1 Cronica 27
27
Ing Kaayusan Militar at Civil
1Iti ya ing listahan da ring Israelitang pekapun da ring pamilya ra at manimuna da ring tribu a susuyu king kayarian. Adua lang pulu't apat a libung lalaki balang grupu ding susuyu balang bulan lalam nang pamanimuna ning metung a pekapun. 2I Jasobeam a anak nang Zabdiel, ya ing pekapun a mamahala king grupu a sumuyu king mumunang bulan. 3Lahi neng Perez na ning tribu nang Juda. 4I Dodai a lahi nang Ahohi, ya ing pekapun a mamahala king kaduang bulan. I Miklot ya ing kaduang pekapun. 5I Benaia a anak na ning paring i Jeoiada, ya ing pekapun a mamahala king katlung bulan. 6Ya ing manimuna ding Atlung Pulu. Ing anak nang i Amizabad ya ing meging kayalili na keting grupu. 7I Asael a kapatad nang Joab, ya ing pekapun a mamahala king kapat a bulan. Ing anak nang i Zebadia ya ing meging kayalili na. 8I Samhut a lahi nang Izar, ya ing pekapun a mamahala king kalimang bulan. 9I Ira a anak nang Ikes ning Tekoa, ya ing pekapun a mamahala king kanam a bulan. 10I Helez a lahi nang Efraim at tau Pelon, ya ing pekapun a mamahala king kapitung bulan. 11I Sibecai a tau Husa at lahi nang Zera ning tribu nang Juda, ya ing pekapun a mamahala king kawalung bulan. 12I Abiezer a tau Anatot sakup ning tribu nang Benjamin, ya ing pekapun a mamahala king kasiam a bulan. 13I Maharai a tau Netofa ning pamilya nang Zera, ya ing pekapun a mamahala king kapulung bulan. 14I Benaia a tau Piraton ning sakup ning tribu nang Efraim, ya ing pekapun a mamahala king kalabing metung a bulan. 15I Heldai a tau munaman Netofa at lahi nang Otniel, ya ing pekapun a mamahala king kalabing aduang bulan.
Ding Mamahala karing Tribu na ning Israel
16Ila deti ring mamahala karing tribu na ning Israel: i Eliezer a anak nang Zikri, ya ing mamahala king tribu nang Ruben; i Sefatia a anak nang Maaca, ya ing mamahala king tribu nang Simeon; 17i Hasabia a anak nang Kemuel, ya ing mamahala king tribu nang Levi; i Zadok, ya ing mamahala king tribu nang Aaron; 18i Elihu, ing metung karing kapatad nang David, ing mamahala king tribu nang Juda; i Omri a anak nang Mikael, ya ing mamahala king tribu nang Isacar; 19i Ismaia a anak nang Obadias, ya ing mamahala king tribu nang Zebulun; i Jeremot a anak nang Azriel, ya ing mamahala king tribu nang Neftali; 20i Hosea a anak nang Azazia, ya ing mamahala king tribu nang Efraim; i Joel a anak nang Pedaia, ya ing mamahala king tribu nang Manase dane Albugan; 21i Iddo a anak nang Zacarias, ya ing mamahala king tribu nang Manase dane Aslagan; i Jaasiel a anak nang Abner, ya ing mamahala king tribu nang Benjamin; 22at i Azarel a anak nang Jeroham, ya ing mamahala king tribu nang Dan.
23 # Gen 15:5; 22:17; 26:4. E na la pepalistang Aring David ding ala pang aduang pulung banua uling pengaku na ning Ginu ing parakalan na lang anti ding batuin king banua ding Israelita. 24#2 Sam 24:15; 1 Cro 21:1-14.Pegumpisan nang Joab a anak nang Zeruia ing pamagsensus king bilang da ring Israelita, oneng e na ayari, uling mimua ya ing Dios king Israel uli na niting pamagsensus. Iti ing sangkan nung inya ing bilang e misulat karing talaan na ning Aring David.
Ding Mamahala king Pibandian na ning Ari
25Iti ya ing listahan da ring mamahala king pibandian na ning ari: i Azmavet a anak nang Adiel, ya ing mamahala karing pibandian ning kayarian; i Jonatan a anak nang Uzzia, ya ing mamahala king pibandian karing probinsia, siudad, baryu, at tore; 26i Ezri a anak nang Kelub, ya ing mamahala karing magobra karing marangle; 27i Simei a tau Rama, ya ing mamahala karing mulahan ubas; i Zabdi a tau Sefam, ya ing mamahala karing kamalig alak; 28i Baal Hanan a tau Geder, ya ing mamahala karing tanaman a olibo at sikamoro karin king Sefela; i Joas, ya ing mamahala karing kamalig laru; 29i Sitrai a tau Sharon, ya ing mamahala karing kawan karing pipagpastulan ning Sharon; i Safat a anak nang Adlai, ya ing mamahala karing kawan karing lugal a kapatagan. 30I Obil a Ismaelita, ya ing mamahala karing kamelyu, at i Jedeia a tau Meronot, ya ing mamahala karing gaindung asno; i Jaziz a tau Hagar, ya ing mamahala karing tupa at kambing.
31Ila deti ring katiwala nang Aring David king pibandian na.
Ding Tapagayu nang David
32I Jonatan, ing kapatad nang tata nang David, biasa yang munie payu,#27:32 O kaya: usuk. aintindian no ding tau at tau yang matas a pegaralan. Ya at i Jehiel a anak nang Hakmoni ila ding mamahala king pamagaral da ring anak ning ari. 33I Ahitofel ya ing talausuk na ning ari, at i Husai a Arkiteo ya ing kakaluguran na ning ari. 34Ding menalili kang Ahitofel ila di Abiatar at Jeoiada a anak nang Benaia. I Joab ya naman ing pekapun da ring sablang sundalus na ning kayarian.
Currently Selected:
1 Cronica 27: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
