Mbs 5
5
Hliŋtá gwal ta tsaɗ lu ma ghuɓu
1Ka Yawe nda Musa mantsa: 2« Mnanaf mna ta la Israʼila ka hligiŋta həŋ ta hula ghuɓu ta inda gwal nda ghwaɗaka lku ta həŋ, nda inda gwal nda ɗaŋwa mbəzakwa mndər, ka gwal ta tsaɗ lu dabga vəl ksaŋtá mbli a tsi. 3Dər zgun tsi, dər marakw a tsi, ka hligiŋta kuni ta həŋ ta hula ghuɓu. Yaha həŋ niŋtá həŋ ka gwal ta tsaɗ lu ta ghuɓa taŋ ta nzakw yu mataba taŋ ya, » kaʼa. 4Ka magatá la Israʼila mantsa ya, ka hligiŋtá həŋ ta hula ghuɓu. Manda ya mnana Yawe ta Musa, ka magatá la Israʼila.
Mnigiŋtá dmaku nda vranavatá skwa mndu
5Ka Yawe nda Musa mantsa: 6« Wya ká ka da mnanatá la Israʼila: Ka lagha zgun ka marakw a tsi ka ganatá dər wati ma dmaku tsi ta mnda səla, dmanaf dma ta Yawe, ksaf ksa dmaku ta tsa mndu ya. 7Dzaʼa mnigiŋ mna tsa mndu ya ta tsa dmaku ga tsi ya. Dzaʼa vranam vra ta skwa tsa mndu ya manda va vla ni, sganaghaha ta ghəŋa ni ta turtuk ma dgatá sgita tsa skwi ya hutaf. 8Ama ka mtu mta tsa mndu gana lu ta dmaku ya, haɗ zba ni ndusa ŋa vranavatá tsa skwi ya wu katsi, vranavatá tsa skwi ya ta mnda dra skwi ŋa Lazglafta ŋa Yawe. Mbəɗa a lu ta maŋazak ŋa pla ghəŋ ŋa slərɓa zughu, dzaʼa klafta lu ŋa slərɓa zughu nda tsa mndu ta gatá dmaku ya wa. 9Inda skwi ta hlapta la Israʼila ma mbəhuha taŋ nda ghuɓa ka hladaghata ŋa mnda dra skwi ŋa Lazglafta ná, ŋa ni tsaya. 10Inda mbəhu nda ghuɓa ta vlaŋta lu ta mnda dra skwi ŋa Lazglafta ná, ŋa ni tsaya. Inda skwi ta vlaŋta lu ta mnda dra skwi ŋa Lazglafta ná, ŋa ni tsaya, » kaʼa.
Zlahu ta ghəŋa marakw kawayaka skwi ta hlatiri
11Ka Yawe nda Musa mantsa: 12« Wya ká ka da mnanatá la Israʼila: Kawayaka skwi mamu marakw ga mndu ɗina a hiɗakwa ni wu, ka dmanaftá tsi ta zəʼala taŋ, 13ka klatá tsi ta mlaɗ ta vgha ni ma ɗifa nda ma hanata nda sana mndu. Tsaw graf a zəʼala taŋ wu, haɗ masləmtsək ta ghəŋa ni wu, ksanagha a lu guli wa. 14Ka ta draku tsa zəʼal ya, ka draku ta ghəŋa klata markwa taŋ ta ka uwalay kazlay zlah nənɓap nənɓa markwa taŋ kəʼa, tsaw kahwathwata kla kla tsa marakw ya ta mlaɗ ta vgha ni, ka tsa zəʼal ya a ta draku ka uwalaku ta markwa taŋ, tsaw kahwathwata kla kla a tsa marakw ya ta mlaɗ ta vgha ni, 15ka si mantsa tsi, kladaghata tsa zəʼal ya ta tsa markwa taŋ ya da mnda ta dra skwi ŋa Lazglafta. Kladanaghaha ta mbəhu ya ta nghanatá tsa marakw ya ka kiluʼ hkən huʼatá hpwa urz#5:15 Urz ná, sana nimaya ya manda alkama ta ndəhaku misimmisim.. Haɗ dzaʼa pghanaghatá rɗi ta ghəŋa tsa hpu ya wu, haɗ dzaʼa pghanaghatá mandaɓaya urdi guli wu, kabga mbəha nimaya draku magaf lu ta ghəŋa uwala krughuvi ta kum lu ta tsatsafta ya.
16Dzaʼa kladagha kla mnda dra skwi ŋa Lazglafta ta tsa marakw ya sladanata ta kəma Yawe. 17Dzaʼa taʼata mnda dra skwi ŋa Lazglafta ta imi nda ghuɓa ma siga rɓisl, tsəɗaʼaha ta gninika haɗika həga tumpul ka pghamta ma tsa imi ya. 18Tahula kladaghata mnda dra skwi ŋa Lazglafta ta tsa marakw ya ta kəma Yawe, ka paliŋtá swida ni, fanamha ma dzva ni ta tsa mbəha nimaya ŋa tsatsa krughuvi ya, tsaya mbəha nimaya draku. Dzaʼa ŋana ŋa mnda dra skwi ŋa Lazglafta ma dzva ni ta imi ɗahɗaha ta klaktá ksiʼi ya. 19Dzaʼa fam fa mnda dra skwi ŋa Lazglafta ta tsa marakw ya da waɗu nda mnay kazlay na: “Ka kahwathwata haɗ sana mndu ta hanata nda kagha wu, dər má ɗina a nzakwa gha wu, ka kla a ka ta mlaɗ ta ghəŋa gha ma nzakwa gha ka markwa mndu wu, yaha ksiʼa na imi na da ksaftá kagha. 20Ama ka si ɗina a hiɗakwa gha ma nzakwa gha ka markwa mndu wu katsi, ka niŋtá ka ta ghəŋa gha ka marakw ta tsaɗ lu, ka lagha sana mndu, zəʼala ghuni a wu, ka hanata nda kagha...” kaʼa. 21Dzaʼa fam fa mnda dra skwi ŋa Lazglafta ta tsa marakw ya da waɗa ksiʼi kazlay na: “Ka nighis na Yawe ka mndu ksiʼaf mnduha ni ka kwalaghutá kagha ma dərzlaghafta Yawe ta mndər ma həslaghaf ni ta huɗi guli. 22Ka lam la tsa imi ta klaktá ksiʼi ya da huɗa gha, ŋa həslaghaftá huɗi, ŋa dərzlaghaftá mndər!” kaʼa.
Ka tsa marakw ya dzaʼazlay mantsa: “Amin! Ka nza tsi mantsa,” kaʼa.
23Tahula tsa, ŋa vindafta mnda dra skwi ŋa Lazglafta ta tsa ksiʼiha ya ma defteri, ka ghuɓamta ma tsa imi ɗahɗaha ya ŋa hərɗiŋta, 24ŋa suŋtá tsa imi ɗahɗaha ta klaktá ksiʼi ya ta tsa marakw ya, ŋa lama tsa imi ta klaktá ksiʼi ya da huɗa tsa marakw ya ŋa klanaktá ghuya ɗaŋwa ɗah. 25Dzaʼa klap kla mnda dra skwi ŋa Lazglafta ta tsa mbəha nimaya draku ya ma dzva tsa marakw ya, ŋa zukwanaŋtá Yawe, ŋa fata ni guli ta gwir. 26Dzaʼa tsəɗaʼa tsəɗa mnda dra skwi ŋa Lazglafta ta tsa hpwa mbəhu ya zluk ma dzvu ka skwa havu, ŋa drafta ta gwir. Tahula tsa, ŋa sunusta ni ta tsa ima ya ta tsa marakw ya. 27Sunusta ni ta tsa imi ya, wya skwi dzaʼa magaku: Ka si niŋ na tsi ta ghəŋa ni ka marakw ta tsaɗ lu, ka si dmanaf dma tsi ta zəʼala taŋ, mantsa tama, dzaʼa lam la tsa imi ta klaktá ksiʼi ya da vgha ni, ka ghuya ɗaŋwa ɗah ŋa ni, ŋa həslafta huɗa ni, ka dərzlanaftá mndər. Dzaʼa nzakway tsa marakw ya ŋa mndəra taŋ ka skwa gray ta dzaʼa həŋ da mna ksiʼi. 28Ama ka klanak a tsa marakw ya ta skwa tsaɗa ta ghəŋa ni wu, nda nza kul haɗ skwa tsaɗa tida, haɗ dmakwa ni wu, dzaʼa laviŋ lava ta zlghaftá huɗi.
29Tsaya zlahu ta nghanatá draku, ŋa marakw ta nənɓaptá zəʼala taŋ, ka niŋtá ghəŋa ni ka marakw ta tsaɗ lu, 30ka zgun a tsi ksu draku ta uwalaku ta markwa taŋ. Kladaghata ni ta tsa marakw ya ta kəma Yawe, ŋa maganata mnda dra skwi ŋa Lazglafta taɓta tsa tva skwi ŋa magay ya. 31Mantsa tama, suɗek dzaʼa saba tsa zəʼal ya ma inda tsa krughuvi ya, ama tsa marakw ya, tsatsi dzaʼa kla krughuva ni, » kaʼa.
Currently Selected:
Mbs 5: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
