Yəh 2
2
Ghunafta Yəhusuwa ta mnduha his da Yeriku ŋa vitsaptá haɗik
1Ka ghunaftá Yəhusuwa zwaŋa Nuŋ ta mnduha his kɗekkɗek ma Sitim nda mnay kazlay na: « Lawa la da vitsanatá tsa haɗik ya, katakata ni luwa Yeriku, » kaʼa. Ka sliʼaftá tsa gwal vitsa luwa his ya, ka laghwi. Ka han həŋ ga sana karwa, Rahab hga ni. 2Ka lagha lu mnanaŋtá mghama Yeriku: « Sam sa la Israʼila da na luwa na, ta na rviɗik na, da vitsa haɗik, » ka lu. 3Mantsa tama, ka ghunaftá mghama Yeriku ta mnduha da Rahab, ka həŋ mantsa: « Hlagap hla ta tsa mnduha ta sagha da ghuni, ta lami da həga ga ghuni ya, kabga sagha da vitsa haɗik həŋ, » ka həŋ. 4Tsaw, hlaf hla tsa marakw ya ta tsa mnduha his ya, ka laghu ɗifanatá həŋ. Kaʼa mantsa: « Mantsa nzakwa ni, sagha sa mnduha da ini, tsaw sna a yu ka sagha ga həŋ wu. 5Ta kraʼukraʼuwa vli taghwaʼa lu ka ha wa tgha luwa wu ta vraghutá həŋ. Sna a yu guli ta vli laghu həŋ wa. Hwayiŋwa hwaya ta həŋ misimmisim, dzaʼa ksay kuni ta həŋ, » kaʼa. 6Tsaw ta ghəŋa həga hladafta tsi ta həŋ, ka ɗifanatá həŋ ma ba ta sləka liŋ bana tsi tida. 7Mantsa tama, ka hwayiŋtá tsa mnduha ya ta həŋ. Ka ksaftá həŋ ta tvi nda təv zala Yardeŋ, ta tvi ya má dzaʼa laviŋta həŋ ta tsughwaɗadamta nda səla. Na saba tsa mnduha ta hwayiŋtá həŋ ya ma Yeriku, ka gi haftá lu ta wa tgha luwa.
8Ta va tsa luwa ya, ka gi laf Rahab slanaghatá tsa mnduha ya ta ghəŋa həga, ta kul ksaftá hani ta həŋ. 9Kaʼa nda həŋ mantsa: « Nda sna yu kazlay na vlaghuna vla Yawe ta na haɗik na kəʼa. Nda ksa ŋni da zləŋ katakata, nda ghudza inda mnduha ta na haɗik na dabga kaghuni, 10kabga snaŋnagha sna kinawu ka Yawe ghwaliŋtá drəfa Zaŋwafi ta kəma ghuni ta sab kuni ma Masar. Snaŋnagha sna guli na skwi ya magana kuni ta i Sihuŋ nda Ghug, mghamha la Amuru his ta ɓla zala Yardeŋ, zaɗana kuni ɗekɗek ta həŋ ya. 11Snaŋta ŋni ta tsa gwaɗa ya, rabadakw vgha ŋni, tsutsa ŋuɗufa inda mndu dabga kaghuni, kabga Yawe, Lazglafta ghuni ná, nda nza ka Lazglafta ta luwa nda gaftək, nda ya hadna ta haɗik tani. 12Ndanana, kdəkwakdək, waɗihawa waɗa nda hga Yawe kazlay na, manda ya magaghuna yu ta zɗaku ya, dzaʼa magana maga kaghuni guli ta zɗaku ta gwal ma həga ga da ɗa kəʼa. Vlihaha kuni guli ta ŋizla ni ta maraŋta kazlay: 13Dzaʼa zlana zla kuni nda hafu ta i da ɗa, nda ma ɗa, nda zwana ma ɗa, nda kwaghama ɗa, nda inda gwal ka ŋa taŋ. Ka zlaŋnata kuni ŋa kwal kul pslaŋnata, » kaʼa. 14Ka tsa mnduha ya nda tsi mantsa: « Nda hafa ŋni ta waɗaghunata ŋni. Ka mnaŋ a kagha gwaɗa ta sagha ŋni wu, dzaʼa maga gha maga ŋni ta zɗaku, baɗ da vlaŋnata Yawe ta na haɗik na, ɓlanapta a aŋni ta skwi hbaf mu wu, » ka həŋ.
15Ka fagatá tsi ta həŋ ta təɓaŋ nda ta finitir, kabga nzugwaf ta matsak ŋam lu ta tsa luwa ya nda tsi ya lu ta həga taŋ. 16Kaʼa nda həŋ mantsa: « Lawa ɗifaghuta ta ghwá, kabga yaha tsa gwal ta hwayighunista ya da guyughunusta. Ka ɗifaghuta kuni hada ka fitik hkən, ha ka vragaghuta taŋ. Tahula tsa, ŋa ksay ghuni ta tva ghuni, » kaʼa. 17Ka tsa mnduha ya nda tsi mantsa: « Dzaʼa ŋana ŋa ŋni ta tsa waɗu fam ka ta aŋni da waɗata ya, ka maga maga ka ta skwi dzaʼa mnaghafta ŋni: 18Baɗ dzaʼa saghar ŋni ta na haɗik na, ka hbagata ka ta na təɓaŋ ka dva na ta na finitir faga ka ta aŋni tida na. Ka tskanata ka ta vata kagha ma həga ga ghuni, ta i da gha, nda ma gha, nda zwana ma gha, nda ya nda inda gwal ma həga ga da gha. 19Ka sab sa dər wa tsi ma həga ga ghuni dzibil katsi, ta ghəŋa ni turtukwa ni usa ni, haɗ dmakwa aŋni wa. Ama ka faf fa lu ta dzvu ta mndu ta nzaku kawadaga nda kagha ma həga gha katsi, ta ghəŋa aŋni usa ni guli. 20Ama ka mnaŋ mna ka ta na skwi kəl ŋni ka sagha na katsi, ksəglə a tsa waɗu fam ka ta aŋni dida ya ta aŋni wu, » ka həŋ. 21Ka Rahab mantsa: « Ka nza tsi manda va ya mna kuni, » kaʼa. Ka ghuniŋtá tsi ta həŋ, ka laghu həŋ. Tahula tsa, ka hbagatá tsi ta tsa təɓaŋ ka dva ya kay ta tsa finitir ya.
22Ka laghu tsa mnduha ya ta ghwá. Hkən fitika taŋ hada, ha ka vragaghuta tsa gwal ta hwayiŋtá həŋ ya. Ka zbə həŋ ta həŋ ma inda vli, slaf a həŋ ta həŋ wa. 23Mantsa tama, ka saha tsa mnduha ya ta tsa ghwá ya. Ka tsughwaɗaghatá həŋ ta zala Yardeŋ. Ka lagha həŋ slanaghatá Yəhusuwa zwaŋa Nuŋ, ka rusanaftá həŋ ta inda skwi ta maguta nda həŋ. 24Ka həŋ nda Yəhusuwa mantsa: « Kahwathwata na, vlama vla Yawe ma dzva mu ta inda tsa haɗik ya. Dər gwal ma tsa haɗik ya guli ná, nda ghudza həŋ da zləŋ, ŋaŋta a həŋ da amu wu, » ka həŋ.
© Wycliffe Bible Translators, Inc. All rights reserved.