MARK 3

Yesu garaɗ sa kom miɗina kiyo

(Matiye 12.9-14; Luk 6.6-11)

1Yesu kal hu Zira Tokka olo. Sa kom ki miɗina huwa. 2Suu molina irisi tini kam na ta, golomu, ana nam hin garaɗ karam sa namma ki hu buu ma vi Lonna kalage. Nam liwa na ni, asi hin tinim dlara kamu. 3Nam Yesu di maŋ sa kom miɗina ana, «Col kolo fok suuna halaŋ.» 4Yesu joɓ suu golom ayna ana, «Gaɗ mayra di ana mege? Li jivira eg sana hu buu ma vi Lonna ɗowba lam cora egemba su? Suɗ sana kiyora ɗowba cam ki ci su?» Asi seŋ tasi na yerek yerek. 5Yesu wasi na ni, hurum ɓeŋ ki gaw. Hurum haɗ kay nam wasi hurusi ma cona. Nam di sana ana, «Maɗ koŋ kiyo.» Nam maɗam kiyo. Kom mbuɗ ki jiviya. 6Suu Farisenna sel ki sel ni, gi gagara ko tasi u suu vi Herodna a hal voɗta a ci Yesu kiyo.

Suuna moli eg Yesu

7Yesu u suu haɗi mamsina cuk tasi ha vun lumma Galilena. Suuna ha kay cerem na zomolok. Suu Galilena u suu Yudena, 8suu Yerusalemma u suu Idumena, u suu ay ŋgoo lum ma Yurdanna may, suu Tirna u suu Sidonna may, tok ay egem ndil ndil kay asi hum dlaamba nam laɗta. 9Yesu di maŋ suu haɗi mamsina ana, «Agi halagi lum taa dew, kay suuna ɦeɓenɗi.» 10Suu tuguɗira halaŋ ɓaɗ ay egem a doomba, kay nam garaɗ suuna ki bolowo. 11Suu fuli suu cona kasina wam na ni, asi goɓ kaŋga fokomu, sawalla kolo ana, «Aŋŋi Goŋ Lona.» 12Nam dasi u eŋga ana asi dam dlam ki maŋ suunaɗi.

Yesu man suuna doogo yam mba'

(Matiye 10.1-4; Luk 6.12-16)

13Ŋgoo daganda Yesu ɗiŋ kay ɦinira, di ana suu hurum minisina asi mbaya, asi hin tuɗ ha egemu. 14Nam man suu dukusi doogo yam mba', [yasi ana suu mam suu vovoɗta.] Nam manasi ana asi tuɗ umu, nam sunusi ana asi ɓak Boy ma Ayra ki maŋ suuna, 15asi u saɓak ma dik fuli suu cona egesi lay. 16Gola ni sem suu asina, Simon (Yesu tinim sem ana Piyer), 17Jak u wayamma Jaŋ, asi ni goryoŋ Zebedena (Yesu tinisi sesi ki ana goryoŋ Lo ma bayra), 18Andre may, Filip, Bartelemy, Matiye, Tomas, Jak goŋ Alfena, Tadde, Simon ma min buɗ suu mamma kina, 19u Yudas Iskariyot, sa ma gus Yesu ki na.

Yesu somoyom halamu

20Yesu hoŋ ay vo wanni, suuna tok ay egem ndil ndil olo. Yesu u suu mamma asi ka fi tasira ti va ko suunaɗi. 21Suu hu njaf mammana hum na ni, tuɗ a tayam ay kiyo, kay asi di ana, «Yam a jak kiyo.»

Yesu hoŋ dira kay yakka suuna yakamba

(Matiye 12.22-32; Luk 11.14-23; 12.10)

22Suu wi magaara suu ay Yerusalemma ɓak ana, «Beelzebul ka kamu, Mul fulina kam lay, ɦam saɓakŋa a dik fuli suu cona suu hiŋŋa kiyo.» 23Yesu yasi egemu, tinisi ndal boyna ana, «Satan hin dik ndaramma ki su? 24Ko suu kay mulla dewra li duu duk tasiya ni, mul masira ka kakgi. 25Ko suu deera dewra li duu duk tasiya ni, dee masira ka liɗi. 26Ko Satan li duu tamu ni, li ni mul mamba ki ɓorowiya ni, saɓak mamma hin ka liɗi, daɓ ki ni ɦawaa.

27«Sa saɓakŋa aŋ ka kal varam a yowom tlegeyem bay ɗagam ki kaŋgaɗi. Aŋ ɗagam ki kaŋga wanni, aŋ ndak a yowom tlegeyem halaŋ ni na tuwa.

28«An dagi ni gasira, Lona ndak a daɓ cora u ŋgulla vi suuna ki halaŋ. 29Sa ma ŋgul Musuk Lonara suluk mamma hin egem a fafatɗa, ka daɓ kiɗi.» 30Yesu di dla ndaɗta na ni, kay suu wi magaara di ana, «Ful ma cona ka kamu.»

Su Yesu u gorsemma

(Matiye 12.46-50; Luk 8.19-21)

31Su Yesu u gorsemma mba wa. Asi lak ha ki buruwa, gi sunda ha egem a yamu, 32suuna moli egem ndiŋ ndiŋ, asi dam ana, «Aŋ gola! Suŋ u gorseŋŋa ka joɓoŋ dlaŋ fun goŋga.» 33Yesu hoŋosi dira ana, «Sun u gorsenna ni suurage?» 34Nam pereɗ irim, gol suu ŋguy egemma halaŋ, hin dasi ana, «Gola! ni sunu u gorsenna. 35Sa ma li u dlara Lona miniɗta, sa namma ni wayanna, wayanda u sunu.»

Currently Selected:

MARK 3: BMS

Highlight

Copy