VUN ŊGOLNA 7
7
Yira kay nera
1Goonna, aŋ van boy manna koŋ jiviya,
ŋgayan gaɗ manda huruŋ kurufu ko ndal begera na lay.
2Lini aŋ min a kak iiriya ni li u gaɗ manda,
golon haɗ manda ni ko wal wal iriŋga dukka na.
3Njunuɗ ki kay gogor koŋu,
ɓiiriɗ ki hu huruŋ ma kurufuna.
4Ɓak taŋ u wi dlara ana, «Ndakŋi wayanda.»
Joɓ nera, ndaɗ li somora u aŋu.
5Ni hin suɗuŋ ki ko caŋ ndaraŋŋara,
u cara koyra ta vunuɗ njaɗ jivi cocora.
Cara dalamba ɓalak goozoŋŋa kiyo
6Buu maa dew ni an ay coli kalafi hu ziinda,
an gol ay kiɗik ii zira na,
7an wi gorzoŋŋii suu ka wi dla tuɗina,
an wi goozoŋ maa dukusi dew ni ka wi va na ndeɗi.
8Nam ka tuɗ hu voɗta jak eg ziŋ carana na tok,
nam tli kommi voɗta tuɗ varaɗta,
9ni faɗta hin tok a ɗikka may,
hu li ma njeŋgera mbana,
lin mbuɗ ki ndufunda may.
10Gola ni cara kal ay ki ŋgafam vogom may,
cuk barawna ko ndal gawlaŋga na,
mbeleŋŋa huruɗ cocoo,
11ndaɗ ni cara ɦay ɦayra,
ka kak ga hu ziiɗ na enɗi lay,
tuɗ ki ni na cow cow.
12Poy hu voɗta, tuɗ ni u sukŋa,
ndaɗ hal ni li ma koyra na dew.
13Gola ni ndaɗ ŋgafam wa,
vam u furira u ŋgaf vunna,
njaɗam u della jivira ana,
14«An vi vunun u Lona ana
an min a lam ɓivun ma gi deɓpa.
Cemi ni an li ɓivun namma may.
15Kay ndaɗta an kal ay ki a ŋgafaŋ vogoŋŋi na,
an min a waŋu, cemi an faŋ wa.
16An min layna ha ki baaram baraw ma tam ndali kolo kolona ha ki kamu,
baraw dlemba col ay Egipte dayra,
17an yamam mir mbul ma his jivina ha ki kam lay,
alowe u gi kanella.
18Mbaya furuyuy u zoŋ mayra ta ta madiya,
lay zoŋ mayra ko huruy minda na.
19Njufun ka voɗi,
nam tuɗ ni koyra dayra,
20nam yow gursura kam cocoo,
hin mbay vo ni tilna col ki duk haɓpa tuwa.»
21Hu boy maɗ ma ganyamba namma ndaɗ vi goozoŋŋa wa,
ndaɗ ɗuɗum u boy ma jivi namma.
22Nam gi tam uɗ ni na zak gaw,
ko ndal mbutl ma suuna vam
a tuɗum hu li ma ŋgaɗta ɦawa na.
Nam kal tam duk poŋga ii laɓara,
sem u kom njuni halaŋ.
23Ta ta nam fi mbilina egem cocoo,
ko ndal layagi suu tuɗ vi ki hu baynara na.
Nam ka wi ana iiri mamba ni tok fun maɗnaraɗi lay.
24Cemi ni aŋ, goonna, humun vunun haa,
tin saa maŋga ni kay boy manna.
25Hin taŋ a cara ko ndaɗta na ganaŋ yaŋgi,
hin voɗ maŋga jivira ki a tuɗ uɗɗi.
26Kay ndaɗ dak suuna, ɓalakasi ki cocoo,
suu saɓak cocona lay puk ki ga uɗu.
27Tuɗ varaɗ ni ko ndal aŋ tuɗ
ni vi suu miɗinara na.
Kalaŋŋi hu li ma ndufunna
hu lina vi suu miɗina.
Bible Moussey © Bible Society of Chad, 2002.