ROMMA 2

Ɓak ma Lona kaamma

1Aŋ sa ma kaɓakŋa kay suuna, vunuŋ hin vaŋ may. Hu li ma aŋ kaɓakŋa kay suuna, aŋ li ko asi na lay, ni aŋ kaammi kay taŋga tok. 2Aygi wi ana Lona kaɓakŋa u gasira kay suu li cora ko ndaɗta na na. 3Aŋ saa ana aŋ hin suɗ ki ko ɓak ma vi Lonana su? Aŋ sa ma kaɓakŋa kay suu li cora aŋ taŋga hin li ko asi na may su? 4Aŋ pan jivira ŋgolla vi Lonara u ɗigilla, u lalam mamba, ni pani su? Aŋ ka wi ana jivi Lonara hal a mbuɗuŋ iiri maŋga zeɗ ni ndaɗu naɗi su? 5Aŋ sa ma huruŋ cona ka min a jok huruŋ zeɗɗi, ni kay ndaɗta aŋ tok ɓak ma ŋgolna kaŋ wa, falira Lona hin a kaɓak mamma ɗegeena. 6Nam hin warak suuna ni u sun masira. 7Nam hin ɦal iirira ka daɓ kiɗira maŋ suu li jivina, asi suu hal ŋgolla u geleɗta u iirira bay miɗna. 8Nam hin tak yaamba ki u hurum ma ɓeŋina eg suu hurusi gonokka egemma, u suu ka hum u gasiraɗina hoŋ hum u dlara ka u voɗoɗɗira ɗowna. 9Wihawra u lassa hin mba kay suu li cora halaŋ, gijaŋŋa ay u suu Juifna hin mba kay suu daŋŋa. 10Ni nam Lona hin ɦal ŋgolla u geleɗta u heɓpa maŋ suu li jivina halaŋ, gijaŋŋa u suu Juifna hin mba kay suu daŋŋa. 11Lona ka ɓorow ii suuna zeɗ zeɗɗi.

12Suu li cora ka wi u gaɗta vi Moizza ɗina, hin ba ki kay bay gaɗ ndaɗta may, suu li cora wi gaɗta ndaɗtana asi mba fi ɓakŋa u gaɗta ndaɗta may. 13Suu jivi ii Lonna ni ka suu hum u gaɗta ɦawaɗi, ni suu li u va ma gaɗta damma. 14Lini suu daŋ suu ka wi gaɗta vi suu Juifnaɗina, asi tasira li hum u gaɗta ni asi gaɗ masira kay tasira kaa, lini masi ta ay kaɗi lay. 15Dlaasira asi laɗta ko ndal gaɗta ka dasira na ka ɓiiri hurusiya, yal masina u saa masira ka takasi na, buu mari ni ana asi li coo, buu mari ni suɗusi ki may. 16Ni va ma Lona hin kaɓakŋa kay suuna u Yesu Kristu u tlesuu ŋgay huu suuna halaŋ ko Boy ma Ayra ma an ka dam wanna dira na.

Suu Juifna u gaɗta

17Aŋ sa ma di ana aŋŋi sa ma Juifna aŋ coli eŋga kay gaɗta, ka li zolo kay Looŋŋaɗi. 18Aŋ wi minda vi Lona gaɗta gaɗaŋ ana aŋ man va ma jivina. 19Aŋ vi kaŋ a sa ma tak voɗta maŋ suu dugina a kiɗikka vi suu ka hu ndufundana. 20Aŋŋi sa ma haɗ suu ka wi vaɗina sa ma haɗ kemba. Kay mege, aŋ wi ana gaɗ magira tak ki wira u gasira pasiyakka. 21Aŋ sa ma haɗ suuna ka haɗ taŋ maŋgi su? Aŋ sa ma di ana sa kulɗina aŋ hin kul ni nanage? 22Aŋ sa ma di ana li zoŋgina aŋ hin li zoŋga ni nanage? Aŋ sa ma ŋgul fulina aŋ hin yow tlesuu hu ziisina su? 23Aŋ sa ma ŋga taŋ kay gaɗtana, aŋ hin ɓeŋ sem Lona li u va ma gaɗ mamba dinaɗi daŋ olo su? 24Kay ndaɗta ɓiira diya, «Agi suu Juifna njaf suu daŋŋa ŋgul Lona ni ugiya.»

25Lini aŋ hum u gaɗta ni caw ɗiwra li kaŋ jivi may, lini aŋ ka hum u gaɗtaɗi ni, ko aŋ caw ɗiw kaɗira na. 26Lini sa ma caw ɗiwim kaɗina hum u gaɗta ni, Lona hin ŋgaam ko sa ma ɗiwim cawina naɗi su? 27Sa ma caw ɗiwim kaɗina lini nam hum u gaɗta ni, nam hin kaaŋ ɓakŋa kaŋ aŋ sa ma ka u caw ɗiwra, wi gaɗta lay, ka li uɗɗina ɗi su? 28Sa ma Juifna ma gasina ni ka sa ma tak tam ii suuna u caw ɗiwra ɦawaɗi. Ni va sa wam eg mbalata sana ɦawaɗi. 29Sa ma Juif ma gasina ni hurum kurufuwa, wi ana nam ɗiwim cawiya ni hurum voo, caw ɗiwra gasira ni u minda vi Musuk Lonara ka u gaɗta ɓiiriraɗi. Sa ma Juif ma gasina fi geleɗ mamba ni ka ko suunaɗi, ni ko Lona.

Currently Selected:

ROMMA 2: BMS

Highlight

Copy