RUT 2
2
Rut cil ɦelena hu sene ma vi Boozna
1Noomi, sana ka dew hu deera vi njufuɗta, sa namma ɦizi cocoo, nammi hu deera vi Elimelek sem ana Booz. 2Rut, goora Moabba, di Noomi ana, «An min tuɗ ŋgoo hu senena tuɗ cil ɦelena, lini an fi sa ma wan hahawan kalage.» Ndaɗ hoŋoɗ dira ana, «Tuɗa, goonda.»#Lev. 19.9-10; Gaɗ. 24.19 3Ndaɗ tuɗ may, goɓ a cil ɦelena u suu ka feɗ wana ŋgoo bagina. Taɗ ndi jivira hoŋŋi hu sene ma vi Boozna ni sa ma hu deera vi Elimelekka gaw may. 4Booz ay vo Betlehem hin mbay may. Nam di suu li sunda hu senena ana, «Yawe li u agiya.» Asi hoŋom dira ana, «Yawe paɗ vunum ki kaŋ may.» 5Booz hin di sa ŋgol mamma fok suu li sundana ana, «Goo ca ndaɗta ni caŋ gege?» 6Nam hoŋom dira ana, «Goo cara ni goora Moabba, ni ta mbay ko taɗ u Noomira. 7Ndaɗ di ana, An min a cil ɦelena ugi tani. Ndaɗ mbay tani ni maɗii day ta ta cemi bay tuɗ vo a koɗ taɗ tuwa.» 8Booz di Rut ana, «Ndak hum ha su, goonda? Tuɗ a cil ɦele hu sene ma daŋ oloɗi, tin yak ki day eg sene ma wanna oloɗi, olo ndak mba taɓ tak u suu vo varanna dew. 9Sene ma asi feɗem wanna ndak hinim kiɗi, tuɗ kay ceresiya. An doo gorzoŋina kiyo, ka sa ŋgenekgi. Lini laara caku ni ndak tuɗ ci yona ay hu gegelna tana u yo ma asi goom ayna.» 10Ndaɗ goɓ ga fokom di ana, «Aŋ lan oora kan an cara sa ka wan taniɗi layra na ni kay mege?» 11Booz daɗ ana, «Asi cuɗun dlara ndak laɗta ki halaŋ, dlara ndak laɗ ay eg kunukka hu li ma njufuk miɗ kina, ndak noy somoyok ki halaŋ, suk u buku hin mbas makka ndak vuɗ hura kiyo, tuɗ ki hu li ma ndak wam ka jew dewɗina. 12Ko Yawe hak warakŋa kay dlara ndak laɗ wanda. Ko warak makŋa halaŋ col ay ni ko Yawe, Lona vi suu Israelna, ma ndak mba hal li ma ŋgayra egemma.» 13Ndaɗ hoŋ di ana, «Hinin an mbuɗ iriŋ hahawi, kay aŋ ɗilin irin wa, aŋ njaɗ boy ma heɓ huu caaŋga sunda wa. Na lay ni an ka ndak a mbuɗ ko caaŋga sunuŋga naɗi lay.»
14Ŋgoo dagan hu li ma ti funa ni Booz daɗ ana, «Ҥuɗ tak ay tani mbay ti funa, do fuukŋa ha duk mbalara may.» Ndaɗ kak eg suu sunda. Nam ɦaɗ fu ma cufina, ndaɗ ti funa hoɓ lay, um hin ki koɗ lay. 15Ŋgoo dagan ndaɗ col kolo a cil ɦelena. Booz di suu sun mamsina ana, «Lini ndaɗ mba cil ɦelena egegi tani lay ni agi doroɗɗi, hiniɗu. 16Hu li ma agi feɗ wana ni hinim ha ki gaa, ndaɗ mba varammi agi doroɗɗi.»
Noomi sun Rut a ndaɗ tuɗ cil ɦelena vi Booz
17Ndaɗ cil ɦelena hu senena ta ta tew fiɗigiya. Ndaɗ to ma ndaɗ cilimma ki toni, oy mbu mbu maɗna kaɗu. 18Ndaɗ tlam kaɗu, tuɗ vo hu zina, kunuɗta wi wa ma ndaɗ cilim ayna na ni, u fu ma hin ay ki koɗna ndaɗ ɦaɗna may. 19Kunuɗta daɗ ana, «Ndak cil ɦele namma ay ni ara gage? Ndak li sunda ay ni arage? Gi deɓ maŋ sa ma vak ay hu sene mammana.» Ndaɗ hin cuɗ dla sunda ndaɗ laɗ ayra maŋ kunuɗta di ana, «Sa ma an li sunda ay varam karamma sem ana Booz.» 20Noomi hin di caaɗta ana, «Gi deɓ Yawe nammi sa ma ka hin ɗegee mamba kiɗina, eg suu miɗina lay eg suu iirina lay.»#Lev. 25.25
Noomi hin di ana, «Sa namma egey ni na tok daŋŋi sa ma ti jona dew u amina.» 21Rut ta goora Moabba di ana, «Nam dan ana, an taɓ u suu li sunda varamma gak gak daɓ sunda ki u asiya.» 22Noomi hin di Rut ana, «Ni jiviya, goonda, ndak tuɗ u asi hu li sunda, ka hin sa a tuɗuk ki hu sene ma daŋgi.» 23Ndaɗ taɓ u suu vi Boozna a li sunda, cil ɦelena u asi gak gak asi daɓ senena kiyo, hin jak a feɗ wa blena u tasi olo. Ndaɗ kak u kunuɗta gak gak may.
Currently Selected:
RUT 2: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.