Lev 8
8
Famtá mnda dra skwi ŋa Lazglafta da slna
8–10
Fa i Haruna nda zwana ni da slna
(Sab 29:1-37)
1Ka Yawe nda Musa mantsa: 2« Hlaf hla ta i Haruna nda zwana ni, nda lgutha taŋ, nda rɗa pghanaghatá mndu, nda lghəŋ ŋa pla ghəŋ ŋa ɗawa pla dmaku, nda maŋazakha his, nda buradi kul haɗ is mida ma tughba. 3Tahula tsa, ka tskanata ka ta inda guyatá ghəŋa la Israʼila ta wa tsa tumpula guyaku ya, » kaʼa.
4Ka magatá Musa manda tsa mnanaf Yawe ya. Ka tskavata guyatá ghəŋa la Israʼila demdem ta wi tgha tsa tumpula guyaku ya. 5Ka Musa nda guyatá ghəŋa mnduha mantsa: « Wya skwi mnaf Yawe ŋa magay, » kaʼa.
6Lagha Musa ka gavadanaghatá i Haruna nda zwana ni, ka mbambazatá həŋ nda imi. 7Ka suɗanavatá tsi ta sɗakw ta Haruna, hbanaha ta huɗi nda biwir, suɗanavaha ta guduŋgaba, ka fanaghatá ifut#8:7 Ifut na: Tsaya sana lgut kwapeh ta habana lu nda zuʼi ta badzaga ta badzaga, ta fanaghata gwal ta dra skwi ŋa Lazglafta ta ghəŋa lguta taŋ. nda biwira ifut ŋa ŋanata ɗina. 8Ka fanamtá Musa ta zliba ghuva. Ma tsa zliba ghuva ya, ka pghamtá tsi ta pala vza vindima ta hgə lu ka Urim nda Tumim#8:8 Urim nda Tumim: Tsaya palaha ŋa zba snaŋtá skwi ta kum Yawe. ya. 9Tahula tsa, ka wanamtá tsi ta gwambar ma ghəŋ, ka fanaftá zlembetsi ka dasu tida nda ta kəma ŋa ŋizla fata ka ŋa Yawe manda ya mnanaf Yawe ta Musa.
10Ka klaftá Musa ta rɗa pghanaghatá mndu, ka pghafta ta həga tumpul nda inda huzlaha mida, ka fata ka ŋa Yawe. 11Wutsikafha ndəfáŋ səla ta rɗi ta gwir, ka pghaftá tsi ta rɗi ta gwir nda inda huzlaha ni, nda glifiŋ nda tughwa ni ŋa fata ka ŋa Yawe. 12Ka pghəganatá tsi ma ghəŋ ta rɗa pghanaghatá mndu ta Haruna ŋa nzakwa ni nda fa ka ŋa Yawe. 13Tahula tsa, ka hlagaghatá Musa ta zwana Haruna, ka susuɗanavatá tsi ta sɗakw ta həŋ, ka habanatá huɗi ta həŋ nda biwir, ka wawanamtá gwambar ta həŋ ma ghəŋ, manda ya mnanaf Yawe ta Musa.
14Ka gavanaktá tsi ta lghəŋ ŋa pla ghəŋ ŋa ɗawa pla dmaku, ka pghaftá i Haruna nda zwana ni ta dzvuha taŋ ta ghəŋa ni. 15Ka ghwanaftá Musa, taʼaha ta usa ni, ka ɗaɗafta nda ndəfiŋa ni ta inda duliha gwir ŋa ghuɓiŋtá tsa gwir ya. Ka pghidiŋtá tsi ta pɗakwa tsa us ya dista tsa gwir ya ŋa fata ka ŋa Yawe ŋa slərɓa zughu. 16Ka klatá Musa ta ghwaviɗa nihuɗi, nda zəʼala mnak, nda hulsisha his his nda ghwaviɗa ni tani, ka drafta ta gwir. 17Ama ka klaftá tsi ta pɗakwa tsa lghəŋ ya, nda huta ni, nda sluʼa ni, nda swiɗa ni tani, ka driŋtá nda vu ta hula ghuɓu, manda ya mnanaf Yawe.
18Tahula tsa, ka kladaghatá Musa ta maŋazak ŋa pla ghəŋ ŋa dray tsuh tsuh. Ka lagha i Haruna nda zwana ni da pghaftá ta dzvuha taŋ ta ghəŋa ni. 19Ka ghwanaftá Musa, ka wutsikaftá usa ni ta slərpuha gwir demdem. 20Ka daganaptá Musa ta tsa maŋazak ya ka fay ka fay, ka drafta nda ghəŋa ni tani, nda fayha ni tani, nda ghwaviɗa ni tani. 21Ka ghwaɓiŋtá tsi ta nihuɗa ni, nda dagulamaha ni, ka draftá tsa maŋazak ya demdem ta gwir. Tsaya skwa pla ghəŋ ŋa dray tsuh tsuh, zɗəgana həlata ni ta Yawe. Tsaya skwa pla ghəŋ ŋa dray ta vu ŋa Yawe manda ya mnanaf Yawe ta Musa.
22Ka gavadanaghatá Musa ta mahisa maŋazak, maŋazaka pghamtá həŋ ma slna. Ka pghaftá i Haruna nda zwana ni ta dzvuha taŋ ta ghəŋa ni. 23Ka ghwanaftá Musa ta tsa maŋazak ya, ka taʼatá usa ni ka ɗuŋta ta wa daɓaraka sləməŋa Haruna nda ga zeghwi, nda ya ta dadana dzva zeghwa ni, nda dadana səla zeghwa ni. 24Tahula tsa, ka hladaghatá Musa ta zwana Haruna, ka ɗaɗuŋtá tsa us ya ta wa daɓaraka sləməŋha taŋ nda ga zeghwi, nda ya ta dadana dzvuha taŋ nda ga zeghwi, nda ya ta dadana səlaha taŋ nda ga zeghwi. Tahula tsa, ka wutsikaftá tsi ta pɗakwa tsa us ya ta slərpuha gwir demdem. 25Ka klaftá Musa ta ghwaviɗa tsa maŋazak ya, nda htura ni, nda inda ghwaviɗa nihuɗi, nda zəʼala mnak, nda hulsisha his his nda ghwaviɗa ni tani, nda rkufa zeghwa ni. 26Ka kalaʼatá tsi ma tsa tughba fa lu ta kəma Yawe ya, ta buradi turtuk kul haɗ is mida, nda gatu turtuk kul haɗ is mida, nda gatu hwaɗam lu nda rɗi turtuk, nda biskwit turtuk, ka pghafta ta tsa ghwaviɗ ya nda tsa rkufa zeghwi ya. 27Ka pghanamtá tsi demdem ma dzvu ta i Haruna nda zwana ni. Ka zukwaŋtá həŋ ta tsa mbəhu ya ta kəma Yawe. 28Tahula tsa, ka hlaghutá Musa ma dzvuha taŋ, ka dranaghata ta ghəŋa skwa pla ghəŋ ŋa dray tsuh tsuh ta gwir. Tsaya skwa pla ghəŋ zɗəgana həlata ni ta Yawe ŋa pghamtá həŋ ma slna. Tsaya skwa pla ghəŋ ŋa dray ta vu ŋa Yawe. 29Ka klaftá Musa ta ghuva tsa maŋazaka pghamtá həŋ ma slna ya, ka zukwaŋtá tsa mbəhu ya ta kəma Yawe. Tsaya mayaka Musa manda ya mnanaf Yawe.
30Tahula tsa, ka taʼatá Musa ta rɗa famta ma slna, nda tsa us kiʼa si ta gwir ya, ka wutsikafta ta Haruna nda ya ta lgutha ni, nda ya ta zwana ni nda lgutha taŋ tani. Mantsa ya kəʼa fatá ka ŋa Yawe, ta Haruna nda lgutha ni, nda zwana ni, nda lgutha taŋ tani.
31Ka Musa nda i Haruna nda zwana ni mantsa: « Dawa da ta tsa sluʼi tsa mahisa maŋazak ya ta wa tsa tumpula guyaku ya, ka zuta kuni hada, nda tsa buradi ma tughba ŋa pghaghunamta ma slna ya, manda ya mnaf yu kazlay i Haruna nda zwana ni dzaʼa zuta kəʼa ya. 32Ka driŋta kuni nda vu ta ya dzaʼa pɗata ma tsa sluʼi, nda buradi ya. 33Haɗ kuni dzaʼa sabi ta wa tumpula guyaku ma fitik ndəfáŋ wu, ha ka kɗatá fitika pghaghunamta ma slna, kabga dzaʼa maga maga lu ta fitik ndəfáŋ, ta pgha kaghuni da slna. 34Na skwi maga lu gita na ná, Yawe ta mnafta kazlay magata kəʼa ŋa slərɓaghunaptá zughu. 35Fitik ndəfáŋ dzaʼa zata kuni, nda fitik tani nda rviɗik tani ta wa tumpula guyaku ta maganatá slna ta Yawe. Ka nza a tsi manda tsaya wu ná, dzaʼa rwu rwa kuni, kabga mantsa ya ka Yawe mnaɗifta, » kaʼa. 36Mantsa tama, ka magatá i Haruna nda zwana ni ta inda skwi mnanaf Yawe ta həŋ nda ma wa Musa.
Currently Selected:
Lev 8: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
