Ast 7
7
Dzugwuŋtá Haman ta wa udzu
1Ka ləglagha i mgham nda Haman da za skwa zay dagala, nda Asta, markwa mgham. 2Ka mgham nda Asta ta sə həŋ ta ima inabi baɗ tsa mahisa fitik ya guli mantsa: « Ari Asta, markwa mgham! Nahgani skwi ta kum ka ta ɗaway da iʼi na? Dzaʼa maga gha maga yu ta skwi ya kumaŋ ka, dər má sləɓahwa ga mghama ɗa tsi, dzaʼa vlagha vla yu, » kaʼa. 3Ka Asta, markwa mgham zlghanaftá wi mantsa: « Rvera ɗa, ka zɗəgagha zɗa yu ta nghə ka, zɗəgagha zɗa ɗaway ɗa katsi, zliha zla nda hafu, zlana zla guli ta mndəra ini, ka nzakwa həŋ nda hafu. Tsaya na ɗaway ɗa, tsaya skwi ta kum yu. 4Na nzakwa ni ná, dzawap dzawa lu ta mndəra ini nda iʼi tani ŋa hərɗiŋnista, ŋa pslatá aŋni, ŋa zaɗaŋnata. Tsaya tama, ka si ŋa nzakway ka vuʼa yeya dzawapta lu ta aŋni ná, má dzaʼa haf ha yu ta wa ɗa, kabga haɗ ghəzliwa ni ŋa daŋwazla mgham wu, » ka yu ma dzaʼazlay. 5Ka mgham Ahasverus nda Asta, markwa mgham mantsa: « Wa tsa mndu ya na? Ga tsa mndu ya? Tsa mndu ta ndana magatá skwi manda tsaya na? » kaʼa. 6Ka Asta mantsa: « Mndu ya ta dza kuma nda aŋni, ka ghuma ŋni ná, nana Haman ghwaɗaka mndu na ya, » kaʼa. Ka zlraftá Haman ta ghudzaku ta kəma i mgham nda markwa mgham.
7Ka sliʼaftá mgham nda gufatá ŋuɗuf ma tsa vla za skwa zay ya, ka laghu da kawgal ma həga ga mgham. Ka nzata Haman ka ndəɓa dzvu da Asta, markwa mgham ŋa katá hafa ni, kabga nda ngha ta zləmnda dzaʼa maganata mgham. 8Ta vragaghatá mgham ma kawgal ma həga ga mgham da həga ma vla za skwa zay ná, ta zləmbadatá Haman ta tsa dughuruk nda slra nzaf Asta tida ya. Ka mgham mantsa: « Kak kak kak kak, waká na mndu na ta kuma ŋəra markwa mgham, ga ini, ta wa ira ɗa na? » kaʼa. Na gi saba tsa gwaɗa ya ma wa mgham, ka gi bukwamtá lu ta kuma Haman nda lgut. 9Ka Harvunaʼ sani mataba mapslaha mgham nda tsi mantsa: « Waʼa la la Haman ta udzu nda slra, ka mitər hisambsak hutaf mida ma həga ga taŋ si ŋa dzugwuŋtá Murduhay, si ta kataftá mgham ya kay, » kaʼa. Ka mgham mantsa: « Ka mantsa tsi ná, lawa dzugwuŋtá Haman! » kaʼa. 10Ka dzugwuŋtá lu ta Haman ta wa tsa udzu si la tsatsi ŋa dzugwuŋtá Murduhay ya. Tahula tsa, ka lɓatá tsa gufatá ŋuɗufa mgham ya.
© Wycliffe Bible Translators, Inc. All rights reserved.