Matwaya 4

Kuyereriwa ka Insa

1Ikisa, Insa akitwariwa akukisiwa na Roho Takatifu palanga akayereriwe na Ibilisi. 2Pesire kufunga suku arubaini, usiku na nsana, mwinsho ikinkola njala. 3Cakúyerera ire akinfika karibu, akimwambira: “Kamba kuwa Mwana wa Mwenyezimungu#4:3 “Mwana wa Mwenyezimungu” ndi zina rimojawapo retiwa Insa. Rikolota kupatana kwema ka Insa na Mwenyezimungu, kamba mwana na wawaye. Eri zina‑ri aisema kuwa cipita kitendo ca muka na nlume, ila kupatana kukulu ka kiroho., sowerera mawe‑ya ataduke mikate.” 4Fala iye akinjibu, akamba: “Vyandikiwa#4:4 Ona Kumbukumbu 8:3. javi:

‘Binadamu aainshi julu ya mikate basi, fala ainshi julu ya kila masemo a Mwenyezimungu.’ ”

5Ikisa Ibilisi akintwala Insa, akuka naye Yerusalemu kaya takatifu, akintula julu mahala parefu pakulu pa Nyumba Takatifu, 6akimwambira: “Kamba kuwa Mwana wa Mwenyezimungu, refye pansi, kamana yandikiwa#4:6 Ona Zaburi 91:11.:

‘Awamuru malaika wake kuhusu uwe,

wakupokerera mmakono mwawo,

mawe asukulumize anta aba mulu wako.’ ”

7Insa akimwambira: “Vyandikiwa#4:7 Ona Kumbukumbu 6:16. novyo javi:

‘Usimyerere Mola, Nlungu wako.’ ”

8Ikisa Ibilisi akinsukula tena, akuka naye mpaka pamwango nrefu sana, akimolotera inti za ulumwengu piya na ubora wa utajiri wawo. 9Akimwambira: “Ukisujudi ukinitukuza omi, vinu‑vi piya nukupa.” 10Insa akimwambira akamba: “Lawa‑pa, uka vyako, uwe Shetwani#4:10 Shetwani ndi zina rengine ra Ibilisi., konta yandikiwa#4:10 Ona Kumbukumbu 6:13. javi:

‘Mola Nlungu wako, iye ndi waujuzi kuntukuza,

kuntumika iye yeka yake tu basi.’ ”

11Basi Ibilisi akimwasa. Mpunde noure malaika wakinfika karibu, wakintumika.

Mwanzo wa kazi za Insa Galileya

12Insa, paasikire kuwa Yahaya kafungiwa, akiludira inti ya Galileya. 13Akisama Nazareti, akuka akikala Kafarnaumu, kaya íri nanyenje ya tanda#4:13 “Tanda” epa ndi Tanda ra Galileya., upande wa inti ya Zabuloni na ya Naftali#4:13 Inti ya rikolo ra Zabuloni na Naftali, wana wa Yankubu., 14ipate vitimiziwe visemiwe na nabii Izaya#4:14 Ona Izaya 9:1,2., akamba:

15“Inti ya Zabuloni na inti ya Naftali, nanyenje ya tanda,

kupunda muto wa Yordani, Galileya ya mataifa!

16Wanu wari ngiza wawona nuru yakuwala pakulu sana,

wekáre nkati ya inti na kati ya kinviri ca kifo, nuru iwazunguriza.”

17Kulawa noure wakati ure, Insa akanza kwereza, akamba: “Tubiyani, kamana ufalume wa binguni uwa karibu.”

Wanafunzi wakwanza wa Insa

18Insa, paakenenda nanyenje ya tanda ra Galileya, kawawona wanu, munu na nduye: Ansumani etiwa Peduru, pamoja na nduye Andere, wakitaya nyavu ntanda mure konta wákiwa wavuvi. 19Akiwambira: “Nifulateni omi, nukutendani kuwa wavuwi-wanu.” 20Mpunde noure, nakwasa nyavu zire, wakinfulata. 21Nakuka mbere, akiwawona wanu wengine, munu na nduye: Yakobu mwana wa Zebedeyu, pamoja na Yahaya, nduye Yakobu. Wákiwa mungalawa na wawa yawo Zebedeyu, wakiwanza nyavu zawo. Insa akiweta, 22newo mpunde noure wakasa ngalawa na wawa yawo, wakinfulata.

Kazi ya Insa Galileya

23Insa akenenda piya inti ya Galileya, mmasinagoga#4:23 Sinagoga ndi nyumba ya duwa ya Mayahudi. mwawo kupita akifunda. Akereza Habari Ngema ya ufalume wa Mwenyezimungu, na akiponesa ulwere piya na maradi piya a wanu ware. 24Kusifiwa kwake kusikirikana piya inti ya Siriya. Wakija nawo kwake iye piya walwere wa kila namuna ya malwazo na kopepesiwa, wakuwa na mashetwani, wa visalasala na wakuremala, neye akiwaponesa. 25Wanu wengi wakinfulata, kulawa Galileya, Dekapoli, Yerusalemu, Yudeya pamoja na ng'ambu nyengine ya Yordani.

Currently Selected:

Matwaya 4: wmwBI

Highlight

Compare

Copy