Zĩn 23

Yuda gbãadeɔ yãkpalɛkɛa ń Pɔluo

1Pɔlu wɛpɛ̀ gbãadeɔwa à mɛ̀: Ma gbɛ̃́ɔ, yãe lɛ́ ma sɔ̃ vĩ Lua aɛo e ń a gbão. 2Ɔ̃ sa'onkia Anania ò a dɔaiɔnɛ aa aà lɛ a lɛ́wa. 3Ɔ̃ Pɔlu òɛ̀: Lua a n lɛ sɔ̃, gbɛ̃nazĩn figi bɛ.#Mat 23.27-28 Ń zɔ̃lɛ nlɛ yãkpalɛkɛmanɔ ikoyã musu, mɛ́ mpi sɔ̃, n bɔ a kpɛ, ń ò wà ma lɛ́. 4Ɔ̃ dɔaipiɔ mɛ̀: Mmɛ nlɛ Lua gbagbankia sɔ̃sɔ̃ màaa? 5Pɔlu mɛ̀: Gbɛ̃́ɔ, mi dɔ̃ sa'onkia no, asa a kɛ̃a wà mɛ̀, wásuli wá busu gbãade tɔbɛ̃ɛsio.#Bɔa 22.27

6Pɔlu dɔ̃ kɛ́ gbãadepiɔ gbɛ̃eɔá Saduseɔnɛ, an gbɛ̃eɔ sɔ̃ Falisiɔnɛ, ɔ̃ a ònɛ́ gbãugbãu: Ma gbɛ̃́ɔ, Falisin ma ũ, Falisiɔ nɛn ma ũ. Gɛɔ vua yã pɔ ma wɛ́ dɔi yãi ɔ̃ álɛ yãkpalɛkɛimanɔ. 7Kɛ́ à yãpi ò, Falisiɔ ń Saduseɔ fɛ̀lɛkɔ̃wa ń lɛkpaao, ɔ̃ kãaakɛnaɔ kɛ̃̀aa lɛɛ pla. 8Saduseɔ ì mɛ gɛɔ lí vuo,#Luk 20.27 mɛ́ malaikaɔ ń nisĩnaɔ kuo. Falisiɔ sɔ̃ aa zɛ̀ ń beeɔ kuao. 9Wii gbãa dà gua, ɔ̃ Falisi pɔ aaì Mɔizi ikoyã danɛ́eɔ fɛ̀lɛ ń lɛkpaa gbãao aa mɛ̀: Wi yãvãie e gbɛ̃́ɛ beewao. Tó nisĩna ge malaika mɛ́ yã'òɛ̀ sɔ̃ bɛ? 10Kɛ́ lɛkpaa gbãakũ̀, sosaɔ gbɛ̃zɔ̃ɔ lɛ́ vĩakɛ, kɛ́ wasu Pɔlu taitaikɔ̃ɛo, ɔ̃ a ò a sosaɔnɛ aa pila gɛ̃ ń guu, aa aà kũ aa gɛ́aanɔ ń bɛ.

11A gwã Dii bɔ̀ à mɔ̀ Pɔluwa à mɛ̀: Sɔ̃dilɛ! Lá n ma yã'ò Yelusalɛũ la, sema ǹ o Loma lɔ.

Lɛkpaaĩa Pɔluzi

12Kɛ́ a gu dɔ̀ Yudaeɔ kã̀aa asii guu, aa lɛgbɛ̃̀ aa mɛ̀ wa pɔbleo, wa imio e gɔɔ pɔ wà Pɔlu dɛ̀. 13Lɛkpaaĩnapiɔ dɛ gbɛ̃ɔn blala. 14Aa gɛ̀ sa'onkiaɔ ń gbɛ̃zɔ̃ɔɔ kĩi, aa ònɛ́: Wá sì ń Luao wa mɛ̀, tó wi Pɔlu dɛo, tó wa pɔblè, Lua laaikɛwá. 15Apiɔ ń gbãadeɔ pii à gɛ à o sosaɔ gbɛ̃zɔ̃ɔɛ aà mɔɛ́ ń Pɔluo lá á ye à aà yãɔ taasika dɛ a káauawa. Wapiɔ sɔ̃ wá sɔukɛ wà aà dɛ zɛ́u e àɔ gɛ́ kái la.

16Pɔlu dãe nɛgɔ̃ɛ ń baikpaapi mà, ɔ̃ à gɛ̀ gɛ̃̀ sosaɔ bɛ, a ò Pɔluɛ. 17Ɔ̃ Pɔlu sosa badee sìsi a òɛ̀: Gɛ́ ń ɛwaasoɛo á gbɛ̃zɔ̃ɔ kĩi, asa a ye baoe kpaɛ̀. 18Ɔ̃ à aà sɛ̀ gɛ̀aanɔ ń gbɛ̃zɔ̃ɔ kĩi à mɛ̀: Pɔlu dakpɛuna ma sisì, à mɛ̀ mà mɔ n kĩi ń ɛwaasoɛo. A yãe vĩ a ye onɛ. 19Ɔ̃ gbɛ̃zɔ̃ɔpi ɛwaasopi kũ̀ a ɔwa à gɛ̀aanɔ gusaɛ mpla, ɔ̃ à aà là à mɛ̀: Bɔ́ yã ń vĩ ǹ omɛɛi? 20Ɔ̃ à mɛ̀: Yudaɔ mɛ́ lɛkpàaĩ, aa ye wabikɛma ǹ mɔ ń Pɔluo ń gbãadeɔnɛ zia, lá aa ye wà aà yã gwa dɛ a káaulawa. 21Nsu we an yãio, asa an gbɛ̃́ɔ lɛ́ aà dãdã zɛ́u, an dasi dɛ gbɛ̃ɔn blala. Aa lɛgbɛ̃̀ aa mɛ̀ wa pɔbleo, wa imio e gɔɔ pɔ wà aà dɛ̀. An sɔu mà kɔ̀, n yã an swã dɔi. 22Gbɛ̃zɔ̃ɔpi ò ɛwaasopiɛ: Nsu to gbɛ̃e dɔ̃ ń òmɛɛo. Ɔ̃ à aà gbàɛ.

Pɔlu gbaɛa Sezale

23Ɔ̃ à sosa bade gbɛ̃ɔn plaɔ sìsi, a ònɛ́: À o sosa fɛ̃ndade gbɛ̃ɔn ɔaa doɔnɛ aa sɔukɛ aa gɛ́ Sezale oosi ublegɔɔ ń sɔ̃deɔ gbɛ̃ɔn baaɔ̃kwi ń sɔ̃ndeɔ gbɛ̃ɔn ɔaa do. 24À sɔ̃́ yã kɛkɛ Pɔluɛ aà dikpɛ à gɛ́ò busu gbɛ̃zɔ̃ɔ Felisi kĩi yãkelesai. 25Ɔ̃ à lakɛ̃̀ɛ̀ à mɛ̀: 26Busu gbɛ̃zɔ̃ɔ Felisi, ma Kolodi Lisia, mamɛ ma láɛ bee kɛ̃̀nɛ, ma fɔkpàma. 27Yudaɔ mɛ́ gbɛ̃́ɛ bee kũ̀, aa ye wà aà dɛ. Kɛ́ ma aà dɔ̃̀ Loma gbɛ̃́ ũ, ɔ̃ ma gɛ ń sosaɔ ma aà sìmá. 28Kɛ́ má ye mà aà yã pɔ aa mɔ̀òa ma, ma aà sɛ̀ ma gɛò an yãkpalɛkɛnaɔ kĩi. 29We má dɔ̃̀u kɛ́ aà yã pɔ aa mɔ̀òa dɛ an ikoyã ũɛ, i yã pɔ kà wà aà dɛ ge wà aà da kpɛ́u kɛo. 30Kɛ́ wà lɛkpàaĩaazi, wà a feenakɛ̀mɛɛ, ɔ̃ ma aà gbàɛòma wegɔ̃ɔ, má ò yãdeɔnɛ aa gɛ́ ń aà yão n kĩi we.

31Ɔ̃ sosaɔ kɛ̀ lá wa ònɛ́wa, aa Pɔlu sɛ̀ gɛ̀ò Antipati gwãasĩna. 32Kɛ́ gu dɔ̀, sosa pɔ bɛ kɛsɛɔ Pɔlu nà sɔ̃deɔnɛ ń ɔzĩ aa gɛ́aanɔ aɛ, ɔ̃ aa ɛ̀a tà ń bɛ. 33Kɛ́ sɔ̃deɔ kà Sezale, aa lápi kpà busu gbɛ̃zɔ̃ɔpiwa, ɔ̃ aa Pɔlu nàɛ̀ a ɔzĩ. 34Busu gbɛ̃zɔ̃ɔpi lápi kyokɛ̀, ɔ̃ à Pɔlu là busu pɔ à bɔ̀u. A mà Silisi busu à bɔ̀u, 35ɔ̃ a òɛ̀: Tó gbɛ̃́ pɔ yã vĩnnɔɔ mɔ̀, má ma lá aa o. Ɔ̃ à mɛ̀ wàɔ aà dɔ̃́a ua. Helodi mɛ́ uapi kpà yãa.

Currently Selected:

Zĩn 23: Boo2024

Highlight

Copy