MATIYE 24

Yesu ana Ziŋ Lonara hin to kiyo

(Mark 13.1-2; Luk 21.5-6)

1Yesu kal ay ki hu Ziŋ Lonara, gi tam tuɗta. Suu haɗi mamsina ɦuɗ tasi egemu a njaɗam kay Ziŋ Lonara. 2Yesu dasi ɗaŋi ana, «Agi gologi zira wanda gige! An dagi ni gasi, ndaɗ hin to ki ni ɦawaa, ɦini taa dew hin ka a li jaki kolo kay ndaraɗɗi.»

Duliyara a daɓ kira ni, hahawra hin mbay kay suuna ki fok jewe

(Mark 13.3-13; Luk 21.7-19)

3Yesu kaki kay ɦinira Conora. Suu haɗi mamsina ɦuɗ tasi ay egem asi doy hol, joɓom ana, «Dami ay gi dla ndaɗta hin mba ni saɓage? Va ma hin takami ki kay mbaaŋga, u duliyara a daɓ kira ni mege?» 4Yesu hoŋosi dira ana, «Li tagi jiviya. Hin sa a ganagi yagiɗi. 5Suuna hin mba u sen bolow cocoo di ana an ni Sa Lona Fuurumma, asi hin ganyam suuna ki cocoo. 6Falira agi li ka hum dla duuna zeɗ zeɗ ni, lagi ndaaɗi. Dla ndaɗta hin mbaa. Ni ka daɓ nduŋgaɗi tuwa. 7Njaf suu dewna hin tuɗ duu u suu hiŋŋa may, mulna tuɗ duu u mul hiŋŋa may. Bakdarra ŋgolla ndiya, ndaŋgara hin gijaŋ geŋeɗta may. 8Dla ndaɗta li ni ko cara wihawra a gijaŋ vuɗtara na.

9«Suuna hin vagi lasagiya, cagi maɗna may. Suuna halaŋ hin noyogi ki kay senu. 10Hu li namma suuna bolowo hin hoŋ ki dagani, ka tin hurusi kanɗi. Suuna hin kal kay tasi cocoo, tin gonokka duk tasi lay. 11Suu kaboyna ana asi ni suu jok vun Lonna, hin zul ki cocoo, viɗ suuna ki coco may. 12Cora hin zul ki cocoo, minda hin ka li hu suuna ŋgol oloɗi. 13Sa ma tin hurum kanna din din na, hin suɗ kiyo. 14Boy ma Ayra kay Mulla hin njaɗ ki kay ndaŋgara halaŋ. Suuna njay ki duk njaf suuna wa halaŋ a di boy namma kira, ni daɓ nduŋga.»

Hahawra ŋgolla bay sa waɗ tura

(Mark 13.14-23; Luk 21.20-24)

15«Hahawra ŋgolla ka gin a mba kay sa ɗira, agi hin waɗu. Ni ko sa jok vun Lonna Danyel di ki fok jewra na. Sa ma ndum boy namma humum ki jiviya. 16Hu buu namma suu Yudena hin njay liŋŋa kay ɦinira. 17Sa ma fam kaki fun ziimma, ka kal kalafi a yow va kombi. 18Sa ma fam ha ki hu senena, ka hoŋ voo a yow baraw mamma kombi lay. 19Boyogi suu wiina u suu goora kosi fun ponana, hu buu namma asi mbuɗ ki hahawra na holiyok. 20Joɓogi maŋ Lona a buu namma ndi hu li semeɗnaɗi, hu buu ma vi Lonnaɗi lay. 21Hu buu namma suuna hin wi hawra, hahaw ndaɗta bay li hu duliyara dew tuwa. Hin ha fok lay ni, hahaw ndaɗta ka li na oloɗi lay. 22Lini buu namma ŋga tam ay gedeŋ ginɗi ni, sa ndak hin iiriɗi. Nam hoŋ buu namma ki daganni, kay suu nam ŋgaɓasi ki mamma.

23«Lini sa dagi ana, Sa Lona Fuurumma ka tani. Kiɗow ni. Caa yagi kay boy nammaɗi. 24Suu ɦiw hin mba di ana, Anni Sa Lona Fuurumma. Anni sa jok vun Lonna. Ni kaboyna. Asi li dlara mbuɗta u takka ni ana lini asi fi voɗta ni, asi viɗ ii suu Lona manasi kina usiya. 25Humugi jiviya. An neegi ki fok jewe.

26«Asi li dagi ana, Nam ka bagiya, ni, tuɗugiɗi. Ka ŋgay tani, ni, vagi boy nammaɗi lay. 27Weleɗta col ay u maɗiina wa, ndi ki u fiɗigina wa ni, ni Goŋ Sanna mba ni na may. 28Li ma ɦaana gi huna, kokolora lakŋi hu may.»

Goŋ Sanna hin hoŋ aya

(Mark 13.24-27; Luk 21.25-28)

29«Ŋgoo wihaw ndaɗta dagan ni, faɗta hin mbuɗ ki ndufunu, tilna ka wi haɓ oloɗi, ciciwra hin yak ki kaŋgaa, saɓakŋa vi tlesuu huulonna hin geŋeɗa. 30Hu li namma va tak ki kay Goŋ Sanna hin wi ki kolo huulona. Suu kay ndaŋgarana halaŋ hin yoo tasiya. Na ɗaŋi, asi hin wi Goŋ Sanna mbay duk ɗugulla u saɓakŋa kom halaŋ, u bibiŋil mamba may. 31Nam hin sun suu mam suu sunda huulona ay u tokolomma kosiya. Asi hin mba tok suu Lona manasina ki eg tasiya, kay yam mbassa halaŋ ay fun ndaŋgara dodora, u maɗiina, u fiɗigina, mbayaw lay, dali lay.»

Haɗta kay tulumma

(Mark 13.28-31; Luk 21.29-33)

32«Gologi u ɗuf tlena gege! Tulumma#24.32 Tulumma figuier. gijaŋ ɗuffa wa ni, agi wi ana ndolla hin tok. 33Agi wi wa ana tle asina ka li na ni, agi wi kagi ana dla ndaɗta hin tok, ka doŋ kaana. 34Gasi, an dagi ni u voɗoɗu, njaf namma ka daɓ ki miɗna bay wi dla ndaɗta u irigiɗi. 35Huulona u ndaŋgara hin daɓ kiyo, boy manna ka daɓ kiɗi.»

Lona wi buu ma namma ni nam dew daŋ

(Mark 13.32-37; Luk 17.26-30,34-36)

36«Buu ma dla ndaɗta li huna, sa ka wambi. Suu sunda huulona ka wambi lay. Goŋ Lonna ka wambi lay. Lona Buna wammi nam dew daŋ. 37Dla mayra li u Nowara hin li hu buu ma vi Goŋ Sanna ni na may. 38Ay fok jew mbona bay tli tu ni, suuna ti funa, ci yona may, ɗum boyogina usi may, ɦal goryosi a ɗumba may. Gak gak, tew buu ma Nowa ɗuŋ hu lumbana. 39Asi ka wi dla ndaɗtaɗi lay ni, mbona kafasi ay kasi, yowosi ni na gaw. Goŋ Sanna a mbayra ni, li ni na may. 40Goŋ Sanna a mbara ni, suuna li hu senena mba' ni, maa dew suɗ ki may, ma hiŋŋa hin ki may. 41Boyogina li a luɗna mba' ni, taa dew suɗ ki may, hiŋga hin ki may. 42Lakagi jek jekee, agi ka wi buu ma Bu Suuna mba hunaɗi. 43Humugi boy namma ki jiviya. Lini sana wi ana sa a mba kulum njeŋgee ni, nam ka buu senɗi. Nam ka hinim a coom ɦolotta kambi. 44Minigi tagi jiviya, Goŋ Sanna hin mba ni hu faɗta agi ka saa kambira.»

Sa li sun mamba jivina u ma ka li sun mamba jiviɗina

(Luk 12.41-48)

45«Sa ma neey ma li sunda jivina ni gege? Ni sa malamma ɦam sunda kom halaŋŋa, nam ɓorow tlena maŋ ndarayamma ni nam lay. 46Furira kay sa namma, ma malamma tuɗ lina, hoŋ ay voo, fam u sun mamba komma. 47An dagi ni gasi, sa namma malamma tinim a gol tlesuu vona halaŋ. 48Lini sa li sunda cona ni, nam saa hurum kurufu ana, Malanna ka a mba vo zakgi. 49Nam gijaŋ poŋ ndarayam suu hu sundana, nam tuɗ u suu ci summa cocona, ti funa u asi lay. 50Na daŋŋi malamma mba kafammi hu buu ma nam ka a wambina, hu lerra nam saa kaɗɗira. 51Nam vamu, gam daŋgayna, dikim ha ki duk suu mbambana. Hu li namma nam tiira, muɗ siim may.»

Currently Selected:

MATIYE 24: BMS

Highlight

Copy