NDUMBA 10
10
Tokolom doonora mba'
1Yawe ɓak u Moiz dam ana, 2«Dli tokolom doonora na mba', aŋ dlasini ɗaasi ki jiviya. Tokolom namma hin njun uŋ a yi suuna hu li ma agi a mbee kina. 3Hu li ma asi bu tokolomma wa ni suuna halaŋ tok ay egeŋ fun Mbutluɓ ma Tokkana. 4Lini sana bu ni tokolom ma dewna ni tok ay ni suu ŋgolo suu tini fok suu Israelnana doy hol. 5Tokolomma bu wa ko ma duuna na ni suu ziisi vii u maɗiina nana cuk tasi jew ni asiya. 6Lini tokolomma ɦoŋ bu wa a yamba mbara ni suu cuki dali nana cuk tasi ni asi may. Asi buusi tokolom ma duuna a asi cuk tasi tuɗtara may. 7Na may a bu tokolom ma tok suuna ayna ni buum ha ni na gak gak, ka ko bu tokolom ma duuna naɗi. 8Suu bu tokolom namma ni muli suu li ɓivunna, goryoŋ Aaronna. Gaɗ ndaɗta hin ha dukugi ni a fafaɗta kagi lay kay goryogi suu ka ŋgorogina lay. 9Hu li ma agi tew ki hu mbas magira wa lini suu babali magisina mba halagiya, agi a tuɗ duu u asira ni yi tora duuna, buugi tokolomma may. Ni, an Yawe humun hin gan ay kagiya agi hin suɗ ki ko suu babali magisina. 10Hu buu ma agi a li furira ko ndal luu ma vun tilna na, ɗowba luu ma daŋŋa, buugi tokolomma hu li ma agi a li ɓivun ma ŋgalam kina u ɓivun ma mbaa heɓpana. Ni, an humun hin gan kagiya. Anni Lona, Yawe magina.»
SUU VI ISRAELNA HIN SINAY KIYO, TU Ɗ II HAKARA MOABPA
Suu Israelna hin mbassa Sinayra
11Hu basara mbara dagan basara suu Israelna cuk ay ki hu mbassa Egiptera, hu til ma mbana, hu buu ma dok-mbana ni ɗugulla ka ki kay Zira Galamba vi Lonara. 12Suu Israelna yow ay ŋgoo bagi hu mbassa Sinayra gegelay tuɗ ni u deeresiya deeresiya ko gaɗta dira na. Ɗugulla tuɗ col fokosi ŋgoo bagi hu mbassa Paranda. 13Ni a sesi ma jewna suu Israelna jok usira, ni u gaɗta Yawe ɦasira ay fun Moizza. 14Suu cuk tasi fok jewna ni njaf suu vi Yudana u suu duu masisina. Suu duu suu vi Yudana sa ŋgol ma fokosina ni Nason ma goŋ Aminadabma, 15suu duu suu hu njaf ma vi Isakarna sa ma ŋgol ma fokosina ni Nataneyel ma goŋ Suwarna, 16suu duu suu hu njaf Zabulonna sa ma ŋgol ma fokosina ni Eliyab ma goŋ Helonna. 17Asi hawaɗ Ziŋ Lonara ki hawaɗ ni suu zii gu zi ndaɗtana ni goryoŋ Gersonna u goryoŋ Merarina, asi yow Ziŋ Lonara kasi ni asiya.
18Suu hu njaf Rubenna cuk tasi u suu duu masisina, sa ŋgol ma fokosina ni Elissur ma goŋ Sedeurna. 19Suu duu suu hu njaf Simeonna sa ŋgol ma fokosina ni Selumiyel ma goŋ Surisadayna. 20Suu duu suu hu njaf ma vi Gadna sa ŋgol ma fokosina ni Eliyasaf ma goŋ Dewelna. 21Ŋgoo dagan suu vi Kehatna cuk tasiya, asi ni suu zii li ma teteɗna. Suu hiŋŋa pi Ziŋ Lonara ha ki jew bay asi fasi tu gaw. 22Ŋgoo dagan suu hu njaf Efrayimma cuk tasi u suu duu masisina, sa ŋgol ma fokosina ni Elisama ma goŋ Amihudna. 23Suu duu suu hu njaf ma vi Manasena, sa ŋgol ma fokosina ni Gamaliyel ma goŋ Pedasurna. 24Suu duu suu hu njaf ma vi Benjaminna sa ma ŋgol fokosina ni Abidan ma goŋ Gidonina. 25Suu daɓ ha ŋgorosi daganna ni njaf suu vi Danna u suu duu masisina, sa ŋgol ma fokosina ni Ahiyezer ma goŋ Amisadayna. 26Suu duu suu hu njaf Aserna sa ŋgol ma fokosina ni Pagiyel ma goŋ Okranna. 27Suu duu suu hu njaf Neftalina sa ŋgol ma fokosina ni Ahira ma goŋ Enanna. 28Suu Israelna tuɗ u suu duu masisina ni u gaɗta dasi ana asi li nara, asi tuɗ ni na.
Moiz hal sa ma tuɗ fok suunana
29Moiz di tanamma Hobab, ma goŋ Rewelna, ma kunum ma Madiyanna ana «Ami tuɗ hu mbassa Yawe vi vunum kaɗ a ɦamirara, aŋ tuɗ ay umiya, ami min ɦaŋ jivi mayra Yawe vi vunum kaɗ a ɦaɗ maŋ suu Israelnara.» 30Hobab hoŋom dira ana, «An ka tuɗɗi, an hoŋŋi hu mbas manda duk somoyon na ɗow.» 31Moiz hoŋ dam ana, «Noyomi kiɗi, aŋŋi sa ma wi li ma ami a cuk ŋgoo bagi huna, aŋ li ni a sa ma takami voɗta. 32Lini aŋ tuɗ ay u ami wa ni jivira Yawe min a ɦamirara ni ami hin laŋ jivira may.»
33Asi yow ha u ɦinira vi Yawera, tuɗ ta ta buuna hindi, Zandukka Galamba vi Yawera ka tuɗ fokosi hu buu ma hindi namma may, a takasi li ma asi hin vi ziisi huna. 34Faali ni ɗugulla vi Yawera kuluɓ ki ŋgusna kasiya, ni hu li ma asi yow ha hin liisi ka kina gaw.
35Hu li ma Zandukka ka tuɗ na ni Moiz di ana, «Col koloo, Yawe, suu babali maŋsina hin njay kiyo, suu gonok maŋsina yow liŋŋa fokoŋu.»#Soo. 68.2 36Hu li ma asi tin Zandukka ga wa ni Moiz di ana, «Yawe hoŋ ay duk suu maŋ suu Israel suu ka ndumɓina.»
Currently Selected:
NDUMBA 10: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
