Ding Dalit 105
105
Ing Dios at ing Balen Na
(1 Cronica 16:8-22)
1O munie kayung kapasalamatan king Ginu;
maus kayu king lagyu na;
sablang keyang depatan
karing tau kekong sabian.
2Magkanta kayu para king Ginu, pagkanta yeng kapurian;
ibalita yu ing makapagmulala nang depatan.
3Tumula kayu uli ning banal nang lagyu;
bustan lang tumula ding sablang sasamba king Ginu!
4Panintunan ye ing Ginu at ing sikanan na;
ing pamagdulap king Ginu e yu sana kakalinguan.
5E yu la sana kakalinguan ding milagrung gewa ning Ginu,
at ding pisiag nang kayatulan,
6O lahi nang Abraham a talasuyu na,
O anak nang Jacob a pinili ning Ginu.
7Ing Ginu ya ing kekatamung Dios;
ding kautusan na para king mabilug a yatu la.
8E ne kakalinguan dit'man ing keyang kasunduan,
ing pangaku na karing libu-libung lahi.
9 # Gen 12:7; 17:8; Gen 26:3. Ing kasunduan a gewa na kang Abraham, ing pangaku na kang Isaac,
deti tuparan na la ngan.
10 # Gen 28:13. Ginawa yang kasunduan ing Ginu kang Jacob,
kasunduan a manatili kapilan man.
11Ngana, Keka ibie ke ing gabun ning Canaan
bilang mana a kekang pibandian.
12King panaun a ita tutu la pang ditak;
dayuan la ngan king Canaan.
13Karing miyayaliwang bansa at kayarian la miglipat-lipat.
14 # Gen 20:3-7. E na la pepaburen mayalipit kaninu man,
alang-alang karela ding ari belan na la.
15Ngana, Ding pinili ku e yu la nananan,
ding propeta ku e yu la panasakitan.
16 # Gen 41:53-57. Kaybat, peparatang nang danup
king lugal a ita, at sinira na ing sablang apangan da.
17 # Gen 37:28; 45:5. Oneng tinubud neng makauna karela i Jose;
anting ipus, pisali de.
18 # Gen 39:20—40:23. Tenikala da lang bitis na, at pati na ing batal na
19angga king ing amanu na meging tutu la;
ing pepatutu ya ing amanu ning Ginu.
20 # Gen 41:14. Kanita ing ari ning Ehipto pepabulus ne;
ing panginuan ding bansa gewa neng malaya,#105:20 O kaya: timawa ne.
21 # Gen 41:39-41. at penibalan ne king pibalebale na,
at talapangasiwa king sabla nang bandi.
22Dininan neng upayang sumakup karing opisyal na,
at ituru na lang kabiasnan ding mamuntukan na.
23 # Gen 46:6; Gen 47:11. Kaybat minta ya Ehipto#105:23 O kaya: Ham. ing Israel,
at karin ne migdatun.
24 # Exo 1:7-14. Peparakalan ne ning Dios ing balen na,
at pepasiknangan maygit karing karelang kalaban.
25Deti namang tau Ehipto peparatangan na la kasbu laban king balen na,
at karela pepalinlang ding talasuyu na.
26 # Exo 3:1—4:17. Kanita i Moises a talasuyu na tiburan ne,
at i Aaron a pinili na.
27Kapamilatan da pepakit na la ding makapagmulalang dapat na,
at aliwa pang mala ketang bansang ita.
28 # Exo 10:21-23. Peparala na ing dalumdum at meralumdum ya ing bansang Ehipto,
oneng selangsangan da ring tau Ehipto ing keyang amanu.
29 # Exo 7:17-21. Inalilan nang daya ing danum karing ilug da,
at ding asan mete la.
30 # Exo 8:1-6. Kaybat kinatmu yang tugak ing karelang bansa,
pati palasyu ning ari atin munaman.
31 # Exo 8:20-24; Exo 8:16, 17. Migsalita ya at ding lango ampon amuk linto la nukarin mang suluk.
32 # Exo 9:22-25. King lugal ning uran, uran-lipat ing pepagpa na,
at mikit ing duldul at kildap king bansang ita;
33sinira na lang mulahan dang ubas at tanaman a higera;
ding sablang tanaman pemakli na la.
34 # Exo 10:12-15. Migsalita ne naman at durun la ding dinatang;
king karakal da, e la malyaring bilangan.
35Gisan da ing sablang bulung a karelang disan,
at ing sablang atyu karing karelang asikan.
36 # Exo 12:29. Ding pangane rang lalaki king bansang ita pete na la,
ding sablang mumunang anak king balang pamilya.
37 # Exo 12:33-36. Kaybat tinaid neng linual ing Israel;
gintu at pilak karelang daralan.
Masikan la ngan at masalese pamikakatawan.
38Metula ya ing Ehipto king paglako ra,
uling kabang atyu la pitatakutan da la.
39 # Exo 13:21, 22. Selilungan na la king biga,
at dininan api ban munie sala neng bengi.
40 # Exo 16:2-15. Inyang miniawad lang pamangan ayup lang pugu ding binie na,
at dakal a tinapeng ibat banua.
41 # Exo 17:1-7; Bilang 20:2-13. Inaspak ne ing batung maragul, at linual ing dakal a danum;
sinibul at minagus ing danum anting ilug king disyertong ita.
42Genaka na ing banal a amanu na,
itang pangaku na kang Abraham a talasuyu na.
43Inya linual ne ing balen na;
ding taung pinili na magkanta la, at kukulisak la king tula da.
44 # Jos 11:16-23. At binie na karela ing gabun da ring bansa;
pati ing bunga ning kapagalan da miyabie karela
45ban kautusan na e da la kalinguan,
at ding utus na karela lang tuparan.
Purian ya ing Ginu!
Currently Selected:
Ding Dalit 105: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
