JAŊ 1
BMS
1
Boyna mbuɗ ki sana
1Hu jewra tin ayra ni Boyna kaa. Boyna ay ni eg Lona, Boyna ni Lona. 2Boyna ay fok jew ni eg Lona. 3Lona li tlen halaŋŋi u Boy mamma. Duk tlesuu nam lasina halaŋ va ma bay nam lam u Boy namma kaɗi. 4Iirira col ay ni hu Boy namma, iirira ɦal kiɗikka maŋ suuna. 5Kiɗikka weleɗ duk ndufunda, ndufunda ndak ka a tew egeɗɗi.
6San dew sunum ay ni Lona sem ana Jaŋ. 7Nam mbay ni a sa vovoɗta, ɓak ki kay kiɗikka. Nam mbay ni a suuna halaŋ vi u dlaam ndaɗta. 8Nammi ka kiɗikkaɗi, nammi sa vovoɗta vi kiɗikka. 9Boy namma ni kiɗikka gasira, mbay hu duliyara a li kiɗikka kay suuna bel.
10Boyna ay hu duliyara, Lona li tlena halaŋŋi u boy namma. Boy namma suu hu duliyara wam ka ana ni namuraɗi. 11Nam mbay duk suu mamsina asi vam kaɗi. 12Suu ɦiw vi umu, tin hurusi kamu, nam ɦasi saɓakŋa a asi ndak mbuɗ ki goryoŋ Lonna. 13Asi vuɗ ka ko suu warna vuɗ gorra naɗi, col ay ka eg saɗi lay ka u minda fi sa njufnaɗi lay, Lona vuɗusi ni namu.
14Boyna mbuɗ ki sana, kak dukuygiya, nam ka u oora u gasira coco may. Nammi goo ma dew ma ami wam bibiŋil mamba col ay vi Bumba. 15Jaŋ ma mbus batemma ɓak ki kam ana ni sa ma an dagi kam ana nam ka tuɗ ay ŋgoron dagani na, nam ki suy kanu, kayme nam ay ki fokon jew day.
16Aygi halaŋ fi tlesuu col ay komma ni u ɦiz mamba oora ha ŋgoo dagan na gak gak olo. 17Lona ɦaygi gaɗ mamba ay ni ko Moiz. Oora u gasira col ay ni hu Yesu Kristu may. 18Sa wi Lona kaɗi, gorom ma dew ma ka eg Bumma, nammi Lona may, takayna ki ni namu.
Vun sunda vi Jaŋ ma mbus batemma
(Matiye 3.1-12; Mark 1.1-8; Luk 3.1-18)
19Gola ni dikira vi Jaŋ ma mbus batemma hu li ma suu Juif suu Yerusalemma sun suu li ɓivunna, u suu Levina ay egemu joɓom ana, «Aŋŋi gege?» 20Nam tin vunum kaɗi, dasi ki jivi ana, «An ni ka Sa Lona Fuurummaɗi.» 21Asi hoŋom joɓpa ana, «Aŋŋi geɗaŋ ge? Aŋŋi Eli su?» Jaŋ dasi ana, «Ҥawaa, an ka nambi.» «Aŋŋi sa jok vun Lona su?» Nam hoŋosi dira ana, «Ҥawaa.» 22Asi hin dam ana, «Aŋŋi geɗaŋ ge? Aŋ hoŋomi dira aya, suu sunumi ayna ami hin dasi ki mayɗi su? Aŋ di kay taŋga ni ana mege?» 23Jaŋ dasi ana,
«An ni del sa ma sawalla ki
ŋgoo bagi ana,
Ɗoɓogi voɗta vi Bu Suunara kiyo,»
ko sa jok vun Lona Ezayi
di fok jewra na.
24Suu sunusi ay eg Jaŋŋa ni suu Farisenna. 25Asi joɓom ana, «Aŋ di ana, aŋ ka Sa Lona Fuurummaɗi may, ka Eliɗi may, ka sa jok vun Lonaɗi lay ni, aŋ mbus batemma ni kay mege?» 26Jaŋ dasi ana, «An mbusugi batemma ni u yona, dukugi ni sa maa dew agi ka wambi, 27nam mbay ni ŋgoron dagani, an ndak ka a mbuɗum zew tuɓuru ma semma kiɗi.»
28Dla ndaɗta li ni Betani fun mbo lumma Yurdan, ni hu li Jaŋ ma mbus batemma mbus suuna huna.
Yesu Goo Timiina vi Lona
29Faɗta vinda wanni, Jaŋ wi Yesu mbay egemu, nam di ana, «Gola ni Goo Timiina vi Lona ma daɓ cora vi suuna kina. 30Ni sa an ɓakagi kam ana nam ka tuɗ ay ŋgoron dagani, nam ki suy kanu, kayme nam ay ki ni fokon jew day. 31An wam ay ka fok jewɗi. An mba ni a mbus suuna u yona, a takam ki maŋ suu Israelna a asi wam may.»
32Jaŋ di olo ana, «An wi Musuk Lonara ko gugukka na sii ay kolo huulona kak kamu. 33Fok jew ni an ka wam ana ni sa hiŋŋa naɗi. Sa ma sunun ay ana an mbus batemma u yonana dan ana, Sa aŋ hin wam Musuk Lonara sii ay kamma hin mbusugi batemma u Musuk Lonara.» 34Jaŋ di ana, «An wi dla ndaɗta, nammi Goŋ Lonna.»
Suu haɗi suu vi Yesu suu fok jewna
35Faɗta vinda wanni Jaŋ ay hu li namma olo u suu haɗi mamma mba'. 36Nam wi Yesu jak tuɗta na ni, Jaŋ di ana, «Gola ni Goo Timiina vi Lona.» 37Suu haɗi suu vi Jaŋ suu mbana hum na ni, cuk tasi u Yesu gaw. 38Yesu pereɗ irim, wasi asi tuɗ um na ni, dasi ana, «Agi hal mege?» Asi dam ana, «Rabbi (ni ana, Mala Haɗta), aŋ kaki ni arage?» 39Nam dasi ana, «Mbaagi aya, agi hin wiya.» Asi hin tuɗa, wi lii nam kaki huna. Asi kak u nam hu buu namma. Ni faɗta ndak a boyogina col fun zuzura.
40Suu haɗina mba' suu hum boy ma vi Jaŋŋa tuɗ kay cee Yesuna, dukusi dew ni Andre wayaŋ Simon Piyerna. 41Andre ŋgaf u wayamma Simon fok jew, dam ana, «Ami fi Sa Lona Fuurumma ha wa, ni ana Kristu.» 42Andre tin Simon eg Yesu, Yesu golomu di ana, «Aŋŋi Simon, goŋ Jaŋŋa, seŋ mbuɗ ki ana Kefas (ni ana Ҥinira).»
Yesu yi Filip u Natanael
43Vin ɗaŋi, Yesu a tuɗ Galilera wanni, nam fi Filip, dam ana, «Tuɗ ay unu.» 44Filip ni sa Betsaidana, ni hu zi ma vi Andre u Piyerna. 45Ŋgoo daganda Filip ŋgaf u Natanael dam ana, «Sa Moiz u suu jok vun Lona di kamma ami fam wa. Ni Yesu goŋ Yosef ma Nazaretna.» 46Natanael dam ana, «Va ma jivina col ay ki Nazaret na ɗow su?» Filip dam ana, «Mbay gola.»
47Yesu wi Natanael mbay egem na ni, nam di kam ana, «Gola ni sa Israel ma gasina ma mbambara ka hurumbina.» 48Natanael joɓom ana, «Aŋ wan ay ni arage?» Yesu hoŋom dira ana, «An waŋŋi kaki u ŋgus tulumma bay Filip yaŋ tuwa.» 49Natanael dam ana, «Mala Haɗta, aŋŋi Goŋ Lonna, Mulna vi suu Israelna.» 50Yesu hoŋom dira ana, «Aŋ tin huruŋ kan ni kayra an daŋ ana, an waŋ ay u ŋgus tulummara. Aŋ hin wi dlara jivira ŋgol sura wanda.» 51Nam di olo ana, «An dagi ni gasira, agi hin wi huulona ki maliya, agi hin wi suu sunda huulona tuɗ koloo, hoŋ ay kaŋga kay Goŋ Sanna.»

© 2002 Alliance Biblique du Tchad

Learn More About Boy Lonana