Lev 9
9
Zlrafta i Haruna nda zwana ni ta slna ŋa Yawe
1Baɗ matghasa fitik, ka hagaftá Musa ta i Haruna nda zwana ni, nda la galata mnduha la Israʼila. 2Kaʼa nda Haruna mantsa: « Klaf kla ta mamakwa sla ŋa pla ghəŋ ŋa ɗawa pla dmaku, nda maŋazak ŋa pla ghəŋ ŋa dray tsuh tsuh, kul haɗ maslivinza ta həŋ his his, ka hladaghata ka ta həŋ ta kəma Yawe. 3Tahula tsa, ka mnanata ka ta la Israʼila: “Klafwa kla ta dugzum ŋa pla ghəŋ ŋa ɗawa pla dmaku, nda mamakwa sla turtuk vakwa ni, nda slaɓalakwa tuwak turtuk vakwa ni kul haɗ maslivinza ta həŋ, ŋa pla ghəŋ ŋa dray tsuh tsuh. 4Ka klafta kuni guli ta lghəŋ turtuk nda maŋazak turtuk ŋa pla ghəŋa zɗaku, ŋa vlaŋtá Yawe kawadaga nda mbəha nimaya hwaɗam lu nda rɗi, kabga gita dzaʼa maravata Yawe da kaghuni,” » kaʼa.
5Ka hladaghatá həŋ ta tsa skwiha mnaf Musa ya ta wa tumpula guyaku, ka sliʼadaghata guyatá ghəŋa la Israʼila demdem, ka sladata ta kəma Yawe. 6Ka Musa mantsa: « Wya skwi mnaghunaf Yawe ŋa magay ghuni, kada maravata glakwa Yawe da kaghuni, » kaʼa. 7Ka Musa nda Haruna mantsa: « Gavadagha gava ta vata gwir, ka vlata ka ta skwa pla ghəŋ ŋa ɗawa pla dmakwa gha, nda skwa pla ghəŋa gha ŋa dray tsuh tsuh, ka slərɓapta ka ta zughu ŋa gha nda ŋa mnduha. Tahula tsa, ka vlata ka ta mbəhu mnduha, ka slərɓanapta ka ta zughu ta həŋ manda ya mnaf Yawe, » kaʼa.
8Ka gavadaghatá Haruna ta vata gwir, ka ghwanaftá mamakwa sla ŋa ɗawa pla dmakwa vərɗa tsatsi. 9Ka vlaŋtá zwana ni ta usa tsa mamakwa sla ya, ka ɗaʼatá tsi nda ndəfiŋa ni ta tsa us ya, ka ɗaɗafta ta duliha gwir. Ka pghidiŋtá tsi ta pɗakwa tsa us ya dista tsa gwir ya. 10Ka draftá tsi ta gwir ta ghwaviɗ, nda hulsisha, nda zəʼala mnaka tsa skwa pla ghəŋ ŋa ɗawa pla dmaku ya, manda ya si mnanaf Yawe ta Musa. 11Ama ka driŋtá tsi ta sluʼa ni nda huta ni tani ta hula ghuɓu.
12Tahula tsa, ka ghwanaftá Haruna ta skwa pla ghəŋ ŋa dray tsuh tsuh. Ka vlaŋtá zwana ni ta usa ni, ka wutsikaftá tsi ta slərpuha gwir demdem. 13Ka vlatá həŋ guli ta sluʼa skwa pla ghəŋ ŋa dray tsuh tsuh ka fay ka fay, nda ghəŋa ni tani, ka drafta ta gwir. 14Ka ghwaɓiŋtá tsi ta nihuɗa ni, nda dagulamaha ni, ka drafta ta gwir ta ghəŋa skwa pla ghəŋ ŋa dray tsuh tsuh.
15Tahula tsa, ka vlatá tsi ta mbəha mnduha. Ka klaftá tsi ta dugzum ŋa pla ghəŋ ŋa ɗawa pla dmakwa mnduha, ka ghwanaftá tsi, ka vlata ka skwa pla ghəŋ ŋa ɗawa pla dmakwa mnduha, manda tsa nda mamakwa sla ya. 16Ka vlatá tsi ta skwa pla ghəŋ ŋa dray tsuh tsuh, ka magatá tsi manda ya mnanaf lu ta tva magay. 17Ka kladaghatá tsi ta mbəha nimaya, ka tsəɗaʼatá tsi zluk ma dzvu, ka drafta ta gwir kawadaga nda skwa pla ghəŋ ŋa dray tsuh tsuh, manda ya snu lu ta magay hada inda sərɗək ya.
18Ka ghwaghwanaftá tsi ta lghəŋ, nda maŋazak kladagha mnduha ŋa pla ghəŋa zɗaku. Ka vlaŋta zwana ni ta usa taŋ, ka wutsikaftá tsi ta slərpuha gwir demdem. 19Ka vlaŋtá həŋ guli ta vliha nda mala nda mala ta tsa lghəŋ ya, nda ŋa tsa maŋazak ya: Htur, nda ghwaviɗ ta mbsamtá nihuɗi, nda hulsisha, nda zəʼala mnak. 20Ka pghaftá həŋ ta tsa vliha nda mala nda mala ya ta ghuvaha tsa riniha ya, ka draftá Haruna ta gwir ta tsa vliha nda mala nda mala ya. 21Ka zukwaŋtá Haruna ta tsa ghuvaha, nda rkufa zeghwi ya ka mbəhu ta kəma Yawe, manda ya si mnanaf Musa.
22Ka kapaftá Haruna ta dzvuha ni nda ta luwa nda təv mnduha, ka tfanaghatá wi ta həŋ. Ka saha tsi ta gwir, manda kɗakwa ni ta magatá slna pla ghəŋ ŋa ɗawa pla dmaku, nda ŋa pla ghəŋ ŋa dray tsuh tsuh, nda ŋa pla ghəŋa zɗaku ya. 23Ka lam i Musa nda Haruna da tumpula guyaku. Manda vragapta taŋ, ka tfanaghatá həŋ ta wi ta mnduha. Ka maravatá glakwa Yawe da mnduha demdem. 24Ka sab vu da Yawe, ka dəghwaɗutá tsa skwa pla ghəŋ ŋa dray tsuh tsuh, nda vliha nda mala nda mala ta gwir ya. Ka nghaŋtá la Israʼila demdem, ka hlaftá həŋ ta wi ka rfu, ka zlambata həŋ zluzlumbruh ta haɗik.
Currently Selected:
Lev 9: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
