MATIYE 26

Mulina gi gagara kay Yesu

(Mark 14.1-2; Luk 22.1-2; Jaŋ 11.45-53)

1Yesu daɓ njaɗ mamba daɓmi, hin di maŋ suu haɗina ana, 2«Agi wi ana luu Pakŋa hin buuna mba'. Goŋ Sanna asi hin ɦam ki a ɓalam ki hu gu ma garakŋa.»

3Hu li namma muli suu li ɓivunna u suu ŋgolo suu Juifna, tok tasi vi mul ŋgol ma li ɓivunna yam ana Kaif. 4Asi vi vun tasi ana hal mbeleŋŋa a vi Yesu a cam kiyo. 5Asi di vun tasi ana, «Vam u luuna a suuna mun yaraɗi.»

Cara vo mbul ma hisna kay Yesu

(Mark 14.3-9; Jaŋ 12.1-8)

6Yesu ay Betani wanni, nam kak ay vi sa liɓina, yam ana Simon. 7Cara mbay egem u mbul ma hisna koɗ hu koloɓona. Mbul namma gus way ɦay. Yesu kakira hu li ti funa wanni, cara yamam mbul namma kay yamu. 8Suu haɗina waɗ na ni, hurusi ɓeŋ ki egeɗ ana, «Ndaɗ ɓeŋ mbul namma ki ni kay mege? 9Mbul namma gus way cocoo. Mariyaɗ ni gusum ki gin gusni, ɦal gursu ndaɗta maŋ suu hawraɗi su?» 10Yesu wi ana hurusi ɓeŋ ki egeɗu ni, nam dasi ana, «Agi ɦeɓ cara na ni kay mege? Dlara ndaɗ landa egen wanda ni jiviya. 11Suu hawra hin ka ni egegi tew tew. Ko an na ni, hin ka li egegi gak gakgi. 12Ndaɗ voon mbul ma his namma kanni minin ni maɗan a panda. 13An dagi ni gasira, falira Boy ma Ayra namma di ki kaŋga hu duliyara halaŋga ni, suuna humusi hin gasi kay dlara cara landa egen wanda.»

Yudas min a ɦal Yesu ki maŋ muli suu li ɓivunna

(Mark 14.10-11; Luk 22.3-6)

14Sa maa dew duk suu doogo yam mbana, yam ana Yudas Iskariyot tuɗ eg muli suu li ɓivunna. 15Dasi ana, «An ɦagi Yesu ki wa ni, agi hin ɦan ni mege?» Asi ndum bege gursura dok hindi, ɦamba gaw. 16Ay hu li namma na ni, Yudas hal Yesu a ɦam kira.

Yesu ti fu Pakŋa u suu haɗi mamsina

(Mark 14.12-21; Luk 22.7-14,21-23; Jaŋ 13.21-30)

17Pak a luu vinda ni, suu vi Yesuna mbay joɓom ana, «Aŋ min ana miniygi lii ti fu ma bay kuffa ni arage?» 18Yesu dasi ana, «Tuɗugi ha hu zina vi sana, dam ana, Mala Haɗta ana, Lina ndak wa, an hin nda ti fu ma Pakŋa u suu mansina ni varaŋu.» 19Suu haɗina li ko Yesu dasira na may, min tlesuu Pakŋa ha kaŋgaa.

20Njeŋgera mba mba ni, Yesu kak a ti funa u suu mam suu doogo yam mbana. 21Asi ti funa na ni, Yesu dasi ana, «An dagi ni gasira, sa maa dew dukugi ni hin ɦan ki maŋ suuna.» 22Asi mbuɗ ɗus irisiya, hurusi haɗ cocoo, joɓom ki dew dew ana, «Bu Suuna, ni an su? Ni an su?» 23Yesu hoŋosi dira ana, «Sa cuk kom hu ŋgotta dewra u anna, ni ma hin ɦan kina. 24Goŋ Sanna hin miɗ ko magaara di ki fok jewra na. Hahawra ŋgolla kay sa ɦal Goŋ Sanna ki na. Nam vuɗ ki ginɗi ni mariyaɗ.» 25Yudas, sa a ɦal Yesu ki na, joɓ Yesu may ɗaŋ ana, «Mala Haɗta, ni an su?» Yesu ana, «Ni aŋ daŋ may.»

Funa vi Bu Suuna

(Mark 14.22-26; Luk 22.15-20; 1 Korintna 11.23-25)

26Mayra asi a ti funara wanni, Yesu tli funa komu, gi deɓ Lona kamu, mbulukum irim ki duk mbulukŋi, ɦam maŋ suu haɗi mamsina di ana, «Vagina, tamu, ni tliwinu.» 27Nam tli va cira kom olo, gi deɓ Lona kamu, ɦasina, ana, «Cagina halaŋ. 28Ni busuun ma Lona vi banara u agi u namma. Ni busu ma vo ki kay suuna halaŋ a bulumusi coosira ki na. 29An dagi ana, Cecemmi an ka ci vuɗ gugutlura u agi oloɗi. An hin ci ma wilina u agi ni hu Mulla vi Bunda tuwa.» 30Asi gi soolla luuna gi ni, cuk tasi tuɗ kay ɦinira Conora.

Yesu ana Piyer hin tin vunum kamu

(Mark 14.27-31; Luk 22.31-34; Jaŋ 13.36-38)

31Yesu di maŋ suu haɗi mamsina ɗaŋi ana, «Hu njeŋgera wanda ni, agi halaŋ hin noyon kiyo. Dla ndaɗta li na ni, kay ki ɓiiri hu magaara ana, An hin ci sa taa timigiina kiyo. Timigii mamsina hin njay liŋŋa. 32Falira an paɗ ki kolo iirira wani, an hin tuɗ ha fokogi Galile.» 33Piyer kaam vunum ana, «Suu hiŋŋa halaŋ li noyoŋ kiyo ni, an na ɗow ni, ka noyoŋ kiɗi.» 34Yesu hoŋom dira ana, «An daŋŋi gasi, hu njeŋgera wanda, bay golok tlekŋa hel tu ni, aŋ hin tin vunuŋ ki kan yaŋŋa hindi ana, Aŋ ka wanɗi.» 35Piyer dam ana, «Lini an miɗ u aŋ lay ni, an ka di ana, An ka waŋgira naɗi.» Ndarayam suu haɗina halaŋ di na lay.

Yesu cen Lona ay hu lina Getsemane

(Mark 14.32-42; Luk 22.39-46)

36Yesu mbay u suu haɗi mamsina hu lina yam ana Getsemane. Nam dasi ana, «Lakagi tani, an tuɗ tana cena.» 37Nam yi Piyer u goryoŋ Zebedena ha umu. Nam gijaŋ li ndaana, tam tuɗum na dukuk dukuk. 38Nam yoo tamu, dasi ana, «Hahawra fan wa, ni fun maɗanu. Lakagi jek jeke tani, buurugi senɗi, ko an na may.» 39Nam ɦuɗ fok na nde ni, kuluɓ irim kaŋga, joɓ Lona ana, «Bunu, lini vaa ni, hinin hahaw ndaɗta kanɗi. Ҥawaa. Ka ko an minda naɗi. Li ko aŋ minda na.»

40Nam hoŋ ay eg suu haɗi mam suu hindina wanni, fasi ki senna. Nam di Piyer ana, «Agi ndak a kak u irigi na njok ki su? 41Lakagi jek jekee, buurugi sennaɗi, cenegiya, a va ndemegiɗi. Saara mina, tliw tara dawiya.»

42Nam tuɗ a yamba mbara wanni, joɓ Lona ana, «Bunu, li ana hahaw ndaɗta jak ki kanɗi ni, li ko huruŋ minda na.»

43Nam hoŋ ay eg suu mamsina olo, fasi ki senna, kay irisi goŋ ki kasiya. 44Nam hinisi ka tani, hoŋ a cen Lona a yamba hindira, di ni boy ma jewna tok olo. 45Nam mbay eg suu haɗina wanni, dasi ana, «Agi buurugi senna, koɗ tagi daŋŋi nanage? Gologiya, lin ndak wa. Goŋ Sanna ɦam ki ko suu hurusi cona. 46Yowogi koloo, tuɗuygiya. Sa gusun kina mba wa tok.»

Suuna vi Yesu

(Mark 14.43-50; Luk 22.47-53; Jaŋ 18.3-12)

47Yesu vunum bay ndi kaŋga tu may ni, Yudas ma duk suu doogo yam mbana mba gaw. Suuna ay um bolowo, ŋgewegina bikisi may, tokolora kosi may. Sunusi ay ni muli suu li ɓivunna u suu ŋgolona. 48Yudas ma gus Yesu kina takasi mbeleŋŋa ay ki jew ana, «Aygi tuɗuygi ha wanna, sa ma an gam deɓpa, mboɗom kolo hurunna, ni namu, vagina.» 49Yudas mba mba ni, ɦuɗ tam eg Yesu, gam deɓpa ana, «Aŋ basa wa su? Mala Haɗta.» Nam mboɗom kolo hurum gaw. 50Yesu dam ana, «Banna, li dlara aŋ mba kaɗta.» Suu ay u Yudasna ŋguf Yesu, vam gaw. 51Sa maa dew duk suu vi Yesuna paɗ ŋgew mamma, ka hum sa li sunda fok mul ŋgol ma li ɓivunna kiyo. 52Yesu dam ana, «Hoŋ ŋgew maŋŋa hu ziimu. Suu ci ndarayasina u ŋgewegina hin miɗ ni maɗ ŋgewegina may. 53Aŋ ka wi ana an joɓ Bun ha wa ana nam njunun aya ni, nam ka sunun suu doo kanna ay ŋgolɗi su? 54Li a doo kanu ni, boy ma ɓiiri hu magaarana ka liɗi. Faɗ ki wanni namu.»

55Yesu jok vunum u suu vamma ana, «Agi mbay u ŋgewegina bikigi may, tokolora kogi may, a van ni, an ni sa kul su? An haɗagi ay hu Ziŋ Lonara hu buuna tew tew ni, agi vanɗi kay mege? 56Dla ndaɗta mba kan na ni, a faɗ ki ni vun boy ma suu jok vun Lona ɓiirim ay hu magaarana.»

Suu haɗina hinim tani njay liŋŋa halaŋ gaw.

Yesu fok suu kaɓakŋa

(Mark 14.53-65; Luk 22.54-55,63-71; Jaŋ 18.13-14,19-24)

57Suu vi Yesu ay na, tuɗum fok mul ŋgol ma li ɓivunna, Kaif. Suu wi magaara gaɗta u suu ŋgolona tok kaŋga egemu. 58Piyer ay ŋgorom day, cuɗum um ay gak gak, mba kal vi mul ŋgol ma li ɓivunna. Nam kal ha hu taraŋga, kak duk suu asgaana a gol boy ma kay Yesuna.

59Muli suu li ɓivunna u suu ŋgolo suu kaɓakŋa hal dlara kay Yesu a cam kira. Boy ma asi damma, ni kaboyna sak sak. 60Asi ka fi ɗoɓ boy kosiɗi. Suu mbay egesina kaam boyna egem na ka ka. Suu hiŋŋa mbay dagan na mba', 61di ana, «Sa namma di ana nam ndak to Ziŋ Lonara ki to ni, miniɗ ki kolo hu buu ma hindina.»

62Mul ŋgol ma li ɓivunna col koloo, di Yesu ana, «Aŋ ka di va ki dewɗi ni, suuna ɓak kaŋŋi ana mege?» 63Yesu seŋ tamu, dam ka dukgi. Mul ŋgol ma li ɓivunna dam olo, «An joɓoŋ ha ni u sem Lo iirina, dami ay gige. Aŋŋi Sa Lona Fuurumma ma Goŋ Lonna su?» 64Yesu hoŋom dira ana, «Aŋ di ni aŋu. An dagi ha ana, Agi hin wi Goŋ Sanna kagi kay bik Lona ma njufna, ma saɓakŋa kom halaŋŋa. Agi hin wam nam hoŋ ay duk ɗugulla huulona.» 65Mul ŋgol ma li ɓivunna hum na ni, haa baraw mamma ki gaw ana, «Nam ɓakŋi co eg Lona. Aygi hal ni me olo ge? Agi li hummi nam pan ni Lonaɗi su? 66Irigi ana mege?» Asi hoŋom dira ana, «Nam wanni a ci ki ciya.»

67Ŋgoo dagan asi tofoɗom yoyona irimu, cam poŋga. Suu ɦiw cam kiriŋim may, 68ana, «Aŋ lini Sa Lona Fuurumma ni, di aya, sa caŋŋa ni gege?»

Piyer tin vunum ki ana, nam ka wi Yesuɗi

(Mark 14.66-72; Luk 22.56-62; Jaŋ 18.15-18,25-27)

69Piyer kaki hu taraŋga wanni, cara li sunda vi mul ŋgol ma li ɓivunna ɦuɗ taɗ egem dam ana, «Aŋŋi sa tuɗ u Yesu ma Galilena layɗi su?» 70Nam tin vunum fok suuna halaŋ ana, «An ka wi dlara ndak dan kaɗtaɗi.» 71Nam kal ay ki vun grekŋa ni, cara daŋga wam olo, di suu egemma ana, «Sa namma ay u Yesu ma Nazaretna.» 72Piyer tin vunum ki olo ana, «An suura. An ka wi sa nammaɗi.» 73Kak njokŋi, suu lakina ɦuɗ tasi egem olo dam ana, «Gasi. Aŋŋi saasina. Aŋ ɓakŋi vun masinaɗi su?» 74Piyer gijaŋ suu tam ana, «Lini an ka ni boyna ni, Lona gan daŋgayna. An ka wi sa nammaɗi.» Vunum ndi kaŋga may ni, tlekŋa hel gaw. 75Piyer humum gam kay boy ma Yesu damma jewna ana, «Tlekŋa bay hel tu ni, aŋ hin tin vunuŋ ki yaŋŋa hindi ana aŋ ka wanɗi.» Piyer kal ki, tii u simina irimu. Hurum haɗ cocoo.

Currently Selected:

MATIYE 26: BMS

Highlight

Copy