Sab 1
1
Ghuya ɗaŋwa la Israʼila ma Masar
1Wya hga zwana Israʼila ta ɓhadaghata da Masar, inda taŋ nda həga taŋ, nda həga taŋ, nda da taŋ Yakubu tani: 2I Rubeŋ, nda Simghuŋ, nda Levi, nda Yahuda, 3nda Yisakar, nda Zəvuluŋ, nda Biŋyamiŋ, 4nda Daŋ, nda Naftali, nda Gat, nda Aser. 5Gwagwata mndəra la Yakubu ná, ndəfáŋ mbsak həŋ. Yusufu ná, ma Masar tsatsi. 6Ka rwutá i Yusufu, nda inda zwana ma ni, nda inda gwal ta nzakway ta tsa zamana ya tani. 7Ama ka yutá la Israʼila. Ka yutá həŋ tusak katakata, ka dzaʼa mbrakwa taŋ ta kəma ta kəma, ka ndəghanaftá həŋ ta tsa haɗik ya.
8Lab la vakuha mida tama, ka laf sana mgham ta pala ma Masar. Sna a tsatsi ta gwaɗa ta ghəŋa Yusufu wa. 9Kaʼa nda mnduha ni mantsa: « Nghawa ngha ta la Israʼila ɓa, wana yuta həŋ tusak ta ghəŋa, malaghu mala həŋ ta mbrakwa mu. 10Katama katá ta htsiŋ da həŋ, mutsaf ma mutsa ta vərɗa tvi dzaʼa pyaftá yakwa taŋ. Ka maga a mu mantsa wu katsi, ka sliʼaf sliʼa lmu ná, dzaʼa gwaf gwa həŋ ta vgha nda ghumaha mu ŋa lmay taŋ ta lmu nda amu, ŋa sliʼapta taŋ ma haɗika mu, » kaʼa. 11Mantsa ya, ka paghatá həŋ ta maliha ta ghəŋa slna ŋa huʼanaptá vgha ta la Israʼila ma fanaghatá slna ka mbraku ta həŋ, kəl həŋ ka banaftá Firʼawna ta luwaha guvur: Pitum nda Ramses. 12Ta sgə lu ta ghuya ɗaŋwa ŋa taŋ ya ná, ta sgaku yakwa taŋ nda sga ka zluʼutá vli ha ka husaŋtá la Israʼila ta la Masar. 13Ka fatá həŋ ta la Israʼila ka vuʼa taŋ. 14Ka ghuy həŋ ta ɗaŋwa ŋa taŋ nda slna ta malaghutá mbrakwa taŋ: Ka mblu həŋ ta həŋ ka hwaɗa rɓisl, nda tsa brik, nda maga inda slna ma vwah. Inda slna ta vlaŋta lu ta həŋ ná, ɗukɗukwa ɗukɗukwa nzakwa ni.
15Mamu sana miʼaha his ta ya mndu mataba la Hebru, Sifra hga sani, Pugha hga sani. Ka fanatá mghama Masar ta zlahu ta həŋ, kaʼa mantsa: 16« Ta yə kuni ta miʼa la Hebru ya, nghanawa ngha ɗina ta tsa pala yakwa ni ya, ka zwaŋa zgun tsi katsi, ka dzata kuni. Ala ka makwa tsi ya, ka zlanata kuni nda hafu, » kaʼa. 17Ama ta zləŋay tsa miʼaha ya ta Lazglafta, ka kwalaghutá həŋ ta magatá skwi ya mnana mghama Masar ta həŋ. Ka zlanatá həŋ ta tsa zwana zgwana ya nda hafu. 18Ka hagaftá mghama Masar ta tsa miʼaha ya, kaʼa nda həŋ mantsa: « Kabgawu kəl kuni ka magata mantsa, ka zlanatá tsa zwana zgwana ya nda hafu kay na? » kaʼa. 19Ka həŋ nda Firʼawna mantsa: « Nza a miʼa la Hebru manda miʼa la Masar wa. Dagala prəls ma vgha taŋ. Ma kɗaku miʼaha ta ya mndu lagha da ya həŋ ya ná, gi yaya hahəŋ ta zwaŋa taŋ, » ka həŋ. 20Ka va sgaku yakwa la Israʼila, ka dzaʼa ta kəma ta kəma ka malaghutá mbraku. Ka maganatá Lazglafta ta zɗaku ta tsa miʼaha ta ya mndu ya. 21Ka vlaŋtá Lazglafta ta zwani ta tsa miʼaha ta ya mndu ya, kabga vəl zləŋata taŋ ta Lazglafta. 22Ka Firʼawna nda inda mnduha ni mantsa: « Inda zwaŋa zgun dzaʼa yagata lu mataba la Hebru ya ná, ka vzaghata kuni da ghwa Nil. Ama inda ya ka makwa, ka zlanata kuni nda hafu, » kaʼa.
Currently Selected:
Sab 1: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
