Sab 39
39
Magatá lgutha ŋa gwal ta dra skwi ŋa Yawe
1Ka magaftá lu ta lgutha ŋa maga slna ma vli nda ghuɓa, nda sləvdza kubwalkubwal, nda ya ka dva ghuz, nda ya ka dva ghəlez. Ka maganaftá lu guli ta lgutha nda ghuɓa ta Haruna manda va ya mnanaf Yawe ta Musa.
Magatá ifut
2Ka magafta lu ta ifut nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ. 3Ka mbataptá lu ta dasu klipiɗ ka patakha, ka tataptá lu ka sləvdziha ŋa tsərslapta mataba sləvdziha ka kubwalkubwal, nda ya nda dva ghuz, nda ya nda dva ghəlez, nda ka liŋ kulefeɗ. Gwal ta vivɗa ta magafta. 4Ka magaftá lu ŋa tsa ifut ya ta skwiha his ŋa nzugwafta ta badzagaha, ŋa ŋanata ya təv kəma nda ya təv hul. 5Biwira hba tsa ifut ya ná, gwal ta vivɗa ta gafta ka skwa turtuk nda tsi. Ka gaftá həŋ ta biwir manda va tsa ifut ya, nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ guli, manda ya mnanaf Yawe ta Musa. 6Ka payaftá lu ta palaha uniks his, ka pghamtá ma guɗekwha ka dasu. Ka tahaftá lu ta hguha zwana Israʼila ta tsa palaha his ya, manda ya ká gwal ta fiɗa pala ta taha hati ya. 7Ka habaftá lu ta tsa palaha his ya ta dzvuha badzagaha tsa ifut ya, ŋa nzakwa tsa palaha ya ka skwa havu da la Israʼila, manda va ya mnanaf Yawe ta Musa.
Magatá zliba ghuva
8Ka gaftá gwal ta vivɗa ta zliba ghuva manda gatá ifut nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ. 9Ka gragra tuldiha. Ka zləɓaftá nda zləɓa ta tsa zliba ghuva ya. Dwaʼ ta dzvu slrakwa ni, dwaʼ ta dzvu bughwata ni guli. 10Ka tsərslaptá lu nda palaha nda bla nda bla ka ndərha fwaɗ. Taŋtaŋa ndər, pal pala ka sardwan, pal ya ka tupaz, pal ya ka imrud. 11Mahisa ndər, pal pala ka nufek, pal ya ka saffir, pal ya ka dzindar. 12Mahkəna ndər, pal pala ka yakiŋta, pal ya ka agat, pal ya ka ametis. 13Mafwaɗa ndər, pal pala ka beril, pal ya ka uniks, pal ya ka yasfe. Ka paghamtá lu ta tsa palaha ya ma tsa guɗekwha taŋ ka dasu ya. 14Ta tsa palaha ghwaŋpəɗ his ya, ka tahaftá lu ta hguha zwana Israʼila manda ya ta thafta lu ta hati. Tsa palaha ghwaŋpəɗ his ya ná, ta maray ta mndəra la Israʼila ghwaŋpəɗ his.
15Ta wa tsa zliba ghuva ya, ka ɗuŋtá lu manda ɗatá zuʼi ta ziɗaha his ka dasu ghenen. 16Ka magaftá lu ta guɗekwha his ka dasu, nda gidaŋha his ka dasu. Ka pghuŋtá lu ta tsa gidaŋha his ya ta slərpuha wa zliba ghuva. 17Ka habaftá lu ta tsa ɗaɗatá ziɗaha his ka dasu ya ta tsa gidaŋha his ta wa zliba ghuva ya. 18Tsa sanlaha ma kuzibiɗima ɗaɗatá ziɗaha his ya ná, ka habuŋtá lu ta wa tsa guɗekwha his ya. Ka habaftá lu ta dzvuha ifut ŋa nzakwa ni nda təv kəma. 19Ka magaftá lu ta sanlaha ma gidaŋha his ka dasu, ka habuŋtá lu ta slərpuha his mista ni nda ma huɗi zliba ghuva təv ifut. 20Ka magaftá lu ta sana gidaŋha his ka dasu, ka pghatá lu nda ma mndəra tsa dzvuha ifut ya nda təv kəma, ma vla nzugwata ni nda ta ghəŋa biwira tsa ifut ya. 21Ka habaftá lu ta tsa gidaŋha ta slərpuha zliba ghuva, nda ya ta slərpuha ifut ya nda sləvdzi ka kubwalkubwal, ŋa nzakwa tsa zliba ghuva ya nda hba ta biwira ifut, ŋa kwala ni gigɗaku. Ka magatá lu manda va ya mnanaf Yawe ta Musa.
Magata sanlaha ma lgutha gwal ta dra skwi ŋa Yawe
22Ka gaftá lu ta guduŋgaba ka kubwalkubwal ghenen ŋa fanaghatá ifut ta ghəŋa ni. 23Ka tsaptá lu ta ŋurzluŋa ni ma takataka. Ka gaftá lu tsa ŋurzluŋa ni ya ka wanafta manda ŋurzluŋa lguta huta ŋa kwala ni kuhwaku. 24Ta wa tsa guduŋgaba ya nda ta haɗik, ka maguŋtá lu ta rimuŋha nda sləvdzi ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ. 25Ka magaftá lu guli ta kwaleleŋha ka dasu ghenen. Ka laɓamtá lu ta tsa kwaleleŋha ya mataba rimuŋha ta wa tsa guduŋgaba ya ha ka wanafta. 26Pal kwaleleŋ ya ná, pal rimuŋ, pal kwaleleŋ ya ná, pal tegweri ta inda wa tsa guduŋgaba ya ka wanafta dendesl, ŋa klay ŋa maga slna dra skwi, manda ya mnanaf Yawe ta Musa.
27Ka gagaftá gwal ta vivɗa ta sɗakwha nda sləvdza liŋ kulefeɗ ŋa i Haruna nda zwana ni. 28Ka gagaftá həŋ guli ta gwambar nda sləvdza liŋ kulefeɗ, nda deriha gata ni nda sləvdza liŋ kulefeɗ, nda gedzerha gagaf lu nda vəvɗatá sləvdza liŋ kulefeɗ, 29nda biwir gaf lu nda vəvɗatá sləvdza liŋ kulefeɗ, nda ya ka kubwalkubwal, nda ya ka dva ghuz, nda ya ka dva ghəlez, manda ya mnanaf Yawe ta Musa. 30Ka magafta həŋ ta zlembetsa ŋizla fata nda ghuɓa ka dasu ghenen. Ka vindaftá həŋ tida manda thatá hati kazlay « nda fa ŋa Yawe, » kəʼa. 31Ka haftá ta sləvdzi ka kubwalkubwal ŋa hbafta nda ta ghəŋa gwambar, manda ya mnanaf Yawe ta Musa.
Kɗiŋtá slna
32Mantsa ya ka lu kaɗiŋtá inda slna həga, həga tumpula guyaku. Ka magatá la Israʼila manda va ya mnanaf Yawe ta inda ni ta Musa. 33Ka kladaghatá lu ta huzlaha həga tumpul demdem da Musa: Tumpul ni, nda skwiha ni hdeuʼhdeuʼ, nda katakuha ni, nda həndilha ni, nda guguɗiha ni, nda tughuha ni, 34nda skwi ŋa bukway ka hutaha maŋazak dvap lu, nda ya ka hutaha ɗina ɗina, nda zlala ŋa tamta mida, 35nda akwata dzratá wi, nda sandlaŋha ni, nda paɗuwa vla pla dmaku, 36nda tabəl, nda inda huzlaha ni, nda buradi ŋa fata ta kəma Yawe, 37nda pitirlaha ka dasu ghenen, nda dzratá vliha ŋa tsa vu tida, nda inda huzlaha ni, nda rɗi ŋa da pitirlaha, 38nda gwira dra urdi ka dasu, nda rɗi ŋa fata ka ŋa Yawe, nda urdi zɗa ziʼakwa ni ŋa dray nda dra, nda laɓle wa tgha lami da həga tumpul, 39nda gwir ka ghuva tili, nda katsara ni ka ghuva tili, nda sandlaŋha ni, nda inda huzla ni, nda glifiŋ nda tughwa ni, 40nda wupayha ŋa wamtá daɓa həga tumpul, nda matalaha ni, nda tughuha ni, nda laɓle wa tgha lami da tsa daɓi ya, nda tɓaŋha ni, nda silikha ni, nda inda huzla ŋa maga slna tsa həga tumpula guyaku ya, 41nda lgutha rka gaf lu nda ga ŋa magihatá slna ma vli nda ghuɓa, nda lgutha nda ghuɓa ŋa Haruna mnda dra skwi ŋa Lazglafta, nda lgutha ŋa zwana ni ŋa maga slna dra skwi.
42Ka magatá la Israʼila ta inda tsa slnaha ya, manda va ya mnanaf Yawe ta Musa. 43Ka naghanatá Musa ta tsa slnaha ya demdem. Kəʼa kəʼa ná, maga maga həŋ manda va ya mnaf Yawe. Ka tfanaghatá Musa ta wi ta həŋ.
Currently Selected:
Sab 39: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
