Sefania 1
1
1Uwumbɔr aah nan di waabɔr ti tuk Sefania, buyoonn Amonn aajapɔɔn Josia nan ye Juda aabɔr na sɔ. Sefania nan ye Kusi aajapɔɔn la. Le Kusi mu aate nan ye Gedalia, u mu aate nan ye Amaria na, le Amaria mu aate nan ye ubɔr Hesekia.
Uwumbɔr aabɔjil aawiin daal
2Uwumbɔr bui ke, “M ga kuln tiwan mɔmɔk kitiŋ kee pu, 3m ga kuln binib, ni tiwakor, ni inyoon, ni ijan mɔmɔk. M ga cha bibiindam lir baatun mɔmɔk ni. M ga kuln unibɔn, ubaa aan ŋmar. Min Uwumbɔr le len kina.
4“M ga daa Jerusalem aatiŋ, ni Juda aapepel aanib mɔmɔk aatafal. M ga kuln kookoo aanib bi gur ki dooni liwaal li bi yin li ke Baal na, ki kuln baawaadam bi toor li na. 5M ga kuln unii umɔk joi ŋidichal aapaacham#1.5: Bi yaa maa kidiik kan, baa di timoor pinn ki, kaa maa lidikokoln. Bi nan di idɔ paan puln tidir paab, le ki di titan pɔr biin. Bi nan maa ŋibimbin le ki taa joi kidiik aapaacham. ki ti dooni nwiin, ni uŋmal, ni iŋmabi na. M ga kuln binib bi mɔmɔk dooni mi ki bui ke bi ga kii maamɔb, ki tee puur liwaal li bi yin li ke Milkom na. 6M ga kuln binib bi mɔmɔk fenn bipuwɔb tii mi, kaa ki dii mi na, bima le aa ki choo m chee ke m nan li mɔk bi nsan na.”
7Uwumbɔr aawiin peen ni a, nwiin mundaal Uwumbɔr ga ji binib tibɔr na peen ni a, kina pu na, li ŋmin suuna man. Uwumbɔr gor ke u kɔr waanib ke kitork aawakor na la, le ki yin baadim ke bi nan yoor baawan. 8Uwumbɔr bui ke, “Linikul ngbaan daal kan, m ga daa bininkpiib, ni mbɔrbim, ni bi mɔmɔk kaa dii maasan na aatafal. 9M ga daa binib bi mɔmɔk aa taar mbisamɔb#1.9: “bi mɔmɔk aa taar mbisamɔb”—binib bi dii ŋiwaa na aa nan gee ke bi taar mbisamɔb koo baadir ni. Lik 1 Samuel 5.5. na aatafal. Bi su kinaayuk mu, ki ku binib, ki joo baawan ti bilni baawaadir ni na.”
10Uwumbɔr ki bui ke, “Liyaadaal ngbaan kan, ni ga ŋun iwiil pu Ujan Aabisamɔb chee, Jerusalem aatiŋ ni. Ni ga ŋun ikpowiil pu baah laa maa tidipɔnn kitiŋ ngbaan ponn ni nin chee na, ki ŋun ŋidichal aah lir pu na aafuuk ŋigongon paab. 11Nimi bi bi kitiŋ ngbaan aanyaŋ ni wɔb na, ni li wii ikpowiil, ba pu? binib bi mɔmɔk chuun daa ki tiir na ga kpo.
12“N‑yoonn ngbaan le m ga yoor karyaa ki biln Jerusalem aatiŋ ponn ni. M ga daa binib bi lik bibaa ke bi ye bininyuum ki lik pak bibaa na aatafal. Bi len ke, ‘Uwumbɔr aa ŋani nibaa ni ŋan, kaa ŋani ni kaa ŋan na mu.’ 13Bidim ga yoor baawangol buen, le baadichal ber. Baan koo ŋidichal ŋi bi bi maa na ponn ni, kaan nyu baah bi ŋumni ndaan aasubil aasui i na aadaan kpala.”
14Uwumbɔr aawinkpaan ngbaan peen ni, mu peen ni ki choo mala mala. Mu ga li ye mpombiin daal la, hali bijab bi kaar na ga wii itaakpayɔl pu. 15Mu ga li ye liŋuusakpeln daal la, mu ga li ye libiil ni liwonyɔl daal la, mu ga li ye libiil ni likuln daal la, mu ga li bɔɔn ki kpa ntaalangbam pam, 16mu ga li ye nwiin mundaal bijab ga pii butɔb aakpiin, ki faa butɔb aakuun, ki tak ntim mu bi maa tidifɔfɔŋ ni ŋigon kiir mu na la.
17Uwumbɔr ki bui ke, “M ga cha tibɔbir ngbaan aaboln dan unibɔn pu aan unii mɔmɔk li chuun baani ke ujoon na. Bi tun mi taani, le m ga cha baasin puu ke nnyun na, le baanikpol ga li dɔ kitiŋ ki ti bur.”
18Nwiin mundaal Uwumbɔr ga mɔk waaŋuul na kan, hali baakunabr ni salmaa aan ŋmaa gaa bi lii. Waaŋuul li wu ke mmii na le ga kuln kitiŋ kee mɔmɔk. U ga kuln unii umɔk bi kitiŋ kee pu na aamɔfal mala.
Currently Selected:
Sefania 1: xonB
Highlight
Copy
Compare
Share
Want to have your highlights saved across all your devices? Sign up or sign in
©1998, 2014 Wycliffe Bible Translators, Inc. All rights reserved.
