Hosea 6

Binib aah ŋmann ke bi yii titunwanbir pu na

1Binib ngbaan len ke, “Cha ti gir Uwumbɔr chee man. U tii timi titotonn, le ki ga sil tii timi laafee; u tii timi ibuun, le ki ga sil ban litaln poo biin i pu, u ga sil ŋa kina. 2U ga ki gaa timi iwiin ilee aakaasisik ni, le ti ga li bi unimbiin ni. 3Cha ti pɔɔn tibaa man ki li nyi Uwumbɔr, ki nyi waah ban pu na. U ga sil dan ti chee ke kitaak aah ga woln pu na, u ga dan ti chee ke unaalantaal u sɔŋni kitiŋ na.”

4Le Uwumbɔr bui ke, “Israel ni Juda yaab, m ga ki ŋa nimi kinye? Naah kpa ngeehm mu m pu na fir mala ke kichakpiik ni aakpakpal na la, ki naahn limaln li fir nchakpawiin pu na. 5Kina pu le m di maah ga daa nitafal ki kuln nimi pu na tun ni maabɔnabr. Maah ban pu ni chee na aa duk kpala: 6M ban nimi aageehm le n‑yoonn mɔmɔk, maa ban nimi aatork baanja la. M ga li gee ke maanib li nyi mi ki jer ke bi li joo kitork seer mmii ni tii mi.#6.6: Lik Matiu 9.13, 12.7.

7“Tɔ, baah ti kpaan koo kitiŋ ngbaan ni na, le bi bii tipuur ti m ni bima nan puu tii tɔb na, ke Adam aah nan bii pu na. 8Gilead ye kitiŋ ki gbii titunwanbirdam ni binikurb na la. 9Bitotoorb na bi ke kinaayupaak ki ti dɔ nsan ni kiir unii na la. Hali bi yaa cha Sekem aatiŋ ki bi chain na ni kan, bi ku binib nsan ni la. Bi po nyi le ki tun titunwanbir timina mɔmɔk. 10M kan tibɔbir tibaa Israel aatiŋ ni: tima le ye ke maanib Israel yaab bii bibaa le ki dooni ŋiwaa.

11“Le nimi Juda aanib ma, m siin n‑yoonn mu m ga di daa ni mu aatafal na.

Currently Selected:

Hosea 6: xonB

Highlight

Copy

Compare