Ding Dalit 106
106
Ing Kayapan ning Ginu king Balen Na
1 # 1 Cro 16:34; 2 Cro 5:13; 7:3; Ezra 3:11; Dalit 100:5; 107:1; 118:1; 136:1; Jer 33:11. Purian ye ing Ginu!
Pasalamatan ye ing Ginu, uling mayap ya;
ing lugud nang e kukupas alang angga.
2Ninu ing makapagsalita karing dapat nang maragul ning Ginu?
Ninung makaibie ganap a kapurian king Ginu?
3Mapalad la ding taung tutupad karing keyang utus,
ding parating darapat king matulid.
4 Ginu, e mu ku sana kakalinguan potang ing kekang balen keka neng saupan;
iyabe mu ku karetang kekang sagipan.
5Paintulut mung kakung akit ing kasaplalan ning kekang balen,
at king karelang tula makiabe layun ligaya karing sablang ibat keka.
6Ikami at ding kekeng mangatua parehu kaming dinapat pamikasala;
ing depat ming kasalanan alang kalupa.
7 # Exo 14:10-12. Kanitang atyu la king Ehipto ding kekeng makatua
e da la aintindian ding makapagmulala mung depatan;
karelang kelinguan ing lugud mung alang angga,
at karin king Dagat da ring Timbu,
keka O dios a Kakataskatasan, mig-rebeldi la.
8Makanyan man keka lang segipan antimo ing kekang pengaku,
ban kekang ipabalu ing upaya ning kekang lagyu.
9 # Exo 14:21-31. King amanu na memala ya ing Dagat da ring Timbu,
at tinaid na lang papunta king malanging gabun.
10Linigtas na la karing gamat ding menalipan karela;
linigtas na la king puersa da ring kalaban da.
11Timbunan na lang kalaban karing maragul a alun,
at karela alang mitagan metung man.
12 # Exo 15:1-21. Kanita ing balen Israel meniwala ya king amanu na,
at migkantang kapurian king Ginu.
13Oneng agad dang kelinguan ing depat na;
e da penaya ing turu na.
14 # Bilang 11:4-34. Karin king disyerto penusigan da ing sariling buri da,
at ing Dios pekilabanan de pa.
15Itang inawad da, ing Dios binie na,
oneng binie na naman ing makamate pesti karela.
16 # Bilang 16:1-35. Karin king disyerto keririan de i Moises
at i Aaron a tapat nang talasuyu ning Ginu.
17Kanita ing gabun mignganga ya, at inakmul ne i Datan, at i Abiram
at ing mabilug nang pamilya mikutkut ya.
18Ing milalablab a api dinatang, at ding talatuki da mesilab la ngan;
mesilab la ngan detang darapat e matulid.
19 # Exo 32:1-14. Karin king Horeb#106:19 O kaya: Sinai. ginawa lang metung a biserung baka,
at iting larawan a pinandayan ya ing karelang simban.
20Pekilibe de ing Dios a mayupaya
king larawan ning baka a dikut ing kakanan na.
21Kelinguan de ing Dios a migligtas
karela kapamilatan ding mayupaya nang dapat karin Ehipto.
22Tune makapagmulala ing depat na king bansang ita,
at king Dagat da ring Timbu makapangilabut ing pepasari na.
23Binalak na ing paten na la, oneng i Moises a talasuyu na
tinalakad ya ban mamilatan para karela, at e na belaus ning Dios
itang karela buri nang ipagpa.
24 # Bilang 14:1-35. Kaybat ing gabun a pengaku na karela yang tinggian,
uling ing pengaku na e da paniwalan.
25Kilub dang tolda bulung-bulung la,
at e la memintu king utus ning Ginu da.
26Inya sinumpa na king karin disyerto paten na la,
27 # Lev 26:33. at ikalat ding lahi ra layun isambulat karing aliwang bansa.
28 # Bilang 25:1-13. Karin king Peor sinamba la kang Baal,
at mengan la karing ain a miyabie karing dios a e naman mabie.
29King depat da ing Dios mimua ya,
inya ing pesti a makamate miras karela.
30Kanita i Fineas tinalakad ya at memilatan,
at ing pesti tinuknang.
31Uli ning depat na, liguran de ring kekaldan,
at e kalinguan king kapilan pa man.
32 # Bilang 20:2-13. Pepamua de ing Ginu karin king sibul ning Meriba,
at uli nita, pati i Moises midame ya.
33Pepasukal de ing pilubluban na,
inya bugasuk na lang sebianan.
34 # Ukum 2:1-3; 3:5, 6. E da la pete ding paganu
antimo ing inutus na karela ning Ginu.
35Ing depat da ya ing memakiasawa la karela at menugaling kalupa da.
36Sinuyu la naman karing karelang idolo,
at iti meging dalan ne ning karelang kasiran.
37 # 2 Ari 17:17. ly Pati anak dang lalaki at babai
karing idolo#106:37 King Hebreo: demonyu. na ning Canaan karin da la inain.
38 # Bilang 35:33. Pete da la't inain ding anak dang ala pang kamalayan,
inya ing lugal a ita king daya da karin ya midinatan.
39King depat da karelang dinatan ing sarili da,
at king Ginu meging taksil la.
40 # Ukum 2:14-18. Meragul ing mua na karela;
mesumami ya karing taung pinili na.
41Inya pepaburen na lang mipailalam king upaya da ring dayuan,
at ding sinakup karela ila ding kalaban.
42Ding kalaban inalipit da la,
at lubus lang mesakup king upaya da.
43Maralas na lang linigtas,
oneng ing lumaban king Ginu
ya ing mas buri da,
at lalu lang migbabad king pamikasala.
44Makanyan man pekibatan na la inyang minaus la,
at lunus karela binie na.
45Alang-alang karela, genaka ne itang kasunduan da;#106:45 O kaya: tipan.
uling tutu nong kaluguran, penupaya na la.
46Ginawa yang paralan
ban ding mekabihag karela lumunus la karela.
47 # 1 Cro 16:35, 36. Iligtas mu kami, O Ginung kekaming Dios,
ibat karing miyayaliwang bansa tipunan mu kami
ban ika ing kekeng pasalamatan,
at ing lagyu mung banal kekami yang purian.
48Ing Ginu, ing Dios ning Israel, ya ing purian;
purian ye ngeni at king kapilan pa man!
Amen ing dapat dang sabian ding sablang tau.
{Purian ya ing Ginu!}
Currently Selected:
Ding Dalit 106: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
