Sab 18
18
Lagha Yitru nghanaghatá Musa
1Yitru ná, mnda dra skwi ŋa Lazglafta ma Midyaŋ ya, tsatsi dzidza Musa. Ka snaŋtá tsi ta inda skwiha magana Lazglafta ta Musa, nda ya ŋa la Israʼila mnduha ni tani, ya ká Yawe hlagaptá la Israʼila ma Masar. 2Ka lagha Yitru da Musa, kawadaga nda Tsifura markwa Musa ya si vriŋ tsi da da ni ya, 3nda zwana zgwana ni his ya. Hga sani mataba tsa zwani ya ná, Gersum#18:3 Gersum na: Manda mnay kazlay mayəm ya kəʼa. ya, kabga si ka Musa na: « Ka mayəm yu ta haɗika mayəm, » kaʼa. 4Hga tsa sani ya guli ná, Ilighezer#18:4 Ilighezer na: Manda mnay kazlay Lazglafta ɗa ta katá iʼi kəʼa ya. ya, kabga kaʼa si mnata na: « Lazglafta da ɗa ta katihata, ka zluʼagaptá iʼi da kafaya Firʼawna, » kaʼa. 5Ka lagha tsa Yitru dzidza Musa ya, nda zwani his tani, nda markwa Musa slanaghatá Musa ma mtak, ma vla ghuɓa ni ndusa nda ghwá Lazglafta. 6Ka ghunaftá Yitru ta mndu ŋa mnanatá Musa, kaʼa mantsa: « Iʼi dzidza gha ya ta sagha da slaghaghata, nda markwa ghuni, nda zwana zgwana gha his, » kaʼa. 7Ka sab Musa da tsuʼaftá dzidza ni, ka dzatá tsi ta ghəŋ, ka brusatá tsi, ka guvtá həŋ ta zgu, ka lam həŋ da həga tumpul.
8Ka rusanaftá Musa ta inda skwiha magana Yawe ta Firʼawna, nda la Masar dabga la Israʼila, nda inda hərfaku ta slanaghatá həŋ ta tvi, nda ya ká Yawe katagaptá həŋ. 9Na snaŋta Yitru ta tsa gwaɗaha ya, ka rfu tsi ta rfu ta ghəŋa inda zɗaku ya magana Yawe ta la Israʼila, ma zluʼagapta ya zluʼagap tsi ta həŋ ma dzva la Masar. 10Ka Yitru mantsa: « Zləzləvama Yawe ta zluʼagaghunapta ma dzva Firʼawna, nda la Masar! Zləzləvama Yawe ta zluʼagaptá la Israʼila ma dzva la Masar! 11Ndanana, nda sna yu kazlay na, malaghu mala Yawe ta inda lazglaftaha kəʼa, kabga zluʼagap zluʼa ta mnduha ni ma ghuya ɗaŋwa taŋ, da la Masar ta nzanaghatá həŋ, » kaʼa. 12Ka klaftá Yitru, dzidza Musa ta skwa pla ghəŋ ŋa dray tsuh tsuh, nda sanlaha ma skwa pla ghəŋ ŋa vlaŋtá Lazglafta. Mantsa tama, ka lagha i Haruna nda inda la galata mnduha la Israʼila, da za skwa zay kawadaga nda dzidza Musa ta kəma Lazglafta.
Paghata Musa ta maliha ŋa dga guma
13Ga mahtsima ni, ka nzatá Musa ŋa tsanatá guma ta mnduha. Ka sladatá mnduha ta kəma Musa daga ga sərɗək ha tekulemes fitik. 14Nghanata dzidza Musa ta inda skwi ta mag tsi ŋa mnduha, kaʼa mantsa: « Nahgani na skwi na ta mag ka ŋa na mnduha na na? Kabgawu ta kəl ka ka maga na slna na turtukwa gha, ta sladata mnduha ta vata kagha daga ga sərɗək ha tekulemes fitik na? » kaʼa. 15Ka Musa nda dzidza ni mantsa: « Ta kəl yu ka magay mantsa ná, kabga ta sagha sa mnduha da iʼi da sna skwi ta kum Lazglafta. 16Ka mamu skwi ŋa dzray mataba sana mndu nda sana mndu katsi, ta sagha sa həŋ da iʼi, ŋa dginista ɗa ta həŋ. Snanamha yu ta həŋ guli ta zlahuha Lazglafta nda skwiha ta tagh tsi, » kaʼa. 17Ka dzidza Musa mantsa: « Na skwi ta mag ka na ná, ɗina a wa. 18Hərfa vgha gha ta hərf ka, nda gwal ta sagha da kagha tani. Furtu furta na slna na ka ŋa gha, laviŋ a ka ta magafta turtukwa gha wa! 19Sna ka vlaghata yu ta hiɗaku. Ka nza Lazglafta kawadaga nda kagha. Kagha dzaʼa sladata ta kəma Lazglafta da manaka mnduha, ka klay kagha ta kəma ni ta inda gwaɗaha ta zlərɗ həŋ. 20Paslanap ka ta mnduha ta zlahuha nda skwiha ta tagh Lazglafta. Snanam ka ta həŋ ya ká həŋ dzaʼa ksa tva ni, nda ya ká həŋ dzaʼa maganatá slna guli. 21Zabap zaba mataba mnduha demdem ta sanlaha ma gwal nda sgit ta həŋ, ta zləŋa Lazglafta, ta vərɗa mnduha, gwal husaŋ nənɓu. Pagha pagha ta həŋ ka maliha ta ghəŋa mnduha dəmbuʼ dəmbuʼ, nda mnduha dərmək dərmək, nda mnduha hutaf mbsak hutaf mbsak, nda mnduha ghwaŋ ghwaŋ. 22Hahəŋ gwal dzaʼa nzata ka tsanatá guma ta mnduha inda fitik. Ama gwaɗaha ya nda bla nda bla ya, klaghakta taŋ ta kagha. Zwana gwaɗaha ya, dgiŋta hahəŋ ta tsaha ya. Mantsa ya dzaʼa dga kuni ta tsa slna ya, ŋa mbəl htaghaghuta ndəgakwa ni. 23Ka mantsa ya ka ka magay katsi, ka tsuʼaf tsuʼa Lazglafta ta magay gha mantsa ya katsi, dzaʼa laviŋ lava ka ta ŋafta. Dzaʼa sliʼi inda na mnduha na ləŋləŋ dzagha taŋ guli, » kaʼa. 24Ka snatá Musa ta gwaɗa dzidza ni, ka magatá tsi ta inda tsa skwiha manana tsi ya. 25Ka zabaptá tsi ta mnduha nda sgit ta həŋ mataba la Israʼila demdem, ka fafanaghatá tsi ta həŋ ta ghəŋa mnduha: Maliha ta ghəŋa mnduha dəmbuʼ dəmbuʼ sanlaha, nda dərmək dərmək sanlaha, nda hutaf mbsak hutaf mbsak sanlaha, nda ghwaŋ ghwaŋ sanlaha. 26Ka tsə həŋ ta guma ŋa mnduha dər ta wati luwa tsi. Gwaɗaha ɗukɗukwa ɗukɗukwa ya ná, ka hlagaghatá həŋ da Musa. Ama inda zwana gwaɗaha ya, hahəŋ ka ghəŋa taŋ ta tsatá guma ni. 27Mantsa tama, ka pghíŋtá Musa ta dzidza ni, ka vraghatá tsi ta haɗika ni.
Currently Selected:
Sab 18: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
