Ding Dalit 22
22
Ding Kasakitan at ing Kapanayan ning Taung Banal
1 # Mt 27:46; Mc 15:34. Dios ko, Dios ko, baket pepaburen mu ku?
Baket meko kang marayu at saup kaku pigkaimut mu?
2O Dios ko, aldo't bengi
ikang kakung ausan;
e ku mipaindatun kening kakung kabilian;
obat e mu ku pa pakibatan?
3Oneng ika ing makalukluk king banal a lugal,
ing bukud pupurian ning Israel.
4Kekeng makatua ikang karelang penaligan,
at dininan mu lang kaligtasan.
5Inyang minaus la keka king panganib miligtas la;
memungang mayap ing keka pamanalig da.
6Balamu e na ku tau
nune anti kung ulad a tatabi da,
at pikakasaman ding memalen!
7 # Mt 27:39; Mc 15:29; Lc 23:35. Ding sablang menakit kaku kailian da ku;
pipiling da lang buntuk da at pituya-tuya da ku!
8 # Mt 27:43. Ngarang sasabi, Ing Ginu ya ing kekang penaligan,
obat ngeni e na ka papansinan?
Nung kaluguran na ka pin,
obat e na ka sasagipan?
9Ika ing ilut inyang mibait ku,
at miningat king pandagul ku
kapamilatan ning kakung ima.
10Manibat na kanita ika na ing kakung penaligan,
at ing Dios ku kanitang mibait ku.
11E ka lalaut kaku,
uling malapit ing panganib kaku,
at metung man alang sumaup kaku.
12Ding kalaban ku anti lang toro'ng makapadurut kaku,
kalupa da la ring mabagsik nang toro ning Bashan.
13Asbuk da kaku nganganga da la ngan;
gagaga lang balamu leon a mapaglapak at danupan.
14Ing sikanan ku mebating;
ing kalupa na danum a mitugtug king gabun;
mengalisia-lisia la sablang kakung butul.
Pusu ku anti yang kandila;
kilub ning kakung salu malalaso ya.
15Anti yang gabun a malangi ing batal ku;
mipapakat ya kening telabanua#22:15 King Hebreo: sikang. ining dila ku;
halus mete ku inyang king alikabuk likuan mu ku.
16Padurutnan da ku ding balamu asu,
kukubkuban da ku ding e mayap a tau;
gamat ku bisbus da la pati na ding bitis ku.
17Kakung butul kaku lang abilang;
pituya-tuya da ku kabang aku ing karelang lalawan.
18 # Mt 27:35; Mc 15:24; Lc 23:34; Jn 19:24. Karelang pirakayan susulud kung imalan,
at kakung tibabal karela yang pisugalan.
19E ka sana lalaut kaku, O Ginu!
Datang na kang agad, O talapagligtas ku.
20King espada iligtas meng kaladua ku,
at ing bie ku king ket da rening asu.
21King asbuk ning leon sagipan mu ku;
iligtas mu ku karing sagu da reting mabangis a toro!
22 # Heb 2:12. Sabian ke ing lagyu mu karing kapatad ku,
at ika ing kakung purian king karelang kapulungan.
23Ikong maki takut king Ginu, purian ye!
Ikong sablang lahi nang Jacob, parangalan ya!
Ikong sablang lahi nang Israel, samban#22:23 O kaya: pitakutan ye't galangan (awe keng Inglis). ye!
24Uling ala yang inumis
ni pepaburen ninumang pakakalulung atyu king kagipitan;
kabud karela yang ausan agad na lang pakibatan.
25Ika ing kakung purian king maragul a kapulungan,
uli ning kekang depatan;
kakung penata kakung tuparan king karelang arapan.
26Mangan la at kumabsi ding kalulu;
detang king Ginu lalapit purian de.
King kapilan pa man sana minawa la!
27Ding sablang tau aganaka re ing Ginu at kilalanan de,
datang lang sablang bansa ban king Ginu samba.
28Uling ing Ginu ari ya, ya ing pamuntuk ding bansa.
29Duku la king Ginu ding sablang mayupaya at palalu;
ding sablang king alikabuk menibatan,
king arap na duku la ngan.
30Ding anak a mibait king panaun a daratang ya ing karelang suyuan;
ing daratang a lahi balitanan ya tungkul king Ginu.
31Mibalita karetang e pa mibait ing pamagligtas na;
karetang e pa makabait ing sablang depatan na.
Currently Selected:
Ding Dalit 22: PmPV
Highlight
Share
Compare
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
