DLAŊ LEVIRA 4
4
Ɓivun ma bulum cora kina
1Yawe ɓak u Moiz dam ana, 2«Aŋ di suu Israelna ana, Hu li ma sana li cora wa, ka u min mambaɗi, jak gaɗta vi Yawe taa ki wa dewe ni nam hin li ko ndaɗta na.
3«Lini mul ŋgol ma li ɓivunna ma fuurum ki u mbulnana li cora ni namu ni, u coom ndaɗta a mbaa cora kay suu halaŋŋa ni, nam vi bolo mbutl ma bay ŋgulla egemma, mbaaram fok Yawe a li ɓivunna kay dla coombara. 4Nam mbaa bolo mbutlna ay fun Mbutluɓ ma Tokka fok Yawe, nam tin kom kay yam mbutlna, nam ŋgaɗ mbutl namma fok Yawe. 5Mul ŋgol ma li ɓivunna ma ki fuuri u mbulnana vo busuna kom vo ni tuɗum ha kalafi hu Mbutluɓ ma Tokka. 6Mul ma li ɓivunna kal cifiɗ kom duk busuna, nam yam busuna sem kiɗisiya#4.6 sem kiɗisiya Ndumba kiɗisiyara vi suu Israelna tak ki ni ndakka, pasiyakka. kalafi fok Yawe eg ii li ma kiɗikŋa eg gojoli ma caki ii li ma teteɗna. 7Ŋgoo dagan mul ŋgol ma li ɓivunna tin u busu mbutl ma hin komma kolo kay mekŋa#4.7 mekŋa Suu Israelna tin sem mekŋa a tak ki ni kawi ma mini keŋ givin ma togollana. keŋ givin ma togolla ma ka kalafi hu Mbutluɓ ma Tokkana fok Yawe. U busu ma hinna nam mba voom ki ga kiɗik u givin ma togolla fun Mbutluɓ ma Tokka. 8Mbul ma huu mbutl ma ŋgaɗam a li ɓivun ma bulum cora kina halaŋ, mul ma li ɓivunna yowomu, mbul ma kay yorotnana halaŋ ma ga una lay. 9Gilissa jak u mbul ma kaɗna lay u ma eg dudukkana lay, dudukka taɗta hiniɗ ki kama. 10Ko ndal tlesuu mul ma li ɓivunna yowosi ay kay ɓivun ma heɓpa wanna na lay, mul ma li ɓivunna ŋgalasi kay givin ma togolla ni na may. 11Na may bak mbutlna u tliwim halaŋ, yamba u kewetta lay, yorotna u soɗom halaŋ, 12ni ana u tliwim ma hinna halaŋ, asi yowosi ha ki ŋgoo doŋ kaana, hu li ma teteɗna, ni hu li ma asi tok but mbul ma ŋgalam ha vona tuɗ cukum ha ki huna. Nam tuɗ ŋgal tliwna ha kay kura ŋgol ndaɗta hu li ma asi cuk buɗna ha ki huna.»
Ɓivun ma kay suu tokka belna
13«Lini suu Israelna u dlasira bella li cora, co ndaɗta ŋgay ga asi waɗ kaɗi ni, lini asi calaɗ gaɗta wa dew duk dlara Yawe di ana laɗɗira wa ni, asi cuk tasi ni hu cora halaŋ. 14Hu li ma u co ndaɗta gi ki kolo wa ni, suu tokka halaŋ vi mbutl bolona a li ɓivun ma bulum cora kina, asi mba mbutl namma ay fun Mbutluɓ ma Tokka. 15Suu ŋgolo suu fok suunana baa kosi kay yam mbutlna fok Yawe, asi ŋgaɗ mbutl namma ni fok Yawe hu gaw may. 16Mul ma li ɓivunna ma ki fuuri u mbulnana vo busuna kom tuɗ kalafi hu Mbutluɓ ma Tokka. 17Mul ŋgol ma li ɓivunna kal cifiɗ kom duk busuna, nam yam busuna sem kiɗisiya fok Yawe, ii li ma kiɗikŋa eg gojoli ma caki ii li ma teteɗna na. 18Ŋgoo dagan mul ŋgol ma li ɓivunna tin u busuna eg mek ma ka kalafi hu givin ma togolla fok Yawe hu Mbutluɓ ma Tokka. U busu ma hinna halaŋ nam voom ga ki kiɗik u givin ma togolla fun Mbutluɓ ma Tokka. 19Tliw ma mbulna halaŋ nam yowomu tuɗ ŋgalam ki hu givin ma togolla. 20Nam li u mbutl namma ni ko ndal nam li ay u mbutl ma ŋgaɗam a li ɓivun ma bulum cora kina na may. Hu li ma mul ma li ɓivunna poo ki kay suuna halaŋŋa, coosira halaŋ bulum ki wa. 21Ŋgoo dagan asi yow mbala mbutlna ha ki doŋ kaana tuɗ ŋgalam kiyo, ko nam li u mbutl ma bulum cora kinara na may. Ɓivun ma kay suuna halaŋŋa li ni na.»
Ɓivun ma vi Mulnana
22«Hu li ma mul ma fok suunana li cora ŋgel gaɗta vi Yawe, Loomara, nam waɗ kaɗi ni, nam li coo. 23Asi takam coomba nam laɗta ki wa ni, nam mbaa ŋgekŋa aya, ni ɦu ma bay ŋgulla egemma. 24Nam baa kom kay yam ŋgekŋa, asi tuɗ ŋgaɗam hu li ma asi ŋgaɗ ɓivun ma ŋgalam kina fok Yawe huna. Ni ɓivun ma kay dla corana. 25Mul ma li ɓivunna kal cifiɗ kom duk busuna, tuɗ tinim eg mekŋa hu givin ma togolla, u busu ma hinna nam voom ki ga u givin ma togolla. 26Tliw ma mbulna halaŋ nam yowom tuɗ ŋgalam ki hu givin ma togolla ko nam li ma kay ɓivun ma heɓpa na may. Hu li ma mul ma li ɓivunna li wa kay sa ma fok suunana na ni, coomba bulum ki wa.»
Ɓivun ma kay sa ma ɦawana
27«Hu li ma sa ma zina ɦawana li cora ŋgel gaɗta vi Yawe ta nam waɗ kaɗira, ta nam di kaɗ ana laɗɗira wa ni, nam li ni coo.#Ndu. 15.27-28 28Lini asi takam coomba nam laɗta ki wa ni, nam tuɗ vi ɦu tamara aya nira bay ŋgulla egeɗta, kay dla cora nam laɗta. 29Nam baa kom kay yam ɦu mayra a li ɓivunna kay coombara, asi i ŋgaɗ ɦu ndaɗta hu li ma ŋgaɗ ɓivun ma ŋgalam kina huna. 30Mul ma li ɓivunna kal kom duk busuna tuɗ tinim eg mekŋa hu givin ma togolla. Busu ma hinna nam voom gaa u givin ma togolla. 31Tliw ma mbulna halaŋ nam yowomu, ko li ay u ɓivun ma heɓpa na may. Mul ma li ɓivunna tuɗ ŋgalasi ki hu givin ma togolla, ni his ma jivi ii Yawena, nam li wa kay sa ma li cora na ni, coomba bulum ki wa.
32«Lini nam a ɦal ay a li ɓivunna kay coomba ni timiira ni, ɦal ni timiira tamara, ta bay ŋgulla egeɗta. 33Nam baa kom kay yam timiira li ɓivunna u ndaɗta, ŋgaɗaɗ kay a li ɓivunna ni hu li ma ŋgaɗ ɓivun ma ŋgalam kina huna. 34Mul ma li ɓivunna kal cifiɗ kom duk busuna tuɗ tinim eg mekŋa hu givin ma togolla, busu ma hinna nam voom ga u givin ma togolla. 35Tliw ma mbulna halaŋ nam yowom ko li ay u ɓivun ma heɓpa na may, mul ma li ɓivunna tuɗ ŋgalasi kay givin ma togolla fok Yawe. Nam li dla ndaɗta kay sa ma li corana wa na ni coomba bulum ki wa.»
Currently Selected:
DLAŊ LEVIRA 4: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
