VUN ŊGOLNA 26
26
Dlara kay suu laɓana
1Ko ndal dlammagi ma gi hu til zamalla na,
ko lo ma paɗ hu til ma feɗ tlena vona na may,
ŋgolla vi sa ma laɓana ka ni ko ndaɗta na.
2Ko ndal layɦiira u dlemerekka pii ka kak kaŋgaɗira na,
givun ma sana gam bay umma jak ki ni ko ndaɗta na may.
3Njewɗekka laɗ ni kay korra, njamara ni kay kulumina may,
tokolora ni a waɗ sa ma laɓana may.#Soo. 32.9-10; Vun 10.13
4Hoŋ dira maŋ sa ma laɓana kay laɓa mambaɗi,
kay ka aŋ hin mbuɗ ki ko nam na mayɗira.
5Hoŋ dira maŋ sa ma laɓana ni u laɓa mamba,
kay ka nam gol tam ko sa ma wi dlara naɗi.
6Sa ma gi sa ma laɓana vun sundana ni
ko ndal nam ka sem ki u tambara na.
Nam mbaa kammi vunna ɦawaa.
7Sem sa ma dalira ka tuɗ kaŋga jiviɗi.
Boy ma kal ay ki fun sa ma laɓana tuɗ ki cora ni ko ndaɗta na may.
8Sa ma ŋga sa laɓana ni ko ndal sa ma njun gogoyra ki kaŋga
hu gewrek gewrekkana na.
9Ko gu ma siina ay ko sa ma gurɗi u summana na.
Vun ŋgol ma kal ay ki fun sa ma laɓana ni na may.
10Sa ma mun mbuurura ndaɗ vi ni gegelay ma ndaɗ minna.
Sa ma vi sa ma laɓana ɗowba sa ma jak voɗ tuɗta ɦawana ni ko ndaɗtana may.
11Ko ndal dina hoŋ ti vinim ta nam viniɗ kira na,
sa ma laɓana hoŋ hu laɓa mamba ni na may.
12Aŋ wi sa ma so hurum kay wiimba doy hol ka vi dlaŋ saɗina,
sa namma sa ma laɓana ni mariyaɗ suumu.
Boyna kay sa ma zolomba
13Sa ma zolomba di ana, «Vabakŋa ka bunsuwa,
dlona ka ki buuri hu voɗta.»
14Cokoromma mal ni hu li ma nam gii huna na gaga,
sa ma zolomba mbusuk kay lay mamma ni na may.
15Sa ma zolomba kal kom hu ŋgoɗta a mbuluk funa,
may a mbaaram ay kolo funumba ni loɓ cocoo.
16Sa ma zolomba gol tammi ana nam wi dla cocoo
su suu may suu wi dlara goy kiɗisiyana.
Vun ŋgol ma daŋŋa
17Sa ma tli tam hu dla mayra ndolom kaɗira ni
ko ndal sana vi dina u humumba na.
18Ni ko ndal sa ma laɓana ŋguf kura ay kamu,
mun mbuurura, fi maɗna,
19sa ma ganyam ndaram zina hin di ana,
«An mbaɗaŋŋi mbaɗi ɦawana» ni ko ndaɗta na may.
20Hu li ma gu ka oloɗina kura tew kiyo.
Hu li ma sa ma ŋgeŋŋa ka oloɗina ni ɦonira seŋ kaŋga may.
21Kimilna ŋgitlik kura, guna vi kura ki kolo may,
sa ma ŋgeŋŋa tum yara kolo ni ko ndaɗta na may.
22Boy ma vi sa ma ŋgeŋŋa ni ko ti ma jivina na,
nam tuɗ ni ta ta kaŋga u digiriŋu.
23Ko kawina ka taɓ ko tam u luɓunaɗi,
boy cona u dlara ti huuna ni na may.
24Sa ma gonokka jiv tam ki u vunumu,
hurum kurufu ni dlara ganyamba may.
25Lini nam ka di dlara jivira lay ni, caa yaŋ kaɗi,
saara cora ŋgay ga u cocoo.
26Yaamba ndak a baa ki ga duk boy ma nam damma.
May duk suuna hu tokka ni ndaɗ hin tak ki kiɗiki.
27Sa ma vek zulla hoŋ ndi hu zul ndaɗta tok,
sa ma lagaɗ ɦinira, ɦini ndaɗta hoŋ ndi ay ni kam tok.
28Ɓeŋ huu sana u boy cona ni ka wam iiɗira,
di boy ma ganyamba ni ɓalakka mba ni ndaɗu.
Bible Moussey © Bible Society of Chad, 2002.