Mat 13

Gwaɗa ta wutsa hulfa

Mak 4:1-9, Luk 8:4-8

1Baɗu va tsa fitik ya, ka sabi *Yesu ma həga#13:1 Ngha ta Markus 3:1. ka laghu nzata ta wa drəf. 2Ka tskadaghatá dəmga ŋərɓisl ta vgha ta vata ni. Ka sliʼaftá tsi ka laghu nzagapta ma kwambalu ta nzatá inda mnduha ta wa ghwa. 3Ka mnə tsi ta ndəghata skwiha ŋa taŋ ka mahdihdi, kaʼa mantsa: « Mbaɗa sana mndu ka sliʼafta ka laghu da wutsa hulfa ni. 4Tata wutsay wutsay, ka rkatá sanlaha ma hulfa ta tvi, ka sliʼaktá ɗyakha ka ɗaguta. 5Ka rkatá sanlaha ta kluluh ma vli kul slaghutá haɗik, ka gi ɗyaftá tsi misimmisim kabga sira a haɗik ta ghəŋa ni wa. 6Na safa fitik dzafta tida ka zlghutá tsi həw ka ghwaluta, kabga slaghu a slrəŋ mista ni wa. 7Ka rkamtá sanlaha ma teki, ka glanaghatá teki ka raghwanata. 8Ka rkatá sanlaha ta gənək, ka ɗyaftá tsaha ya ka glaftá tsi ka pghaftá ghəŋ ka zwaŋ dzeʼdzeʼ, ɓərzləzla ghəŋa sanlaha, selela ghəŋa sanlaha, miɗiɗa ghəŋa sanlaha. » 9Ka sganaghatá Yesu, kaʼa mantsa: « Mndu nda sləməŋa snay ka sna tsi, » kaʼa.

Kabgawu ta kəl Yesu ka gra gwaɗa nda gra na?

Mak 4:10-12, Luk 8:9-10

10Ka gavanavatá duhwalha ni, ka həŋ mantsa: « Kabgawu ta kəl ka ka mna gwaɗa ŋa taŋ ka mahdihdi katək na? » ka həŋ. 11Ka *Yesu nda həŋ mantsa: « Kaghuni ná, vlaghuna vla lu ta snaŋtá vərɗa ɗifatá ga mghama Lazglafta, ama vlaŋ a lu ta hahəŋ wa. 12Ŋa mndu mamu skwi da tsi ta sganaghata lu, ŋa sgutani da tsi. Ama mndu ya kul haɗ skwi da tsi ná, dzaʼa kləgadanaghu kla lu ta va tsa kiʼa da tsi ya. 13Tsaya ta kəl yu ka mnay ka mahdihdi ŋa taŋ, kabga dər nghaŋha həŋ, ngha a həŋ wa. Dər snaŋha həŋ nda sləməŋa taŋ katək, sna a həŋ wu, graf a həŋ guli wa#13:13 Ngha ta Markus 4:12..

14« Ta ghəŋa taŋ dəɗafta tsa gwaɗa Lazglafta ta mnay nda ma wa anabi Isaya#13:14 Ngha ta Isaya 6:9-10. kazlay:

“Dər dzaʼa nda sna kuni nda sləməŋa ghuni,

grafta a kuni wa.

Dər dzaʼa nda ngha kuni nda ira ghuni,

nghaŋta a kuni wu kəʼa ya.

15Təŋu təŋa ghəŋa na mnduha na.

Dərzlaf dərzla həŋ ta sləməŋa taŋ,

haf ha həŋ ta ira taŋ,

kabga va a həŋ ta nghaŋta wa,

yaha həŋ da snaŋta nda sləməŋa taŋ,

yaha həŋ da grafta ma ŋuɗufa taŋ,

yaha həŋ da mbəɗanaftá nzakwa taŋ,

da mbanaftá yu ta həŋ#13:15 Ngha ta Isaya 6:9-10..”

16« Kaghuni ná, nda tfa wi ta ghəŋa kaghuni, kabga nda ngha ira ghuni ta vli, nda sna sləməŋa ghuni ta sləməŋ. 17Kahwathwata ka yu ta mnaghunata: Nda ndəgha la anabi nda gwal tɗukwa tɗukwa nzakwa taŋ si ta ɗvaŋta nghaŋtá na skwi nghaŋ kaghuni na, lay ngha a həŋ wa. Si ta kumay həŋ ta snaŋtá na skwi snaŋ kaghuni ná, sew sna#13:17 Ngha ta 1 Piyer 1:10, 12. a həŋ wa, » kəʼa ya.

Klatá ghəŋa tsa gwaɗa ta wutsa hulfa ya

Mak 4:13-20, Luk 8:11-15

18« Snawa sna tama ta klatá ghəŋa gwaɗa ta ghəŋa tsa mndu ta wutsa hulfa ya. 19Tsa tvi rkaf hulfa tida ya ná, gwal ta snaŋtá gwaɗa ta ga mghama Lazglafta kul grafta həŋ ya, həŋ. Ka sagha halaway zluʼugudunustá həŋ ta tsa skwi wutsam lu ma ŋuɗufa taŋ ya. 20Tsa kluluh rkaf hulfa tida ya ná, tsaya mndu ta snaŋtá gwaɗa ta ga mghama Lazglafta, gi ka tsuʼaftá tsi nda rfu. 21Tsaw tama, haɗ slrəŋ mista ni wu, nzəɗava a wa. Ka gi gruŋgra ghuya ɗaŋwa, ka giri a tsi kabga tsa gwaɗa ya, gi zləmbutani. 22Tsa vli ma teki rkam hulfa mida ya guli ná, tsaya gwal ta snaŋtá gwaɗa Lazglafta, ka laghu həŋ da ndana skwiha ma ghəŋa haɗik, nda skwa gadghəl, ka raghwanatá tsa skwiha ya ta tsa gwaɗa ya ma həŋ, ka niŋtá həŋ ka ksubaŋ. 23Tsa gənək rkaf hulfa tida ya guli ná, tsaya gwal ta snaŋtá gwaɗa Lazglafta ka snatá həŋ, ka magaftá həŋ: Ghərmbəts ghərmbəts sanlaha, salala sanlaha, miɗiɗa sanlaha. »

Ghwaɗaka kuzuŋ

24Kaʼa nda həŋ nda sana mahdihdi mantsa: « Ka guram ga mghama Lazglafta nda sana mndu ta sləgamtá vərɗa hulfa hya ma vwaha ni. 25Girviɗik, sliʼaghuslia lamndu da vlə hani, ka lagha ghuma ni da sləginistá rira distani ka laghwa ni. 26Manda ɗyafta tsa hulfa ya ka pghaftá ghəŋ, ka zlagaptá rira guli. 27Ka lagha kwalvaha tsa daŋahəga ni həga ya mnay ŋa ni, ka həŋ mantsa: “Mghama ɗa! vərɗa hulfa a sləgam kagha ma vwaha gha kay ra? Lam ndiga rira dida na?” ka həŋ. 28Kaʼa nda həŋ mantsa: “Ghuma ɗa ta magatá tsa,” kaʼa. Ka tsa kwalvaha ya nda tsi mantsa: “Ta ɗvay ka ka dzaʼa ŋni rətiŋta rki na?” ka həŋ. Kaʼa nda həŋ mantsa: 29“Zlaŋwa zla, ma lə kuni da rətay, yaha kuni da gaɓiŋta nda vərɗa hya. 30Zlaŋwa həŋ ka glakwa həŋ ka skwa turtuk ha ka sagha fitika tskay ta vwah. Tskapwa tska karaku ta rira, ka habafta kuni ŋa driŋta nda vu. Vərɗa hya ya, ka tskiɗimta kuni da guvura ɗa, ka yu dzaʼazlay nda gwal tska skwi ta vwah,” » kaʼa.

Hya kramasa

Mak 4:30-32, Luk 13:18-19

31Kaʼa nda həŋ nda sana mahdihdi kay guli mantsa: « Ga Mghama Lazglafta ná, ka guram nda hya kramasa klaf mndu ka sləgamta ma vwaha ni. 32Ndərzikwa tsatsi mataba inda hulfaha, ama ka ɗyaf ɗya tsi ka glafta, mal tsatsi mataba hulfa niɗaliha. Ta nuna gdiz ka fu, ŋa sliʼadaghata ɗyakha da baba həga taŋ ta zligamaha ni. »

Luk 13:20-21

33Kaʼa nda həŋ nda sana mahdihdi guli mantsa: « Ka guram ga mghama Lazglafta nda is ta klafta marakw ka laɓanamta ma kuratá darama hpu hkən ŋa ŋlaftá tsa hpu ya demdem, » kaʼa.

Mahdihda Yesu ŋa mnigiŋtá skwi nda ɗifa

Mak 4:33-34

34Ka mahdihdi mnanata *Yesu ta inda tsa skwiha ya ta dəmga. Haɗ sana skwi mnanaŋ tsi ta həŋ kul haɗ ka mahdihdi wa, 35kada nzakwa dzatá ghəŋa gwaɗa anabi ta mnay kazlay:

« Ka mahdihdi dzaʼa gwaɗa yu ta gwaɗa nda həŋ.

Dzaʼa mnigiŋ mna yu ta skwiha nda ɗifa daga ka yawu zlraftá ghəŋa haɗik#13:35 Ngha ta Zabura 78:2. kəʼa ya. »

Klatá ghəŋa gwaɗa ta ghwaɗaka kuzuŋ

36Mbaɗa *Yesu ka zliŋtá dəmga, ka sliʼaftá tsi ka laghu da həga. Ka gavanavatá duhwalha ni, ka həŋ nda tsi mantsa: « Pslaŋnap psla ta klatá ghəŋa tsa mahdihdi ta ghəŋa rira ya, » ka həŋ. 37Kaʼa nda həŋ mantsa: « Tsa mndu ta sləgamtá vərɗa hulfa hya ya ná, *Zwaŋa mndu ya. 38Vwah ya guli ná, ghəŋa haɗik tsa. Vərɗa hulfa hya ya guli ná, gwal ta nzakway ka ŋa ga mghama Lazglafta ya. Rira ya guli ná, gwal ta nzakway ka ŋa halaway ya. 39Tsa ghuma ta sləgamta ya guli ná, halaway ya. Tsa tska skwi ta vwah ya, tsaya kɗakwa ghəŋa haɗik. Tsa gwal tska skwi ta vwah ya guli, tsaya duhwalha Lazglafta. 40Manda va tsa tskaptá rira ŋa driŋta nda vu ya, manda va tsaya dzaʼa nzakwa tsi baɗu kɗavakta ghəŋa haɗik guli. 41Dzaʼa ghunaga ghuna Zwaŋa mndu ta duhwalha ni ŋa talaptá inda gwal ta pghamtá mndu da ga dmaku, nda gwal ta maga ghwaɗaka skwi, ŋa hliŋtá həŋ diʼiŋ nda ga mghama ni, 42ka pghamtá həŋ da duda vu. Ŋa wahay taŋ ta wahu, ka hpaɗa sliʼiŋa#13:42 Ngha ta Mata 8:12 taŋ hada. 43Ama gwal ta nzakway tɗukwa ta wa ira Lazglafta ya, manda fitik dzaʼa wuɗakwa hahəŋ ma ga mghama Da#13:43 Ngha ta Danyel 12:3. taŋ. Ka mamu mndu nda sləməŋa snay, ka sna tsi. »

Gadghəl ma ɗifa

44« Ka guram ga Mgham Lazglafta nda gadghəl ta ɗifa ma sana vwah. Ka lagha sana mndu dukwafta tida. Ka ɗifglanata tsa mndu ya guli. Ka laghu tsi nda rfu da dzawiŋtá inda skwa ni ka skwata tsa vwah ya. »

Miziɗikw nda bla dzva ni

45« Ka guram ga mghama Lazglafta nda sana mnda tsakala ta psa miziɗikwha nda bla dzva ni. 46Ka mutsafta tsi ta tsa miziɗikw ya turtuk nda bla dzva ni ya. Ka laghu tsi dzawiŋtá inda skwa ni ka skwata tsa miziɗikw ya. »

Kadəŋ

47« Ka guram ga mghama Lazglafta nda kadəŋ ta wuɗadata lu da drəf ŋa tumagaftani ta inda mndərga klipiha kavghakavgha. 48Ndəghafta tsa kadəŋ ya, ŋa tɗagafta ta wa sgam. Tahula tsa, ŋa nzata ka ɗagaptá ya ɗina ɗina, ka pghamta ma tughba, ŋa pghiŋta ghwaɗakhani. 49Mantsa ya dzaʼa nzakwa tsi ma kɗakwa ghəŋa haɗik. Dzaʼa sliʼaga sliʼa duhwalha Lazglafta ŋa galapta taŋ ta ghwaɗaka mnduha mataba tɗukwa ni, 50ŋa pghaghata taŋ ta həŋ da duda vu, ŋa wahay taŋ ta wahu ka hpaɗa sliʼiŋa#13:50 Ngha ta Mata 8:12. taŋ hada. »

Lfiɗa gadghəl nda halata ni

51Ka *Yesu nda duhwalha ni mantsa: « Lam la inda tsa skwiha ya da sləməŋa ghuni rki na? » kaʼa nda həŋ. « Aŋi! » ka həŋ zlghanaftá wa ni. 52Kaʼa nda həŋ guli mantsa: « Tsaya tama ná, ka nuna mnda tagha zlahu ka duhwala ga mghama Lazglafta ná, ka guram nda daŋahəga ni həga ta mutsa skwa gadghəla ni ma skwiha ka lfiɗ ka lfiɗ, nda ya ma skwiha nda kɗa fitika ni, dzaʼa gra lu, » kaʼa.

Kwalaghuta la Nazaret ta zlghaftá Yesu

Mak 6:1-6, Luk 4:16-20

53Tahula kɗiŋta *Yesu ta mana tsa mahdihdiha ya, ka sliʼafta tsi hada ka laghu. 54Ka ɓhadaghata tsi da luwa Nazaret#13:54 Nazaret: Luwa ta glakwa Yesu. Ngha ta 2:23, nda Lukwa 4:16. ta nzakway ka luwa ta glakwa ni. Ka taghə tsi ta skwiha ŋa mnduha ma həga tagha skwa taŋ. Ka ndərmim həŋ, ka həŋ mantsa: « Wa ta vlaŋtá mndərga na ma ɗifil? Wa ta vlaŋtá mbrakwa maga mndərga na ma mazəmzəm? 55Zwaŋa tsa mndu ta fiɗi ya a tsi kay ra? Mari a ma ni#13:55 Ngha ta Yuhwana 6:42. kay guli ra? I Yakubu, nda Yusufu, nda Simuŋ, nda Yuda a zwana ma ni kay ra? 56Mataba amu a ta nzakwa kwaghama ni kay guli ra? Tsaw wa ta vlaŋtá na ɗifil na, nda na mbraku na tama ɓa? » ka həŋ. 57Tsaha ya skwi ta pyafta həŋ ka zlghafta Yesu. Ka Yesu nda həŋ tama mantsa: « Ma luwa ni, nda ya ma həga#13:57 Ngha ta Lukwa 4:24, nda Yuhwana 4:44. ga taŋ yeya ta hərtətata lu ta anabi. Ama ma hamata vli ná, ta vlaŋ vla lu ta glaku, » kaʼa.

58Kiʼa yeya mazəmzəm magaŋ Yesu ma luwa Nazaret, kabga zlghaf a mnduha nda ŋuɗuf wa.

Currently Selected:

Mat 13: xed

Highlight

Copy

Compare