Ing Malagung Diling Kanta 4
4
Ing Lalaki
1Kalagu mo, O sinta ko; tune kang malagu!
Mapundat lang mata mu lalam ning kekang belu.
Anti ya king metung a kawan-kambing ing kekang buak
a lundag-lundag kukuldas king bunduk ning Gilead.
2Ding kekang ipan maputi lang anti ding tupang meurud at melinis;
paris-paris la at e ka bungal.
3Ding kekang labi anti la karing lasung malutu;
lalu kang lalagu neng magsalita ka.
Ding pisngi mung malare-lare makawili lang lalawan
lipat ning ing belu papampanan na la.
4Kalupa ne ning tore nang David ing kekang batal,
mabilug ya at malinatnat; neng atin yang kwintas
anti yang sabitan kalasag ding lalaking matapang.
5Ding susu mu anti lang aduang usa king salu mu
a mamangan karing liryu.
6King salu mung mabanglu karin ku magkanlung#4:6 King Hebreo: munta ku king bunduk ning mira at king talimunduk ning insenso.
angga king tumiup ing marimlang angin ning kayabakan,
at mawala nang lubusan ing sablang karalumduman.
7Kalagu mo, O sinta ko!
Ala kung apintas keka.
8O ketanguanan ko, tara lakuan ta ne ing Lebanon,
at ing taluktuk ning Amana.
Lakuan mu ne ing bunduk ning Senir at ing Hermon,
ding lugal a salikutan da ring leopardo at leon.
9O sinta#4:9 King Hebreo: kapatad a babai; kasebian yang meyandam karing poeta na ning Ehipto. ko at ketanguanan ko,
uli ning suliap ding mata mu
at ning kwintas king batal mu binihag me ining pusu ku.
10Kaniaman na ning lugud mo,
O sinta ko at kakaburi ko!
Mas maniaman ing lugud mu kesa king alak,
at ala yang kalupa ing banglu mu
karing sablang pabanglung balu ku!
11Ding labi mu lalasa lang pulut-panilan;
ing dila mu 'tin yang pulut at gatas;
ing bau ning kekang imalan mabanglung anti ing Bunduk ning Lebanon.
12O sinta ko at kakaburi ko,
mengari kang makasalikut at makabakud a hardin;
mengari ka naman king makasalikut a sibul.
13Ding kekang suli lalsut la
antimo ding king mulahan a granada,
at ala lang kalupa ding bunga ra.
'Tyu la karin ding tanaman a henna at nardo a piakuanan pabanglu,
14at antimu rin ding saffron, kalamo, kanela,
at ding tanaman a piakuanan insenso,
mira, aloe a maulagang pabanglu.
15Miparanuman ya ing hardin king sibul,
king danum a mamagus ibat karing Bunduk ning Lebanon.
Ing Babai
16Tumiup ka, O angin ning norti!
Datang na ka, O angin ning mauli!
Tiupan yang kakung hardin
ban banglu mikalat.
Paburen yang datang king hardin na ing kakung pakamalan
at mangan karing prutas a pekamaniaman.
Currently Selected:
Ing Malagung Diling Kanta 4: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
