MATIYE 22
22
Ndal boyna kay ti fu genewna
(Luk 14.15-24)
1Yesu tin ndal boyna maŋ suuna olo ana, 2«Mulla huulonara tli taɗ ni ko me na ge? Ni ko mul ma ŋgolna a ti fu genewna kay caŋ goromba na. 3Nam sun suu mamsina ana asi tuɗ yi suu nam minisina ay kay funa. Asi ka min mbaɗi. 4Nam cuk suu mam suu daŋŋa olo, dasi ana, tuɗ dasi ana, tlena min ki wa. Mbutlina ki gaɗiya, ɦugunina ki ci lay, funa yi ki wa. Mbay tagi funa. 5Suu nam yasina caa yasi kaɗi, tin irisi hu sun masira, ma tuɗ hu sene mamma may, hiŋŋa li paara may. 6Suu hiŋŋa yow suu vun sunda, lasasi cocoo, casi ki lay. 7Mulna hurum ɓeŋ ki cocoo, nam cuk asgaa mamsina, ana tuɗ casi ki may, ŋgalasi ziisi ki lay. 8Nam di suu vun sunda ana, Funa vam ki yi lay ni, suu an yasina ka ndak kam oloɗi. 9Tuɗugi hu garak voɗta, suu agi fasina halaŋŋi, yasi ay kay funa. 10Suu di vun sunda tuɗ tuɗ ni, yi suu asi fasi ayna halaŋ, suu cona duk may, suu jivina may. Ni huu taraŋ mamba oy ki u suuna halaŋ.
11«Mulna kal ay ki hu taraŋga a gol suu nam yasina wanni, kaf sa hiŋŋa ay duku ni, baraw ma luuna ka tambi. 12Nam dam ana, Banna, aŋ kal ay tani bay baraw ma luuna taŋŋi nanage? Nam sana dam va kaɗi. 13Mulna di suu sun mamba ana, Ɗagam kom ki u semu, taɗam, gam ha ki hu li ndufunna. Hu li namma nam hin tiira, muɗ siim may.» 14Yesu di kay boy namma ana, «Suuna ay yi ŋgolo, suu ŋgaɓi dukusina ew daŋ.»
Warak taara maŋ Mulna
(Mark 12.13-17; Luk 20.20-26)
15Suu Farisenna ŋga vunusi a du del Yesu u boyna. 16Asi cuk suu masina u suu vi Herodna ɦiw a di Yesu ana, «Mala Haɗta, ami wi ana aŋ di ni gasira, aŋ haɗ ni dlara ɗegeera a li jivira ko Lona minda na. Aŋ ka li ndaa ko boy ma vi saɗi. Lini sa ma megelay ni, aŋ dam lay. 17Aŋ dami ay gege. U gaɗ maygira ni, ɦal taara maŋ Sesar ɗowba ɦalɗi su?» 18Yesu wasi hurusi ma co namma na ni, dasi ana, «Suu hurugi mbambara agina, agi hal a duun delen u boyna ni nanage? 19Takan ki gursu ma warak taara u namma ay gige?» Asi takamma. 20Yesu joɓosi ana, «Hu ni yam gege? Ɓiiri hu ni sem gege?» 21Asi hoŋom dira ana, «Ni Sesar.» Yesu dasi ana, «Vaŋ Sesarna ɦam maŋ Sesar, vaŋ Lonna aŋ ɦam maŋ Lona may.»
22Asi hum Yesu hoŋosi dira na ni, boy namma su ki kasiya. Asi hinim tani, cuk tasi gaw.
Joɓpa kay paɗta kolora vi suu miɗina
(Mark 12.18-27; Luk 20.27-40)
23Hu buu ma dew namma suu Sadusenna mbay eg Yesu. Asi ni suu di ana suu miɗina ka paɗ ki koloɗi na. 24Asi joɓom ana, «Mala Haɗta, Moiz hiniygi gaɗta ka ana, Lini sana wayamma miɗa, hin caamba ka bay goo koɗu, nam kakaɗ a vuɗ gorra maŋ wayamma. 25Varami ni goryoŋ carana kiɗisiya. Ma ŋgolna miɗ ki bay vuɗ goo u caamba, hiniɗ ka maŋ ma vi kamma. 26Ma namma miɗ ki bay vuɗuɗ goo ka koɗu. Ma hindina lay, asi kiɗisiya miɗi halaŋ bay vuɗuɗ goo koɗu. 27Ŋgorosi daganni cara hin miɗ may. 28Hu buu ma suu miɗina paɗ ki kolona, duk suu kiɗisiya asina maana hin li a njufuɗ ni ge? Asi kakaɗ ay ki usi halaŋ may ni ge?»
29Yesu hoŋosi dira ana, «Agi viɗ ii tagi ni kay agi wi boy ma hu magaara u saɓak ma vi Lonna kaɗira. 30Hu buu ma suu miɗina paɗ ki kolo iirira, sa njufna ka ɗum caɗi lay, ca ka kak njufɗi lay. Asi hin li ni ko suu sunda huulona na. 31Kay suu miɗina a paɗ ki kolo iirira ni, agi ndum boy ma Lona dagina hu magaarana kaɗi su? 32Nam di ana, An ni Loŋ Abrahamma, Loŋ Isaakŋa, Loŋ Yakobma. Nam ka Lo ma vi suu miɗinaɗi, Lo vi suu iirina ni namu.»
33Suu molina hum na ni, haɗ ndaɗta su ki kasi cocoo.
Gaɗta su ndarayaɗnara
(Mark 12.28-34; Luk 10.25-28)
34Suu Farisenna hum ana Yesu vi suu Sadusenna u boyna ni, asi tok tasiya. 35Sa ma dukusi dew, sa wi gaɗta, min a gun Yesu u boyna, joɓom ana, 36«Mala Haɗta, gaɗta ŋgolla su kay ndarayaɗnara ni taarage?» 37Yesu hoŋom dira ana, «Aŋ min Looŋŋa Bu Suuna u huruŋ halaŋ, u musukuŋ halaŋ, u saa maŋga halaŋ. 38Ni gaɗta ŋgolla su kay ndarayaɗnara. 39Ta ko ndaɗ na mayra ni ana, Aŋ min ndaraŋŋa ko min taŋga na. 40Gaɗta vi Moizza halaŋ u haɗta vi suu jok vun Lonna tokŋi hu gaɗ ndaɗta.»
Sa Lona Fuurumma u Goŋ Davidna ni nanage?
(Mark 12.35-37; Luk 20.41-44)
41Suu Farisenna toki eg tasi wanni, Yesu joɓosi ɗaŋi ana, 42«Agi saaragi kay Sa Lona Fuurumma ni ana mege? Nammi hu njaf ma vi ge na ge?» Asi hoŋom dira ana, «Hu njaf ma vi Davidna.» 43Yesu dasi ana, «Lini na ni, David u saɓakŋa vi Musuk Lonara yam ana, Bu Suuna ni nanage? David di ki ana,
44Bu Suuna di maŋ Bu Suu manna ana,
Kak kay bikin ma njufna,
gak gak an cukuŋ babali maŋsina ki
kaŋga u seŋ tuwa.
45David li yam a Bu Suuna mamma na ni, Sa Lona Fuurumma hin li a goromma ni nanage?»
46Kay boy namma sa fi boy ka dukusi dew a di maŋ Yesuɗi. Ka ay hu buu namma na ni, sa ndak ka a joɓom boy ma daŋ oloɗi.
Currently Selected:
MATIYE 22: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
