RUT 3
3
Rut buu ga u sem Booz
1Hu buu maa dew ni Noomi di caaɗta ana, «A jivira ni an halak njuf ma jivina ma ndak hin a kak hu zina jivina may. 2Booz ma ha hu senena u suu mam suu li sunda wanna ni sa ma hu njafami ma tami jona dewna. Nam buu ha ni ŋgoo bagi hu li ma to wana. 3Col kolo, li mbul ma hisna taku, cuk baraw mak ma ŋgolna tuɗ ŋgoo hu maɗakŋa. Na may ndak tuɗ ŋgay tak kiyo, tak tak ki irimbi, juɓ ta ta nam ti funa ki tu may, ci ki tu may. 4Hu li ma nam tuɗ buu gana, ndak hin wi li ma nam mba buu huna. Ndak tuɗ ha tuɗ buu ga u kewet semu. Nam hin takak dla mayra ndak hin a laɗta.» 5Rut hoŋoɗ dira ana, «An hin li dla mayra ndak danda wanda halaŋ.»
6Ndaɗ hin tuɗ ga hu maɗakŋa, li ni ko ndal kunuɗta daɗ hara na may. 7Booz tiya, ci lay, hurum mbuɗ furiya, nam mba buu eg li ma wana moli huna na tok, ndaɗ kuɗuk ay mba buu ga u kewet semu. 8Ca duk ŋgikka ɗaŋŋi, Booz mbuɗ ndaana mbusuk tamu, gola ni cara buuri ga u gayamu. 9Booz joɓoɗ ana, «Ca ndaɗta ni gege?» Ndaɗ hoŋom dira ana, «Ni an caaŋga sunuŋga, Rut. Ɗum caaŋga sunda, kay aŋŋi sa ma a yow jo njufunna daŋ may.» 10Booz hoŋoɗ dira ana, «Yawe paɗ vunum ki kaku, goonda, cemi olo ndak tak ɗegee makka ki wa, ni u furira coco sura jewra olo. Ndak tuɗ ka hu li ma hal njufii suu dadambi, tuɗ ka a hal sa ma hawɗi lay ma ɦiziɗi lay. 11Cemi ni an daku, goonda, li ndaa oloɗi. Dlara ndak dandara an hin laɗu. Kay suuna tani halaŋ wi ki ana ndakŋi cara ɗilira dlaakka jivi cocoo. 12Gasi daŋ may anni sa ma ti jona u njufuk dewna, may ni sa ma egem peɗet suunna kaa.#Rut 2.20 13Ndak buu gaa fo maɗiira ki tuwa, lini nam ɗumuk wa ni jivi may, lini nam ka minɗi ni an hin vak may. Yawe ka dukuya ndak buura fo maɗiira ki tuwa.»
14Ndaɗ buu ga u sem juɓ ta ta maɗiiya. Ndaɗ col ki kolo ni ŋgarapiira sa ka wi tam tuɗi «Kay ka sa wi ana ca ndaɗta buu hani eg maɗakŋaraɗi.» 15Nam daɗ ana, «Ҥal vaak ma ay kakŋa aya,» Ndaɗ ɦamma, nam yowoɗ wana kaɗ huwa, nam tamba hin tuɗ ki vo hu zina may. 16Rut hoŋ ay vo eg kunuɗta, ndaɗ joɓoɗ ana, «Dlaakka li ay ni ana mege?» Rut cuɗuɗ dlara li ayra u jivira sa namma laɗta ay egeɗta halaŋ. 17Ndaɗ di ana, «Nam ɦan wana ay kan wanni di ana ka ndak hoŋ vi kunukka u kok ma vadlnaɗi.» 18Noomi di ana, «Goonda kak na en juɓ dlara hin lira, wi u boy namma ki u takka tuwa, an wi ana, Booz ka hin a juɓbi, nam hin daɓ dla ndaɗta ki ni ii faɗta karamba gaw.»
Bible Moussey © Bible Society of Chad, 2002.