpawáu.#Mat 15.4; Ɛfɛ 6.2-3

13Ásuli gbɛ̃́ dɛo.#Daa 9.6

14Ásuli wulɛ ń gbɛ̃pãle nɔoo.#Mat 5.27

15Ásuli kpãi'oo.#Lom 13.9

16Ásuli yãdɔ á gbɛ̃deewao.#Mat 19.18-19

17Ásuli á gbɛ̃dee ua bĩikɛo. Ásuli aà nɔ bĩikɛo ge aà zĩkɛna gɔ̃ɛ ge nɔɛ ge aà zu ge aà zaa'ĩna ge pɔ pɔ a vĩɔ pii.#Lom 7.7, 13.9

18Gbɛ̃pii loupũnaa mà ń kuu'ɔo, aa loupilɛa è ń suɛlɛo dɔ gbɛ musu, ɔ̃ vĩa ń kṹ, aalɛ lualua, aa zɛ kãaa. 19Aa ò Mɔiziɛ: Yã'owɛ̃ɛ nzĩa, wí ma. Nsu to Lua yã'owɛ̃ɛo, kɛ́ wásu gagao yãi.#Hɛb 12.18-19 20Mɔizi ònɛ́: Ásu to vĩa á kṹo, asa á laai gwaa yãi ɔ̃ Lua mɔ̀i, kɛ́ à e àɔ a vĩa vĩ, mɛ́ kɛ́ ásu duunakɛo yãi. 21Aa zɛ kãaa, ɔ̃ Mɔizi sɔ̃̀ tɛlui, gu pɔ Lua kuu.

Dii gbagbakĩi yã

22Ɔ̃ Dii ò Mɔiziɛ: Yãɛ bee o Isailiɔnɛ: Ázĩawa á mà lá ma yã'òɛ́ za musu. 23Ásuli tãa kɛ à naao. Ásuli ãnusu ge vua pi tãa ũo. 24Àli ma gbagbakĩi bo ń bɛlɛo, í sa'owà ń sãɔ ń zuɔ, sa pɔ wì a pɔ katɛu à tɛkũ ń saaukpasao. Gu pɔ má dìlɛɛ́ àɔ ma sisiu, má mɔ́ á kĩi, mí baaadaágu. 25Tó álɛ ma gbagbakĩipi bo ń gbɛo, ásuli bo ń gbɛ'ãaoo, asa tó a gãpɛ̀lɛwà, à sãakɛ̀n we.#Yoz 8.31 26Ásuli ma gbagbakĩi bo à a dɛdɛkĩi kɛo, kɛ́ á puizi su bɔwào yãi.

Currently Selected:

Bɔa 20: Boo2024

Highlight

Copy