Daniel 5

Nebukadnesar aajapɔɔn Belsasar aajim sakpem na aabɔr

1Kinyeek kibaa le Ubɔrkpaan Belsasar nan yin ni waaninyuum lichur ke bi nan ji u chee njim sakpem, le bi nan kpaan ki nyun ndaan. 2Baah bi nyu ndaan na, le Belsasar nan bui ke bi ti yoor ni salmaa aayikur, ni tikunabr aayikur, ni ŋisambil ŋi ute Nebukadnesar nan yoor nyan Uwumbɔr Aadichal ni, Jerusalem aatiŋ ni na. Ubɔr nan cha bi yoor ni tiwan ngbaan mɔmɔk ke u ni waaninyuum, ni upuutiib, ni ubɔtiib nan di ni nyu ndaan la. 3Libuul ngbaan ni le bi nan joo ni salmaa aayikur, ni ŋisambil ngbaan, le bi mɔmɔk nan nyun ndaan ni ponn ni, 4le ki pak baah di salmaa naan ŋiwaa ŋi na, ni baah di tikunabr, ni tikumann, ni tikur, ni isui, ni ŋitakpal naan ŋi na.

5Libuul ngbaan ni, le unibɔn aaŋaal nyan ni ki piin ki bi ŋmee baah nan ligoln li na pu, libɔrdichal ni aadiik ki bi ka na ni, nin chee karyaa aamii wiin sakpen na. Le ubɔr nan kan mu aah bi ŋmee pu na. 6Ijawaan nan chuu u, le uwon yɔl, le utaŋaayil gbaa. 7Le u teen ke ubaa yin ni bibɔɔb, ni binib bimɔk joo inyɔk tun lituln na ke bi dan. Baah koo ni na, le ubɔr bui bi ke, “Unii u ŋmaa karn ŋŋmeen mue ki tuk mi mu aatataa na kan, bi ga peen u ŋibɔrbɔkul ŋi ŋmal mmam ni nsiin na, ki gbin u salmaa aaleen mu kpa kipak na uneen ni, aan u li ye unii tatar u aaninkpir paa m pu, nnaan mue ni na.” 8Libɔrdichal ni aasusurb ngbaan nan foor mal ni, le kaa ŋmaa karn ŋŋmeen ngbaan, kaa ŋmaa tuk ubɔr mu aatataa mu. 9Usui aah nan bii sakpen na, uwon nan moo yɔl la, le waaninyuum ngbaan aa nan nyi baah ga ŋa pu na.

10Le ubɔr aana nan ŋun kifuuk ki ubɔr ni waaninyuum nan faa na pu, le ki koo ni bi chee njim aadiik ngbaan ni, le ki bui ke, “Uwumbɔr tii mpɔɔndaan limɔfal li fɔk na. Taa cha ni li muk si sakpen kina aan aawon yɔl. 11Uja ubaa bi saanaan ni ki kpa Uwumbɔr u bi chain na Aafuur Nyaan u ni. Aate aah nan ye ubɔr pu na, uja ngbaan nan mɔk waalan, ni ichiin ki kpa nlan ke ŋiwaa na. Le Ubɔrkpaan Nebukadnesar nan di u ŋa bibɔɔb, ni binib bimɔk joo inyɔk tun iwaan aatuln na aayidaan. 12Waalan ni ichiin nyaŋ sakpen le u ŋmaa kpiir tidaŋ aatataa len, ki nyi ŋiyataŋak aatataa, ki ŋmaa kpiir tiwan ni bɔr na mɔk binib, kina pu na, tun yin ni uja u bi yin u ke Daniel na, u ubɔr nan ki yin u ke Beltesasar na, le u ga nan tuk si tiwan nimina mɔmɔk aatataa.”

Daniel aah kpiir ŋŋmeen ngbaan aatataa ki len pu na

13Libuul ngbaan ni le bi nan ti joo ni Daniel ubɔr aanimbiin ni, le ubɔr baa u ke, “Sin le ye Daniel, unaagbiija u nte ubɔr nan joo ni si ki nyan ni Juda aatiŋ ni na aa? 14M ŋun aa pu ke Uwumbɔr u bi chain na Aafuur Nyaan bi aa chee, le aa kpa nlan ki nyi tiwan sakpen. 15M yin bisusurb, ni binib bimɔk joo inyɔk tun iwaan aatuln na ke bi nan karn ŋŋmeen mue ki tuk mi mu aatataa, le baa ŋmaa karn, kaa ki bee mu aatataa mu. 16Tɔ, m ŋun ke aa ŋmaa kani tiwan ni bɔr na aatataa ki kpiir len. Aa yaa ga ŋmaa karn ŋŋmeen mue ki tuk mi mu aatataa kan, bi ga peen si libɔrbɔkul li ŋmal mmam, ni nsiin na, ki gbin si salmaa aaleen mu kpa kipak na aaneen ni, ki li ye nnaan mue ni aaninkpel tatar u paa m pu na.”

17Le Daniel gar u ke, “Li joo saapiin aabaa, bee aa ga ŋmaa di i tii ubaa. M ga karn ŋŋmeen ngbaan ki tii mpɔɔndaan, ki kpiir mu aatataa tuk si.

18“Uwumbɔr u kaa kpa ŋeen aatɔ na nan ŋa aate Nebukadnesar ubɔrkpaan, ki tii u liyimbil ni mpɔɔn. 19Waah nan kpa mpɔɔn sakpen pu na, ŋitimbol mɔmɔk, ni ŋinibol mɔmɔk, ni iliin mɔmɔk aanib nan san u ijawaan ki jii unimbiin ni. U yaa nan ban u ku unii u na kan, u ŋani kina la; le u yaa ban unii li kpa limɔfal kan, u cha u bi la. U nan nyuŋni ki jinni binib inimɔɔn waah gee pu na la. 20Tɔ, u nan di kigaak, ni inimpool, ni mbiin di ŋa waawangol na, nima le Uwumbɔr nan nyan u waanaan ni, ni kipak ni. 21Bi nan jenn nyan u binib chee, le waalandak gur bi ke tiwakor aalandak na. U ni ibon i bi timoor ni na, le nan gur koo tɔb chee, ki ŋmɔ timoor ke unaa na, ki doo timoor ni, nibaa aa bii u pu limaln taa pii u. Gbelngbeln na, le u di naadii tii Uwumbɔr u kaa kpa ŋeen aatɔ na, ke uma le joo unibɔn aanaan mɔmɔk, ki ga ŋmaa di mu tii unii umɔk u gee u na.

22“Le sin ujapɔɔn, saa sunn aabaa taab, ki mu nyi tibɔr ngbaan mɔmɔk. 23Aa tun Paacham Aadindaan tiwan ni kaa ŋan na, ki yoor tiyikur ni ŋisambil ŋi nyan ni Waadichal ni na; le sin, ni saaninyuum, ni aapuutiib, ni aabɔtiib nyun ndaan tiyikur ni ŋisambil ngbaan ponn ni, ki pak ŋiwaa ŋi bi di salmaa, ni tikunabr, ni tikumann, ni tikur, ni idɔ, ni ŋitakpal naan ŋi na, ŋiwaa ŋi kaa waa, kaa ŋun tibɔr, kaa nyi nibaa na, kaa tee nyuŋni Uwumbɔr u lik ke aa ga li bi, bee aa ga kpo, ki joo tiwan ni mɔmɔk aa ŋani na. 24Kina pu le Uwumbɔr tun ni ŋŋaal ngbaan mu nan ŋmee tibɔr tee.

25“Ŋŋmeen ngbaan sɔ: ‘Nkam, nkam, ŋŋaŋ, n‑yakr.’ 26Naatataa mu sɔ: nkam, Uwumbɔr kahn saanaan aawiin i gur na ki kuln mu; 27ŋŋaŋ, u ŋaŋ saah nyuun pu na ki kan ke saa nyuun kpala; 28n‑yakr, u chuu yakr saanaan ki di tii Media ni Pesia yaab.”

29Libuul ngbaan ni le Belsasar bui waatutum ke bi di libɔrbɔkul li ŋmal mmam ni nsiin na peen Daniel, ki di salmaa aaleen mu kpa kipak na gbin uneen ni; le ki di u ŋa waanaan ni aaninkpel tatar u paa u pu na. 30Liyaadaal ngbaan aanyeek le bi ku Belsasar, u ye Babiloŋ aabɔr na; 31le Darius u ye Media aanii ki ye ŋibin imonko itaa ni ŋilee aanii n‑yoonn ngbaan na, gaa nnaan ngbaan aapɔɔn.

Currently Selected:

Daniel 5: xonB

Highlight

Copy

Compare