Mak 13

Tasiŋtá həga Lazglafta

Mat 24:1-2, Luk 21:5-6

1Ma fitika saba i *Yesu ma həga Lazglafta, ka sani mataba duhwalha ni nda tsi mantsa: « Mghama ɗa, ngha ta glakwa na pala na ɓa! Nghana ka ta glakwa batá na həga na ɓa! » kaʼa. 2Ka Yesu nda həŋ mantsa: « Nda ngha ka ta glakwa batá na həga na kiʼe, haɗ nzugwatá pala dər turtuk dzaʼa pɗata wa, dzaʼa tasiŋ tasa lu tesneʼ » ka Yesu nda tsi.

Skwiha dzaʼa magaku makəɗ kɗakwa ghəŋa haɗik sagha

Mat 24:3-14, Luk 21:7-19

3Tahula tsa, ka sliʼaftá *Yesu ka laghu nzata ta ghwá zaytuŋ, ta nzakway mbəŋ nda həga Lazglafta, ka ksaghutá i *Piyer nda Yakubu nda Yuhwana nda Andre nda ghəŋa taŋ ta Yesu ka ɗawaŋta da tsi. 4« Yawu dzaʼa magakwa tsa skwiha ya, ŋizla wu dzaʼa maraŋtá magakwa inda tsa skwiha ya na? Mna gwanaŋna mna, » ka həŋ nda tsi. 5Ka zlraftá Yesu ta mnay ŋa taŋ, kaʼa nda həŋ mantsa: « Ɗaswa ka kuni yaha mndu da nanaghunafta. 6Kabga nda ndəgha mnduha dzaʼa sliʼakta ka klaftá hga ɗa kazlay: “Iʼi *Kristi,” ka inda taŋ dzaʼa mnay, ŋa nanaghata taŋ ta ndəghata mnduha. 7Dzaʼa nda sna kuni ta mna gwaɗa ta lmu ndusa nda ya diʼiŋ, yaha ŋuɗufa ghuni tɗu, kabga dzaʼa magaku tsa skwiha ya, ama kɗavakta kɗakwa ghəŋa haɗik a tsa wa. 8Dzaʼa lmay sana haɗik ta lmu nda sana haɗik, mantsa sana luwa nda sana luwa guli. Dzaʼa ghudzavafghudza haɗik ma vliha kavghakavgha. Dzaʼa slaku maya ta haɗik. Nda tsaha ya dzaʼa zlra ghəŋa haɗik ta ɓasay manda marakw ta ɓasa yaku. 9Kaghuni, ɗaswa ka kuni, dzaʼa hlay lu ta kaghuni da vla guma, dzaʼa ɗgay lu ta kaghuni nda sarak ma həga tagha skwa la *Yahuda. Dzaʼa hladaghunagha hla lu ta kəma la ŋumna nda mghamha, kabga nzakwa ghuni ka duhwalha ɗa. Hada dzaʼa maraŋta kuni ta nzakwa ghuni ka masləmtsəka ɗa ta kəma taŋ. 10Wya skwi dzaʼa magaku karaku: Dzaʼa nzakway tkweʼ ka mnanaŋtá mnduha ta ghəŋa haɗik tender ta *Lfiɗa Gwaɗa Lazglafta, kada kuɗuta ghəŋa haɗik. 11Hlafta lu ta kaghuni ka hlaghata da vla guma ya, yaha kuni da laghu da ndana skwi dzaʼa kuni mnay hada kazlay: Nu dzaʼa mu mnay tama, kaʼa. Ka nu dzaʼa sagha da ghəŋa ghuni ma tsa fitik ya, tsaya dzaʼa kuni mnay, kabga kaghuni a dzaʼa gwaɗay wa. Dzaʼa sagha da Sulkum nda ghuɓa skwi dzaʼa kuni gwaɗay. 12Ma tsa fitik ya ná, zwaŋama ni dzaʼa vlatá zwaŋama ni ŋa dzata, zwaŋa ni ŋa da dzaʼa vlata ŋa dzata, ta mbəɗavatá zwani təv dadaha taŋ nda mamaha taŋ ŋa vlatá həŋ ŋa pslata.#13:12 Gray nda Mika 7:6. 13Dzaʼa husaŋ husa kuni ta inda mnduha, kabga nzakwa ghuni ka duhwalha ɗa, ama mndu ya dzaʼa kɗanakta suʼafta dzaʼa mbaku, » kaʼa.

Manzakɗawaya skwi

Mat 24:15-28, Luk 21:20-24

14« Ma sana fitik dzaʼazlay, dzaʼa nda ngha kuni ta manzakɗaway ta ŋəriŋta#13:14Ngha ta Danyel 9:27, 11:31, 12:11. skwa Lazglafta dzaʼa nzata ma vli má si kul raku. Ka havapta mndu nda sna ta dzaŋa. Mantsa guli, ka nda ngha gwal hadna ma Zudiya ta tsa skwi ya katsi, ka hwaya həŋ ta ghwá. 15Ka ta nzaku mndu ta bɗəma həga, yaha da ndana valagata ŋa vru da həga#13:15 Ngha ta Mata 24:17. kabga ŋa klaftá sana skwi, ka hwaya tsi ta hwaya. 16Mndu ya ma vwah guli, yaha da ndana vrakta dzagha ŋa klaftá lguta ni. 17Ghuya ɗaŋwa dzaʼa slanaghatá miʼaha nda huɗi nda gwal nda zwani ta ghuva taŋ ma tsa fitik ya! 18Ndəɓawa dzvu da Lazglafta, kabga yaha tsa skwiha ya slata givya. 19Ka yawu tsatá ghəŋa haɗik ka sagha ta gita, ta sla a mndərga tsa ghuya ɗaŋwa dzaʼa slata ma tsa fitik ya wu, sləglata a va ni guli wa.#13:19 Gray nda Danyel 12:1. 20Ka má fa a Lazglafta ta htanaktá tsa fitik ya wu katsi, ma haɗ mndu dzaʼa mbafta wa. Ama dzaʼa htanaghuhta ta tsa fitik ya, kabga gwal ɗagap tsi ŋa nzaku ka ŋa ni. 21Ka “wana *Kristi hadna,” “aʼ waʼa Kristi hada a,” ka mndu nda kaghuni katsi, yaha kuni da snay, 22kabga dzaʼa sliʼagagha sliʼa ghwaɗaka la krista nda ghwaɗaka anabiha. Dzaʼa magay həŋ ta ŋizla sana skwiha nda mazəmzəmha ŋa nana ɗagata mnduha Lazglafta, ka má ta magaku tsi. 23Kaghuni, ɗaswa ka kuni. Wya mnaghuna mna yu ta tsekeʼ luwa ta inda skwi dzaʼa magaku demdem.

Vragata Kristi

Mat 24:29-31, Luk 21:25-28

24« Tsa fitik dzaʼa sagha tahula ghuyapta lu ta tsa ɗaŋwa ya, dzaʼa mtu mta fitik, haɗ tili dzaʼa ɓəglafta wa. 25Dzaʼa rkaga rka tekwatsa ta luwa, ta dzaʼa ghudzavafghudza mbrakwa sana skwiha ta luwa.#13:25 Gray nda Isaya 13:10, 34:4, Azekiyel 32:7, Yuʼel 2:10, 3:4. 26Ma tsaya tama, dzaʼa nghaŋta lu ta saha *Zwaŋa mndu nda mbraku ma ghwayak, ta wuɗaku katakata ma glakwa ni ta saha tsi dzaʼazlay. 27Ghwanafha ta duhwalha Lazglafta, ŋa sliʼa taŋ ta kɗavakta ghəŋa haɗik tender,#13:27 Gray nda Vrafta ta Zlahu 30:4, Zakari 2:10 Nəhemiya 1:9. kulam ta slrəŋa luwa, ŋa tsakaktá mnduha ni ɗagab tsi.

Tagha skwi ta ghəŋa ghuraf

Mat 24:32-35, Luk 21:29-33

28« Nghawa skwi ta magaku nda ghuraf ɓa! Ka nda ngha kuni ta ghuraf ta ɗaku katsi ná, gi nda sna kuni kazlay: Ndusa dəwiŋ tama kəʼa. 29Mantsa ya guli, ka nda ngha kuni ta tsa skwiha ya ta magaku katsi ná, ka snaŋta kuni kazlay: Ta tvi səla *Zwaŋa mndu ka saha tama kəʼa. 30Kahwathwata ka yu ta mnaghunata, haɗ na mnduha ta na zamana gita na dzaʼa kɗuta ɗekɗek kul slatá tsa skwiha ya wa. 31Luwa nda haɗik ná, dzaʼa kɗu kɗa. Ama gwaɗa ɗa ná, haɗ dzaʼa kuɗuta wa. Nzawa nza hzleŋa, yaha kuni hani.

Lazglafta yeya nda sna ta kɗakwa ghəŋa haɗik

Mat 24:36-44

32« Ta ghəŋa gwaɗa ta tsa fitik ya ná, haɗ mndu nda sna ka ta wati luwa tsi wa. Dər duhwalha Lazglafta ta luwa, dər zwaŋa ni, sna a həŋ wa. Ba Da turtukwa ni yeya nda sna ta tsa fitik ya. 33Ɗaswa ka kuni! ka nzata kuni hzleŋa nda fatá ghəŋa ghuni, sna a kuni ka yawu dzaʼa sagha tsa fitik ya wa. 34Tsa skwi ya ná, dzaʼa nzakway manda zəʼala həga ta vrakta ta za wliwani. Ma sliʼa ni, ka zlaŋtá tsi ta həga ni ma dzva gwal ksanatá slna ni, daganafha ta slna taŋ ta həŋ. Ka ngha ka ta həga, kaʼa nda mnda ngha həga, ka nzata ka hzleŋa, kaʼa guli. Ka sliʼaftá tsi ka laghu. 35Kaghuni guli, hzleŋa fata ghəŋa ghuni kabga snaŋta a kuni ka ta wa ni luwa dzaʼa sagha zəʼala həga wa. Ka ga hawu tsi, ka ma takala tsi, ka ta waha vazak tsi, ka ga sərɗək a dzaʼa sagha tsi, haɗ mndu nda sna wa. 36Ɗaswa ka kuni da sagha tsi dluk slaghunaghata psla psla hani ta kaghuni. 37Manda va na ta mnə yu ŋa ghuni na ná, mantsa ya ta mna yu ŋa inda mnduha kazlay: Hzleŋa ka kuni fata ghəŋ, » kaʼa.

Currently Selected:

Mak 13: xed

Highlight

Copy

Compare