Sab 40

Dzugwatá həga tumpul

1Ka Yawe nda Musa mantsa: 2« Baɗ taŋtaŋ ma tila mataŋtaŋ dzaʼa dzugwata ka ta həga, həga tumpula guyaku. 3Ka famta ka ta akwata dzratá wi mida, ka haghuta ka nda zlala. 4Ka famta ka ta tabəl, ka payafta ka ta skwiha ŋa tida. Ka famta ka ta pitirlaha, ka tsatsuŋta ka ta vu ta wa tsa pitirlaha ya. 5Ka fata ka ta gwira dra urdi ka dasu ta kəma akwata dzratá wi. Ka fuŋta ka ta laɓle ta wa tgha lami da həga tumpul. 6Ka fata ka ta gwira pla ghəŋ ŋa dray tsuh tsuh ta kəma tva lami da həga, həga tumpula guyaku. 7Ka fata ka ta glifiŋ ma takataka tumpula guyaku nda gwir, ka ndəghamta ka ta imi mida. 8Ka tsata ka ta daɓa ni ka wanafta dendesl, ka fuŋta ka ta laɓle ta wa tgha lami da tsa daɓi ya.

9Ka klafta ka ta rɗa fata ŋa ɗa, ka masafta ka ta həga tumpul, nda huzla mida tani demdem. Ka pghata ka ŋa ɗa ta huzla mida demdem, ŋa nzakwa ni nda ghuɓa. 10Ka masafta ka ta tsa rɗi ya ta gwira pla ghəŋ ŋa dray tsuh tsuh, nda huzla ni tani demdem. Ka fata ka tsa gwir ya ka ŋa ɗa, ŋa nzakwa ni nda ghuɓa. 11Ka masafta ka ta rɗi ta glifiŋ nda tughwa ni tani, ka fata ka nda ghuɓa ka ŋa ɗa.

12Ka gavadanaghata ka ta i Haruna nda zwana ni ta wa tgha tumpula guyaku, ka mbazanata ka ta mbaza ta həŋ nda imi. 13Ka suɗanavata ka ta Haruna ta lgutha nda ghuɓa, ka pghanaghata ka ta tsa rɗi ya, ka fata ka ka ŋa ɗa ŋa magihatá slna dra skwi. 14Ka gavadanaghata ka ta zwana ni guli, ka susuɗanavata ka ta sɗakw ta həŋ. 15Ka paghanaghata ka ta rɗi ta həŋ manda va ya pghanagha ka ta da taŋ ya ŋa magihata taŋ ta slna dra skwi. Tsa pghanaghatá rɗi ta həŋ ya ná, tsaya dzaʼa fata həŋ ma slna dra skwi ka ŋa ɗa ŋa ɗekɗek ha zivir zivira taŋ, » kaʼa.

16Ka magatá Musa ta inda skwiha demdem manda va ya mnanaf Yawe. 17Baɗ taŋtaŋa fitik ma tila mataŋtaŋ, ma mahisa vaku, dzugwata lu ta tsa həga tumpul ya. 18Ka dzugwatá Musa ta həga tumpul, ka didihanatá tsi ta tughuha ni, dzagwaha ta katakuha ni, paghamha ta həndilha ni, dzagwaha ta guguɗiha ni. 19Tahula tsa, ka zlataftá tsi ta tumpul ta ghəŋa həga tumpul, fanaghaha ta skwa bukwa həga tumpul manda va tsa si mnanaf Yawe ta Musa ya.

20Ka hlaftá tsi ta klamha dzratá wi ya ka pghamta ma tsa akwati ya. Ka zlaŋamtá tsi ta sandlaŋha tsa akwata ya, ka fuŋtá tsi ta paɗuwa vla pla dmaku ta wa tsa akwati ya. 21Ka kladamtá tsi ta tsa akwati ya da tsa həga tumpula ya. Ka taptá tsi ta zlala ŋa haghuta, ka haghutá tsi ta tsa akwata dzratá wi ya, manda va ya mnanaf Yawe ta Musa.

22Ka fatá tsi ta tabəl ma tumpula guyaku nda təv mazlaya həga tumpul, nda ta kəma zlala. 23Ka pghaftá tsi ta buradi ka dzrafta tida ta kəma Yawe, manda va ya mnanaf Yawe ta Musa. 24Ka fatá tsi ta pitirlaha ma tumpula guyaku mbəŋ nda tabəl nda təv slərpa suda həga tumpul. 25Ka tsatsuŋtá tsi ta vu ta wa pitirlaha ta kəma Yawe, manda va ya mnanaf Yawe ta Musa.

26Ka fatá tsi ta gwira dra urdi ka dasu ma tumpula guyaku nda təv kəma zlala. 27Ka draftá tsi tida ta urdi zɗa ziʼakwa ni, manda va ya mnanaf Yawe ta Musa. 28Ka fuŋtá tsi ta laɓle ta wa tgha lami da həga tumpul. 29Ka fatá tsi ta gwira pla ghəŋ ŋa dray tsuh tsuh ta wa tgha lami da həga, həga tumpula guyaku. Ka vlatá tsi tida ta skwa pla ghəŋ tsuh tsuh, nda mbəha nimaya manda va ya mnanaf Yawe ta Musa.

30Ka fatá tsi ta glifiŋ ma takataka tumpula guyaku nda gwir, ka pghamtá tsi ta imi mida ŋa tsaɗa#40:30 Tsaɗa: Tsaya nzaku tsuweɗaka. 31Mida ta mbaza i Musa, nda Haruna nda zwana ni ta səlaha taŋ, nda dzvuha taŋ. 32Inda lami ta lam həŋ da tumpula guyaku, ka gavadaghata ta gavadaghata həŋ ta vata gwir a tsi, ta ghuɓiŋ ghuɓa həŋ ta nzakwa taŋ, manda va ya mnanaf Yawe ta Musa.

33Ka tsatá tsi ta daɓi ta wanaftá həga tumpul dendesl, nda gwir. Ka fuŋtá tsi ta laɓle ta wa tgha lami da tsa daɓi ya. Mantsa ya ka Musa kɗiŋtá inda slna.

Ndəghanafta glakwa Yawe ta həga tumpul

34Ka saha kusay tɗik bukwamtá tumpula guyaku, ka ndəghanaftá glakwa Yawe ta tsa həga tumpul ya. 35Laviŋ a Musa ta lami da tumpula guyaku wu, kabga nzaf nza kusay tida, ndəghanaf ndəgha glakwa Yawe tsa həga tumpul ya. 36Ma inda sliʼafta ta sliʼafta kusay ta həga tumpul ná, ta sliʼaf sliʼa la Israʼila ka ksa tvi, ka dzaʼa nda sladavata ma ya vli, sladavata ma ya vli. 37Ka sliʼaf a tsa kusay ya wu, haɗ hahəŋ ta sliʼavata ha baɗ fitik dzaʼa sliʼafta tsi wa. 38Gifitik ya ná, ta tsa həga tumpul ya ta nzata tsa kusaya Yawe ya. Girviɗik ya guli ná, ka vu nzakwa ni mida, ta nghə inda la Israʼila ta kəma taŋ ma inda mbaɗa taŋ.

Currently Selected:

Sab 40: xed

Highlight

Copy

Compare