Rut 2
2
Rut ta vana ma vwaha Bughaz
1Mamu la taŋ ma zəʼala Naghumi, sana mndu kulaŋ lu ka gadghəl ta uʼa turtuk nda Ilimelek, ta hgə lu ka Bughaz.
2Ma sana fitik, ka Rut makwa la Muwav nda Naghumi mantsa: « Kdəkkdək zliha zla ka dzaʼa yu da tska vana ma vwah nda hula mndu ya dzaʼa zɗəɗiŋ ta huɗi, » kaʼa. Ka Naghumi mantsa: « La makwa ɗa, » kaʼa. 3Ka laghu tsi tama, da tska vana nda hula gwal ta tska skwi ta vwah. Tsaw ŋa Bughaz ta uʼa turtuk nda Ilimelek ya tsa vwah slaf tsi tida ya. 4Ɓats nzəɗa, ka ɓhadaghatá Bughaz si ma Betʼlehem. Kaʼa nda gwal ta tska skwi ta vwah mantsa: « Ka nza Yawe kawadaga nda kaghuni! » kaʼa. Ka həŋ mantsa: « Ka tfaghagha tfa Yawe ta wi! » ka həŋ. 5Ka Bughaz nda kwalva ni ka mali ta ghəŋa gwal ta tska skwi ta vwah mantsa: « Ŋa wa na daghala marakw na na? » kaʼa. 6Ka tsa mali ta ghəŋa gwal ta tska skwi ta vwah ya mantsa: « Makwa la Muwav ya, tsa marakw ta vragaghata kawadaga nda Naghumi si ta haɗika Muwav ya. 7Kaʼa na: “Ta kumay yu ta vana mataba bakərvaha mista gwal ta tska skwi ta vwah,” kaʼa. Ka sagha tsi daga ga sərɗək ha ndana ta nzada a wu, zekw yeya nzadata tsi ma həga, » kaʼa.
8Ka Bughaz nda Rut mantsa: « Makwa ɗa, fiha fa ta sləməŋ, yaha ka dzaʼa da vanay ma sana vwah, yaha ka da lavaghuta ma na vli na, ka ndiʼafta ka ta vgha ta na kurɗuha ɗa na. 9Fata gha ta iri ta vwah ta mag həŋ ta slna, ka dzaʼa ka tahula taŋ ta hula taŋ. Pyaf pya yu ta kwalvaha ɗa ŋa kwala taŋ ksaghata. Ka ta kuzlagha kuzla ndala, dzaʼa gha da sa imi ma wudaha, ya tagagha kwalvaha ɗa, » kaʼa. 10Tsaya tama, ka zləmbata tsi zlumbruh ta haɗik ka tsəlɓatá. Kaʼa nda tsi mantsa: « Kabgawu! Kəl ka ka zɗəɗiŋtá huɗi gərndana, kəl ka ka dza vgha ka ŋa ɗa, ta iʼi mayəm na? » kaʼa. 11Ka Bughaz nda tsi mantsa: « Rusiɗif rusa lu ta inda skwi magana ka ta midza gha daga ka yawu mtuta zəʼala ghuni, nda ya ká ka zlanavatá i da gha nda ma gha nda haɗik ya yaga lu ta kagha mida, ka dzaʼa mista mnduha ya si kul snaŋtá ka ghalya. 12Ka plagham pla Yawe ta skwi ya maga ka, ka hɗaghamta Yawe, Lazglafta la Israʼila, sagha ka da zba vla bukwa mista zlimbira ni ya, ta nisəla gha gerger! » kaʼa. 13Kaʼa mantsa: « Má ka mutsaf mutsa yu ta zɗakatahuɗa gha mghama ɗa. Vliha vla ka ta mbraku, iʼi kurɗa gha, mniha mna ka ta gwaɗa ta ksiɗimtá ta ŋuɗuf, kulam nda nzakwa ɗa kul slafta ka sani mataba kurɗuha gha, » kaʼa.
14Ta fitika za skwa zay, ka Bughaz nda tsi mantsa: « Gavagagha gava da hadna ka za ka ta buradi, ka nutsa ka ma ima inabi masmasa, » kaʼa. Ka nzadatá tsi ta vata gwal ta tska skwi ta vwah. Ka vlaŋtá tsi ta masula, ka zutá tsi ka baghaku, ka haslanavata. 15Tahula tsa, ka sliʼaftá tsi da tska vana. Ká Bughaz mnanaftá kwalvaha ni mantsa: « Zlanawa zla ka tska tsi ta vana kulam ma bakərvaha, yaha kuni da dvay. 16Dzaʼa ghuni nda tsahigiŋtá ghəŋa ni ma bakərvaha ka zlanata ŋa vanay ni, yaha kuni da dvay, » kaʼa.
17Ka tskə tsi ta vana ni tama ma vwah ha ga hawu. Ka ɗəgatá tsi ta vana tskaf tsi, ka ndəghanaftá tsi wər ta litəra urz fwaɗ mbsak. 18Ka klaftá tsi, ka laghu da luwa. Ka nghanatá midza ni ta inda tskatá vana ni. Ka klagaptá Rut ta pɗakwa skwi ma vəl zay ni ka vlaŋta. 19Ka midza ni nda tsi mantsa: « Ga si ta tska ka ta na vana na gita na? Ga si ta maga ka ta slna na? Ka tfanagha tfa Lazglafta ta wi ta tsəna mndu ta zɗaghaŋta huɗi na, » kaʼa. Ka rusanaftá tsi ta midza ni ta mndu si ta mag tsi ta slna ga taŋ. Kaʼa mantsa: « Tsa mndu si ta mag yu ta slna ga taŋ gita ya ná, Bughaz hga ni, » kaʼa. 20Ka Naghumi nda ghwaʼala ni mantsa: « Ka tfanagha tfa Yawe ta wi, ta tsa mndu kul zlanata maganatá zɗaku ta gwal nda hafu nda gwal nda rwa ya! » kaʼa. Ka Naghumi nda tsi guli mantsa: « Huɗuhuɗa mu tsa Bughaz ya, tekw tsatsi mataba gwal raŋ vara#2:20 Da la Yahuda ná, ka mtu mta mndu, ka skwapta lu ta vwaha ni, laviŋ lava mndu ta uʼa taŋ guli ta varakta. Laviŋ lava tsa mndu ya guli ta kla wadga tsa mndu ta mtuta ya ŋa yanatá zwaŋ. u, » kaʼa. 21Ka Rut makwa la Muwav mantsa: « Kaʼa nda iʼi guli na: “Ka ndiʼafta ka ta vgha ta kwalvaha ɗa ha ka kɗiŋta taŋ ta tska skwi ta vwaha ɗa” kaʼa, » kaʼa. 22Ka Naghumi nda Rut ghwaʼala ni mantsa: « Ɗina tsa makwa ɗa, ka dzaʼa ka mista kurɗuha Bughaz. Yaha ka da laghwi da vwaha sana mndu, kawayaka skwi da pghaghaghatá lu ta hula, » kaʼa.
23Mantsa tama, ka ndiʼaftá tsi ta vgha ta kurɗuha Bughaz ŋa tska vana ha ka kɗata tskatá urz nda tskatá alkama. Ka kɗaŋtá tsi ta nzaku kawadaga nda midza ni.
© Wycliffe Bible Translators, Inc. All rights reserved.