JAK 2
2
Suu hawra u suu ɦizina vun tasi dew
1Gorsenna agi suu lagi hurugi tini kay Bu Suuna mayna Yesu Kristu ma bibiŋilna, agi ka ndak a li tagi ii suuna zeɗ zeɗɗi. 2Agi gologi gige lini sa ma ɦizina mba dukugi hu tokka u baraw ma jivina u kaɗumba lorra kay komu, sa ma hawra mbay dukugi u baraw ma cona tam may. 3Lini agi vagi sa ma u baraw ma jivina egemma u furira, dam ana, «Tuɗ kak ha kolo hu li ma jivina,» agi hin di ma hawra ana, «Aŋ col koŋ tana u seŋŋa zow,» kala ɗowba, «Mbay kak ki kaŋga u sen tani kala.» 4Ni agi kaagi ii suuna ki ni zeɗ zeɗɗi su? Agi mbaa ɓakŋa kagi ni u dlaagira cora.
5Humugi gige, gorsenna, suu an minigina. Lona man suu haw suu hu duliyara kay mbuɗusi suu ɦizina hu vira. Asi hin fi mul mamba nam ŋgaaɗ maŋ suu minimma hu jona. 6Agi panagi suu may suu hawra na daŋŋi suu may suu lasagina yowogi tuɗugi fun ɓakŋa ni ka suu begeraɗi su? 7Asi ɓak boy ma cona kay sem ma jivi ma Lona ɦaginana ni ka asiɗi su?
8Lini agi lagi u va ma gaɗta dam kay mulla huulonara u voɗom ko ɓiira dira na ni jiviya, «Min ndaraŋŋa ko taŋga na.» 9Lini agi lagi tagi ii suuna zeɗ zeɗ ni agi lagi cora ni ɓakŋa hin vagiya kay agi hum ka u gaɗtaɗi. 10Lini gaɗta na dew sana hiniɗ ki, hum ka uɗɗi ni, nam li cora ni kay u mayra hinda halaŋ. 11Kay nammi sa ma di ana, «Aŋ li zoŋgi.» di lay ana, «Aŋ ci maɗɗi.» Lini aŋ li boy zoŋgi hin ci maɗna ni aŋ hum ka u gaɗtaɗi. 12Di wa ni li na may, ni agi hin li ko suu ndaki a vi ɓakŋa ma gaɗta buɗuygi kirana. 13Kay mege Lona hin kaɓakŋa wanni ka wi hahaw sa ma ka wi hahaw ndarayamma ɗina ɗi may, dla mayra wi hahaw saara ni su kay ɓakŋa day.
Tin huuna u sunda
14Gorsenna lini sana di ana, «Viinda kaa,» ka takaɗ ki u sundaɗi, vi ndaɗta hin ndak a suɗum su? 15Gologiya lini wayay ma njufna ɗowba wayayra tamara baraw ma cuk ka tasiɗi, mayra casi lay. 16Lini agi hin dasi wa ana, «Tuɗugi, kakagi jiviya, hologi tagiya tagi jivi lay.» Lini agi hin ɦasi va ma njun usi kaɗi ni jivi su? 17Vira ni ko ndaɗta na may, ndaɗ dew bay takaɗ ki u sunda ni ndaɗ kini miɗiya.
18Lini sana di ana «Aŋ viiŋga kaa, an sun manda ka may.» An dam ana, «Takan viiŋga bay sunda, an takaŋ manda u sunda may.» 19Aŋ vi ana Lona ni dew ni aŋ li jiviya, fulina lay ni vi na lay, asi dlak ndaana kom lay. 20Sa ma giniŋ aŋŋa aŋ ka wi ana vira bay sunda ni ki ɦawaa naɗi su? 21Buygi Abraham ay ɗegee ii Lona ni u mege? Ni u sun mamba, kay mayra nam vi goromma Isaak li ɓivunna u namba. 22Aŋ gola viimba u sun mamba taɓ ko tasi dew. Viimba mbuɗ ki ɗegee ni u sun mamba nam laɗta. 23Va ma magaara di kam jewna li wa, di ana, «Abraham vi u Lona, Lona golom a sa ma ɗegeena ni kay viimba.» Ni kay ndaɗta Lona yam ana banamma. 24Gologi gige sana mbuɗ ɗegee fok Lona ni u sun mamba nam laɗta, ka coli ni kay viimba doy na holɗi.
25Ni ndaɗ li ay u Rahab, cara gawlaŋga ni na lay, ndaɗ mbuɗ ɗegee fok Lona ni u sun maɗta ndaɗ vi suu sunda vi suu Juifna varaɗu, ndaɗ njun usi tinisi ki hu voɗta daŋga. 26Ko tliw sana bay musukka hurumu ni miɗiya, na may vira bay sunda ni miɗi may.
Currently Selected:
JAK 2: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
