Ding Kasebian 30
30
Ding Amanu nang Agur
1Ila deti ring selita nang Agur a anak nang Jakeh ning Massa. Nganang migsalita kang Itiel at kang Ucal:#30:1 UCAL: E ya malino king Hebreo.
2E ku sukat meging tau uli ning kakung kamangmangan;
ing isip tau ala kaku.
3E ku mekapagaral king nanumang kabiasnan,
at ala kung beluan tungkul king Dios a Banal.
4Ninu na mo ing minukiat banua at kaybat kinuldas ya?
Ninu na mo ing mekasakmal king angin
o king lampin binalut na ing danum?
Ninu na ing mekabili karing angganan na ning yatu?
Ninu ya at nanu ya lagyu ing anak na?
Siguradung balu me.
5Patutuan na ning Dios ing balang sinabi na. Mengari yang kalasag karing sablang magtiwala king Dios. 6E mu daragdagan ing sinabi na ban e na ka paniabianan at ausan malaram.
Ding Aliwa pang Kasebian
7O Dios, aduang bage ing aduan ku keka at ibie mu la sa kaku bayu ku mu man mate: 8ilaut mu ku king pamaglaram at e mu ku gagawan masalapi ni e mu ku gagawan kalulu. Ing ibie mu kaku ya ita mung pamangan a kailangan ku. 9Malyaring kakung sabian ing e ra ka balu o e ra ka kailangan, nung sobra ing babie mu kaku. Malyaring manako ku, nung mamulubi ku at layun kang malapastangan, O kakung Dios.
10E me sisiran ing ipus king keyang panginuan. Malyaring isumpa na ka at iti kekang panamdaman.
11Ating taung paniumpa da la ring karelang tata at e biasang pasalamat karing karelang ima.
12Ating taung isipan da ing malinis la, oneng king kamatutuanan ala lang kalupa king karinatan.
13Ating taung mimisip king ila tune lang mayapala la kanung kalupa king kayapan, agpang king sarili dang kaisipan.
14Ating taung mapangamkam at mapagsamantala karing kalulu at karing atyu king kalipitan.
15Ating linta a ating aduang anak a babai at parehu dang sasabian, Dinan na.
Apat la ding bage a kapilan man e sasawa:
16ing kutkutan karing mete,#30:16 King Hebreo: Ing Sheol.
ing babaing e mikayanak,#30:16 Ing baug a palanakan.
ing malanging gabun a manayang uran,
at ing api a milalablab.
17Ing anak a pisunusunu ne i tata na o maninsultu at e mamintu kang ima na sukat ing kanan de ring ayup a buitre at mata na awak panuktukan da la.
18Ating apat a bage a tune makapagmulala kaku at e ku aintindian:
19 # Kab 5:10-12. ing agilang susulapo king banuang matas,
ing ubingan a gagapang king batung maragul,
ing barku a maglayag king malualas a dagat,
at ing lalaki ampon ing babaing mipalsinta.
20Oyni ing dapat na ning babaing taksil king asawa na: kaybat nang migtaksil mandilu#30:20 King Hebreo: mangan ya at pulisan ne ing asbuk na. ya at sabian na: Ala kung kasalanan a depat!
21Deting apat a bage naman galgal ya ing yatu at e no apibata:
22ing ipus a meging ari,
ing mangmang a e milalako kabiayan,
23ing babaing pikakasaman a mekapakiasawa,
at ing ipus a babaing menikua king lugal
ning babaing panginuan na.
24Ating apat a animal keti king yatu a tutung malati, oneng pekabiasa la karing sablang biasa:
25ding panas: ala lang sikanan,
oneng makatipun lang pamangan da
neng kaleldo;
26ding koneho:#30:26 King Inglis: badger. ala lang sikanan,
oneng makagawa lang lungga
karing maragul a batu;
27ding durun: ala lang ari,
oneng makaayus la neng susulapo la.
28ding lupisak: mipagyu ya
ing metung king kekang palad,
oneng king palasyu ning ari
karin la manuknangan.
29Ating apat a bage a makawiling lalawan neng lalakad la:
30ing leon, ing masikan dili
karing sablang animal;
e ya tatakut kenu man;
31ing tatyo a matikas, ing mabulas a kambing,
at ing ari a lalakad king akakit da
ring sasakupan na.
32Nung meging mangmang ka angga na ketang meging palalu ka o migtangkang dapat a e mayap, tuknang na ka. 33Sabulan mu ing gatas at manikua kang kesu. Tumbukan me arung#30:33 King Hebreo: apsalan yang arung. ing tau at dumaya ya, at nung parati kang mua gulu ing kararasan mu.
Currently Selected:
Ding Kasebian 30: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
