MARK 10
10
Yesu haɗ kay dla boyogi suu jok kina
(Matiye 19.1-12; Luk 16.18)
1Yesu col ha tana, tuɗ hu mbassa Yudera, hin ɗiŋ ha ki ŋgoo lumma Yurdanna. Suuna mol egem daŋgatla, nam tin um haɗasi ko nam haɗasi tew tewra na.
2Suu Farisenna ɦuɗ tasi eg Yesu a duum delemu. Asi joɓom ana, «Gaɗ maygira hin sana a jok caamba ki su?» 3Yesu hoŋosi u joɓpa ana, «Moiz gaɗagi ana mege?» 4Asi dam ana, «Moiz hinimi ana sa li a jok caamba kiyo ni, haɗ magaara bussa koɗu.» 5Yesu dasi ana, «Moiz ɦagi gaɗ ndaɗta na ni, kay hurugi ma eŋŋa. 6U ura tin ayra Lona li tlena halaŋ, ki ɓiiri ana nam li sa njufna u cara. 7Kay ndaɗta sana hin bum u sum ki may, taɓ ki u caamba, 8asi mbuɗ ki tliw ma dewna. 9Va ma Lona dlaɓam ki dewna, aŋ sana ka walam irim kiɗi.»
10Asi sel kalafi sel ni, suu haɗina joɓ Yesu kay boy namma olo. 11Nam dasi ana, «Sa bus caamba ki bus, ɗumba daŋga na, nam li ni zoŋga kay caamba jewra. 12Lini cara hin njufuɗ ki wa, jok ki u ma ɗaŋŋa ni, ndaɗ li ni zoŋga may.»
Yesu paɗ vunum ki kay kemba
(Matiye 19.13-15; Luk 18.15-17)
13Suuna mbaa gorkemba eg Yesu a nam baa kom kasiya. Suu haɗina yal suu mbaarasi ayna. 14Yesu wasi li na ni, hurum ɓeŋ egesiya, dasi ana, «Hinigi kemba mbay egenu, doorosiɗi. Mul Lonara ni maŋ suu ko asina na. 15An dagi ha ni gasira, sa vi Mul Lonara ka ko gogoona naɗi na, nam ka kal huɗi.» 16Ŋgoo daganda nam yowosi kom koloo, baa kom kasiya, paɗ vunum ki kasiya.
Sa ɦizina
(Matiye 19.16-30; Luk 18.18-30)
17Yesu gi tam voɗ sini, sana liŋ ay egemu, mba goɓ ga fokomu, joɓom ana, «Sa haɗ jivina, an li nana a fi iirira ka daɓ kiɗira ge?» 18Yesu dam ana, «Aŋ yan a sa jivina amege? Sa ma jivi kaɗi. Ni Lona dew. 19Aŋ wi gaɗta vi Lonara di ana, Aŋ ci maɗɗi, aŋ li zoŋgi, aŋ kulɗi, aŋ kaboy eg saɗi, mbaɗ vun va ko sa u mbeleŋgi, tli yam buŋ u suŋ koloo.» 20Sana hoŋ dam ana, «Malaŋ Haɗta, gaɗ ndaɗta halaŋŋi, an vaɗ vunuɗ ay ni u goo tan day.» 21Yesu wam na ni, hurum minimu, hin dam ana, «Va ma dooroŋ dew, aŋ bay lam tuwa. Tuɗa, gus tlegeyeŋ ki halaŋ, bege ndaɗta aŋ ɓorowoɗ ha ki maŋ suu hawra. Aŋ hin fi ɦizza ŋgolla ha kolo huulonna. Ŋgoo daganda aŋ mbay unu.» 22Boy namma tam hurum ɦay, nam gi tammi ɗus irim dum dum, kayme tlena kom cocoo.
23Yesu gol suu mamsina ŋguy kam na ni, nam dasi ana, «Loɓma kay suu ɦizina a kal hu Mul Lonara.» 24Suu haɗi mamsina lak na jim kay boy namma, Yesu dasi olo ana, «Goryonu, a kal hu Mul Lonara ni loɓ ɦay. 25Jamballa a kal hu zul libirina ni loɓ ɦay, sa ɦizina a kal hu Mul Lonara loɓ su jamballa a kal hu zul libirina.» 26Suu haɗina boy namma su ki kasi su olo, asi joɓ tasi ana, «Lini na ni, sa hin suɗ kina ni ge olo ge?» 27Yesu golosi na ni dasi ana, «Va dum suuna ka dum Lonaɗi, kayme va doo Lona kaɗi.»
28Piyer di Yesu ana, «Gola! Ami hin tlegeyemi ha ki halaŋ a tuɗ uŋu.» 29Yesu hoŋom dira ana, «An dagi ha ni gasagi! Lini sana hin ziim ki may hin gorsemma ki may, hin sum ki may, hin bum ki may, hin goryom u sene mamma ki may kan an u Boy ma Ayra ni, 30nam hin fi ni su tlesuu nam hinisi kina fasi ni kay ndaŋgara tani gaw sem kis, fi zina, fi gorsemma, fi sura, fi goora, fi senena. Nam fi lassa lay. Ha fokka nam hin fi iirira ka daɓ kiɗira. 31Suu fokŋa bolowo hin mbuɗ ki dagani, suu daganna bolowo hin mbuɗ ki foko.»
Yesu ɓak kay miɗ mamma u paɗ mamba kolora a yamba hindira
(Matiye 20.17-19; Luk 18.31-34)
32Asi cuk tasi hu voɗta a tuɗ kolo Yerusalem. Yesu tuɗ fok suu haɗi mamsina, asi yow ki ndaana. Suu tuɗ usina mbuɗ ndaana coco ɦay. Yesu yow suu doogo yam mbana egem olo, nam dasi kay dlara hin a lam wanda. 33Nam dasi ana, «Humugi haa! aygi tuɗuygi ha kolo Yerusalem wanni, Goŋ Sanna asi hin ɦam ki maŋ muli suu li ɓivunna u suu wi magaara. Asi hin kaam ɓak mamma ana cam kiyo, ɦam ki maŋ suu ɦawana. 34Suu asina hin poŋom lay, tofoɗom yoyona kam lay, panam lay, cam ki maɗna lay. Hu buu ma hindina, nam hin paɗ ki kolo iiriya.»
Jak u Jaŋ joɓ Yesu
(Matiye 20.20-28)
35Ŋgoo daganda Jak u Jaŋ goryoŋ Zebedena mbay eg Yesu, joɓom ana, «Malaŋ Haɗta, ami min ana va ma ami joɓoŋŋana, aŋ lamina.» 36Yesu hoŋ joɓosi ana, «Agi min a an lagi ni mege?» 37Asi dam ana, «Falira mul maŋga mbay u saɓakŋa vi Lona egeɗta wanni, aŋ kak maa dew kay bikiŋ ma njufna may, maa dew kay bikiŋ ma gulna may.» 38Yesu dasi ana, «Agi ka wi va ma agi joɓommaɗi. Agi ndak ci vaa cira ko an hin camba na su, ɗowba fi batem ma an hin fina su?» 39Asi dam ana, «Ami ndaka.» Yesu hoŋosi dira ana, «Agi hin ci vaa cira ko an hin cira na lay, hin fi batem ko an na lay. 40A kak kay bikin ma njufna u ma gulna ni dla ndaɗta ndolon an kaɗi. Li namma hin ni maŋ suu Bun minim masina.»
41Ndarayasi suu doogona hum na ni, hurusi ɓeŋ eg Jak u Jaŋ. 42Yesu yasi ay egem halaŋ, dasi ana, «Suu agi wasi kaki kay suuna a mulina ɦeɓ suu masina coco ɦay, suu ŋgolo dlara su dlara kay suu masisina lay. 43Dukugi ni, ka li dlara naɗi. Ki ni na ɗow ana sa ma min a mbuɗ ma ŋgolna, nam lagi sunda. 44Sa dukugi li hal a ti ndarayamma ni, nam mbuɗ tam ki mbaɓu magina. 45Goŋ Sanna mba kay ana suuna lam sunu naɗi. Nam mba ni a lasi sunda ni masi na ɗow. Nam warak u iiri mamba a buɗ suuna bolow cocoo.»
Yesu mal ii Bartime ma dugina kiyo
(Matiye 20.29-34; Luk 18.35-43)
46Asi tew Yeriko. Hu li Yesu kal ay ki u suu haɗi mamsina hu zina wanni, suuna usi ay na dimgil. Bartime ma dugina, goŋ Timena, kaki keŋ voɗta cen tlena ko suuna. 47Nam hum ana jakŋi Yesu ma Nazaretna ni, gijaŋ sawalla ana, «Yesu Goŋ Davidna, wan hahawan na wi ge!» 48Suuna ŋgolo yalam ana nam seŋa ni, nam jok um ha fok na ɗow ɗow: «Goŋ Davidna, wan hahawan na wi ge!» 49Yesu col col ni, di ana, «Yamma aya.» Asi yi sa dugina dam ana, «Vi huruŋu, col koloo, nam ka yaŋu.» 50Nam cuk baraw mamma ki ca ni, col kolo zak, tuɗ eg Yesu. 51Yesu dam ana, «Aŋ min a an laŋŋi nanage?» Sa dugina dam ana, «Malaŋ Haɗta, malan irin kiyo.» 52Yesu damu: «Tuɗa! Huruŋ ma tini kanna suɗuŋ ki wa.»
Ni sana irim mal ki gaw. Nam gi tam u Yesu.
Currently Selected:
MARK 10: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
