DLAŊ LEVIRA 17
17
LIRA LI TAŊ KI TETE ƊTA
Gaɗta kay busunara
1Yawe di Moiz ana, 2«Di Aaron u goryomu, di suu Israelna halaŋ, aŋ dasi ana, Gola ni gaɗta Yawe ɦagira ayra. 3Sa Israel ma min ŋgaɗ mbutlna, timiina ɗowba ɦuna a li ɓivunna hin ŋgaɗam fun Mbutluɓ ma Tokka fok Yawe hol. 4Lini sa ŋgaɗasi hu li ma daŋŋa nam vo busuna ki gaa, ni sa namma ka li iiri duk suu Israelna olo ɗi. 5Kay ndaɗta suu Israelna hin dlara ŋgaɗ tlena ha ki duk bolowra tani, mbaa va namma ay ni maŋ mul ma li ɓivunna fun Mbutluɓ ma Tokka, nam ŋgaɗam, a li ɓivunna maŋ Yawe, ni ɓivun ma heɓpa. 6Mul ma li ɓivunna yam busuna kay givin ma togolla vi Yawe, yamam fun Mbutluɓ ma Tokka may. Nam hin ŋgal mbulna kay kura a ɓivun ma his jivina maŋ Yawe may. 7Ka suu Israelna ŋgaɗ yoorina ha ki ŋgoo bagi a li ɓivunna maŋ loogi suu ɦawanaɗi. Gaɗ ndaɗta hin ha dukugi ni na din din a fafaɗta.
8«Aŋ dasi ki hu olo ana, lini sana ni hu njaf suu Israelna, ɗowba ni ŋgay ma ka cuki dukusina, li ɓivun ma ŋgalam ki ŋgalina ɗowba ɓivun ma ɦawana, 9mbaaram ka fun Mbutluɓ ma Tokka a li ɓivunna maŋ Yaweɗi, sa namma ki ni paɗi duk suu mamsina.
10«Lini sana ni sa ma Israelna ɗowba ni ŋgay ma cuki dukusina ti busuna ni an mbuɗ ŋgoron kay sa nam ma ti busunana, paɗam ki duk suu mamsina.#Ura 9.4; Lev. 7.26-27; 19.26; Gaɗ. 12.16,23; 15.23 11Kay ana, iirira vi tlena halaŋŋi duk busuɗusiya, anu, an ɦagina ni hu givin ma togolla kay a li ɓivun ma bulum cora kina kay iiri magira. Busuna mbus co ndaɗta kiyo kay nammi iirira.#Heb. 9.22 12Kay ndaɗta an di suu Israelna ana, Gegelay dukugi ni ti busunaɗi, lini ŋgay ma ki cuki dukugina lay ni ti busunaɗi.
13«Lini sa ma Israelna ɗowba ŋgay ma ki cuki dukusina, ci mburina u lamba ɗowba lay ma komba ay wa ni, nam vo busuna kiyo, tosom ki kaŋgaa. 14Kay ana iirira vi tlena halaŋŋi hu busuɗusiya, hu li ma asi ka iirina halaŋ, kay ndaɗta Yawe di suu Israelna ana kom tliw ma busuɗum cuɗ ka kiɗinaɗi. Sa ma kom tliw nammana ka ki ni paɗi duk suu mamsina.
15«Lini gegelay sa ma Israelna ɗowba ŋgay ma ki cuki dukusina kom ɦaana ɗowba tliw ma vabakŋa vamma ni mbus barawi mamsina kiyo, mbus tam ki may, nam ki ni njenje ta ta fiɗigiya, ni nam hin mbuɗ ki teteɗ. 16Lini nam mbus barawi mamsina ka kiɗi lay, mbus tam ka kiɗi lay ni, nam hin zii coom ndaɗta ni u dew tamu.»
Currently Selected:
DLAŊ LEVIRA 17: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
