Hebreo 5

1Ing balang pekapun ding pari mapipili ya ibat karing kalupa nang tau at mitutulduan yang sumuyu king Dios para karela. Miyayain yang ain at sakripisyu para karing kasalanan. 2Anti na ning ya mismu ating yang miyayaliwang keinan, malyari yang makirame karing alang balu at karing mililisia king dalan. 3#Lev 9:7.Uli na ning ya mismu maina ya, kailangan ya naman miyain ain-sakripisyu e mu para karing kasalanan da ring tau nune para munaman karing sarili nang kasalanan. 4#Exo 28:1.Ing dangalan a maging pekapun ding pari e na malyaring kuanan ning ninuman king sarili nang kaburian. Ing Dios ya ing mamaus keya, antimo ing pangayaus nang Aaron.

5 # Dalit 2:7. Makanyan munaman, e na binie Cristo king sarili na ing dangalan a maging pekapun ding pari, nune tinggap na iti king Dios a sinabi,

Ika ing kakung Anak;

king aldong iti meging Ibpa mu ku.

6 # Dalit 110:4. Sasabian na naman ning aliwang dake ning Kasulatan,

Maging pari ka kapilan man

ketang panga-pari nang Melkisedek.

7 # Mt 26:36-46; Mc 14:32-42; Lc 22:39-46. King kekaban na ning bie na king yatu, miyain yang panalangin i Jesus at menigapu yang masikan at menangis arap ning Dios a makapagligtas king kamatayan na. Uli na ning migpakumbaba ya at memintu, pekiramdaman ne ning Dios. 8Agyamang ya ing Anak ning Dios, mebiasa yang memintu king kapamilatan na ning kasakitan na. 9At inyang meging ganap ne, ya ing meging panibatan ning alang anggang kaligtasan para karetang sablang mamintu keya. 10At peintulut na ning Dios ing gawan neng pekapun ding pari, agpang king panga-pari nang Melkisedek.

Ing Babala tungkul king Pamangalinguan

11Dakal ing malyari ming asabi tungkul king bage iti, oneng masakit ipalino kekayu uling e kayu bisang makiramdam. 12#1 Cor 3:2.Kailangan sana king panaun a iti ing talaturu na kayu, oneng angga man ngeni kailangan kayu pang ituru karing pasimula nang lisyun ning amanu na ning Dios. Kailangan king kasalukuyan agyu yu nang mangan masias, oneng angga ngeni gatas pa mu ing agyu yung inuman. 13Metung ya pang bingut ing mangabiayan king gatas, ala ya pang male tungkul king mayap at king e mayap. 14Oneng ing masias a pamangan para kareta yang atyu na king idad a sane na king pamangilala king mayap at king e mayap.

Currently Selected:

Hebreo 5: PmPV

Highlight

Copy

Compare