Rum 10
10
Turtuktuk Lazglafta ŋa inda mndu
1Zwana ma ɗa, skwi ta kum yu ma ŋuɗufa ɗa ná, ta kumay yu ta mutsafta la Israʼila ta mbaku. Tsaya skwi ta mag yu ta duʼa ta ghəŋa taŋ da Lazglafta. 2Nda sna yu kazlay: Ta zbay həŋ ta Lazglafta nda ŋuɗufa taŋ kəʼa, ama sna a həŋ ta vərɗa tvi wa. 3Sna a həŋ ta tvi ká Lazglafta ta nanaftá mnduha ka gwal tɗukwa ta wa ira ni wa. Ŋa taŋ ŋa taŋ ma zba tva nzaku tɗukwa ta wa ira Lazglafta ta mag həŋ, ka kwalaghutá həŋ ta tsuʼaftá tsa tvi ta kəl Lazglafta ka nanaftá mnduha ka gwal tɗukwa ta wa ira ni ya. 4Tsaya tama ná, kɗanakkɗa *Kristi ta zlahu. Inda gwal ta zlghaftá *Yesu Kristi ná, nanaf na Lazglafta ta həŋ ka gwal tɗukwa ta wa ira ni.
Inda mndu ta zlghafta nda mba
5Ka vərɗa Musa vindafta ta ghəŋa tva nzaku ka mndu tɗukwa nda ma zlahu na: « Inda mndu ta kɗanaktá inda skwi manda ya ta kum zlahu#10:5 Levitik 18:5. ná, dzaʼa mbaku nda mida » kaʼa. 6Ama wya ka gwaɗa Lazglafta ta mnay ta ghəŋa tva nzaku tɗukwa ta wa ira Lazglafta nda ma zlghay nda ŋuɗuf: « Yaha kuni da mnay ma ŋuɗufa ghuni kazlay: Wa dzaʼa ŋladafta ta luwa » da klagatá *Kristi na? ka ka mndu ná, ghada ghada Kristi ta saha! 7Ma mnə ka guli kazlay: « Wa dzaʼa laha da ghuvata haɗik da klagaftá Kristi na kəʼa guli, » ghada ghada Kristi ta sliʼagapta. 8Tsaw wya ka Musa mnata ma deftera Lazglafta ta ghəŋa tva nzaku tɗukwa ta wa ira Lazglafta: Ndusa nda kagha gwaɗa Lazglafta, ma wubisima gha nzakwa ni, nda ya ma ŋuɗufa gha#10:8 Vrafta ta Zlahu 30:12-14. guli. Tsa gwaɗa ya ná, gwaɗa ta zlghay nda ŋuɗuf ya ta mnə ŋni ŋa mnduha. 9Ka mnaŋ mna ka nda wa gha kazlay: *Yesu ná, Mgham ya kəʼa, zlghaf zlgha ka guli ma ŋuɗufa gha kazlay: Sliʼaganapsliʼa Lazglafta ma mtaku kəʼa, dzaʼa mbaku ka. 10Ma zlghafta nda ŋuɗuf ta nuta lu ka mndu tɗukwa ta wa ira Lazglafta. Ma mnigiŋta nda ma wubisim guli ta mutsafta lu ta mbaku. 11Ka lu vindafta ma deftera Lazglafta na: « Inda mndu ta zlghafta ná, ta haɗ hula ta ghəŋa ni wu#10:11 Isaya 28:16. » kaʼa. 12Tsaya tama ná, ta haɗ dgəvgha mndu kazlay: La *Yahuda yeya, la *Grek yeya kəʼa wa. Inda taŋ demdem, Mgham turtuk Mghama taŋ, ta vla zɗaku katakata ŋa inda gwal ta hwayanavata. 13Nda vinda guli ma deftera Lazglafta kazlay: Inda mndu ta hwayanavatá Mgham ná, dzaʼa mbaku#10:13 Yuʼel 3:5. kəʼa.
14Ka zlghaf a həŋ wu, kinawu ka həŋ dzaʼa hwayanavata tama, kinawu ka həŋ dzaʼa zlghaftá mndu kul snaŋta həŋ ta gwaɗa ta ghəŋa ni? Kinawu ka həŋ dzaʼa snaŋtá gwaɗa ta ghəŋa ni guli ka haɗ mndu ta mnanaŋtá həŋ? 15Kinawu ka gwal ta mnay dzaʼa mnaŋta ka ghunaf a lu ta həŋ guli? Nda vinda ma deftera Lazglafta kazlay: Ngha ɓa ta waɗahata vgha mndu ta ghəŋa gwal ta klədanaghatá Lfiɗa Gwaɗa#10:15 Isaya 52:7. ta həŋ kəʼa. 16Tsaw inda taŋ a ta snatá tsa *Lfiɗa Gwaɗa ya wa. Ka Isaya mnata guli na: Mghama ɗa! Wa ta zlghaftá tsa gwaɗa mna ŋni#10:16 Isaya 53:1. ya? kaʼa. 17Mantsa ya ná, ma snaŋtá gwaɗa ta kəl lu ka nuta ka mnda zlghay nda ŋuɗuf. Tsa gwaɗa snaŋ lu ya guli ná, gwaɗa Kristi ya.
18Tsaw snaŋ a tama rki ɓa? ka yu. Mantsa ya a guli wa. Ka lu vindafta ma deftera Lazglafta guli na:
« Snava sna hga taŋ ta inda ghəŋa haɗik, ɓhaɓha lwa taŋ guli ta slrəŋa luwa#10:18 Zabura 19:5., » kaʼa.
19Ta sna a la Israʼila rki? ka yu guli. Ka Musa ghadata mnata guli na:
« Dzaʼa fam fa yu ta kaghuni da dra gwal kul nzakway ka la Yahuda,
dzaʼa fam fa yu ta kaghuni da ɓasa ŋuɗuf nda gwal kul nzakway ka la Yahuda kul snaŋtá sana skwi#10:19 Vrafta ta Zlahu 32:21. ya, » kaʼa.
20Ka Isaya mnatá sana gwaɗa kul raku ka mnay ni guli na:
« Slaf sla gwal kul psaŋtá iʼi, ta iʼi,
marava mara yu da gwal kul ɗawaŋtá iʼi guli,
ka Lazglafta#10:20 Isaya 65:1., » kaʼa.
21Tsaw kaʼa mnata ta ghəŋa la Israʼila guli na:
« Pgha pgha yu ta dzva ɗa ŋa tsuʼa gwal kwisa ghəŋa taŋ,
sna a həŋ ta gwaɗa da mndu ya wu#10:21 Isaya 65:2., » kaʼa.
Currently Selected:
Rum 10: xed
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
