Hebreo 1

Migsalita Ya ing Dios king Kapamilatan na ning Anak Na

1Kanitang minuna, king dakal at miyayaliwang paralan, migsalita ya ing Dios karing kekatamung makatua king kapamilatan da ring propeta. 2#Kab 7:22.Oneng kareting tauling aldo, migsalita ya kekatamu king kapamilatan na ning Anak na. King kapamilatan na lelangan ne ning Dios ing meto sikluban#1:2 King Inglis: universe. at ing Anak ya ing tilduan nang talapagmana king sabla king kapupusan na ning panaun. 3#Kab 7:25, 26; 8:1.Ya ing maslag nang sala ning ligaya na ning Dios uling ganap neng kawangis king kadiosan na; ya ing magmantini king meto sikluban king kapamilatan na ning mayupaya nang amanu. Ngening alinis na na la ding tau king dinat na ning karelang kasalanan, linukluk ya king banda nang wanan ning Dios a Mayupayang tutu karin banua.

Maygit Ya ing Anak karing Sablang Anghel

4Nung makananung ing lagyung binie na ning Dios king Anak lalagpus yang e palak king lagyu da ring anghel, makanyan yang makapaygit e palak karela. 5#Dalit 2:7; 2 Sam 7:14; 1 Cro 17:13.E na bitasang sinabi ning Dios king kaninu man karing anghel,

Ika ing Anak ku;

king aldo iti meging Ibpa mu ku.

E na naman sinabi king ninumang anghel,

Aku ing maging Ibpa na,

at maging Anak ke.

6 # Deut 32:43. At inyang malapit na niang itubud ning Dios keti king yatu ing Anak nang pangane, sinabi na,

Sukat deng samban ding sablang

anghel ning Dios.

7 # Dalit 104:4. Tungkul naman karing anghel,

nganang sinabi ning Dios,

Papalyarian na lang angin

ding anghel na,

at aping milalablab ding talasuyu na.

8 # Dalit 45:6, 7. Oneng tungkul king Anak, nganang sinabi ning Dios,

Ing kekang tronu, O Dios,

manatili ya kapilan pa man!

Sumakup ka bilang Aring makatuliran.

9Kaluguran mu ing matulid,

at pikakasaman mu ing dewakan;

inya ing Dios a kekang Dios

pinili na ka

at dininan king tula ning dangalan a mimigit e palak kesa king binie na karing kekang kayabe.

10 # Dalit 102:25-27. Sinabi na naman,

Ika, Ginu, kanitang kapupurmeruan lelangan me ing yatu,

at karing mismung gamat mu

inubug me ing banua.

11Lumipas la ngan,

oneng manatili ka kapilan man;

maging laun la ngan anting imalan.

12Ituklip mu lang kalupa ning

balabal

at kalupa ning imalan,

panalilan mu la ngan.

Oneng ika manatili kang alang pangabayu,

uling ala kang kawakasan.

13 # Dalit 110:1. Kapilan man e na sinabi ning Dios kaninu man karing anghel na,

Lukluk ka king banda kung wanan,

anggang e ku la lubus apasukuan keka ding kekang kalaban.#1:13 King Griego: angga king e ku la agawang tumpakan da ring bitis mu ding kekang kalaban.

14 # Tob 12:14, 15. Nung makanyan, nanu la pin mo ding anghel? Pawa lang espiritung susuyu king Dios, at tutuburan nang sumaup karing sablang tanggap kaligtasan.

Currently Selected:

Hebreo 1: PmPV

Highlight

Copy

Compare