HEBRENA 5
5
1Mul ŋgol ma li ɓivunna manammi duk suuna kay a li sunda vi Lona kasiya. Nam mba ɦala kay a li ɓivunna kay cora vi suuna. 2Nam tamba lay ni maŋi mamba kaa, nam ndak tak humba vi suu ka wi dlaɗina u suu li cora. 3Kay nammi sa maŋina nam ka li ɓivunna ni kay cora vi suuna holɗi, kay mam namba lay. 4Sana ka ndak a tli ŋgolla mul ŋgol ma li ɓivunna kay tambi. Sana mbuɗ na ni yammi Lona ko Aaron na.
5Ni na may Kristu tli ŋgolla mul ŋgol ma li ɓivunna ka kay tambi, Lona di ki kammi namma ɗow anaba,
«Aŋŋi Goronna,
karam an mbuɗ ni Buŋu.»
6Hu li ma daŋŋa ni nam di olo anaba,
«Aŋ hin mbuɗ a mul ŋgol ma li ɓivunna
a fafatɗa, hu voɗta vi Melkisedek.»
7Yesu hu iiri mamba wanni nam cen Lona mbuɗ tam ki hahawara na ɗow, sawalla kolo u simina irim kay nam ndak suɗum ki hu miɗna. Lona humum cen mamba ni kay hoŋga nam hoŋ yam kaŋga umba. 8Ko nam a Goŋ Lonna lay ni nam wi dla mayra hum vunna hu li ma nam fi wihawra. 9Hu li ma nam mbuɗ ki pasiyakŋa ni nam mbuɗ ni sa ma ɦal suɗta bay daɓpa, maŋ suu hum umma halaŋ. 10Lona di ana nammi mul ŋgol ma li ɓivunna u voɗta vi Melkisedek.
Gol tagi jivi ko dla cora hin vira kira
11Ami ka u dlara funumi ŋgolo a di kay boy namma, a dagina um kira wanni loɓ cocoo, kay agi tagi nek ɦay a humum um kira. 12Lina jak ki ni ŋgolo a agi mbuɗ a suu haɗ suuna may, doli agi min ni Boy Lonana ma haɗam ay jewna olo. A ti fu ma eŋŋa, magira ni agi min ana ɦagi ni mbira a cira. 13Sa ma ci mbira ni gogoona, nam ka ndak a wi tlesuu gasina u suu ka u voɗosiɗina ɗi. 14Ti ma eŋŋa ki ŋgaɓi ni maŋ suu ŋgolona, u li mayra li tew tewra asi ki haɗi kay a ɓorow duk ɦoŋ jivira u cora.
Currently Selected:
HEBRENA 5: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
