URA TIN AYRA 46
46
Yakob u suu mamsina tuɗ Egipte
1Israel tuɗ u tlegeyem halaŋ. Tew hu Berseba may ni, nam li ɓivunna maŋ Loŋ Bum Isaakŋa. 2Lona ɓak Israel njeŋge hu doyra ana, «Yakob, Yakob.» Israel hoŋom dira ana, «An wanni.» 3Lona dam ana, «Anni Lona, Loŋ buŋŋa, li ndaa a tuɗ kaŋga Egipteraɗi. Ha huni an hin zuluŋ njafaŋ ŋgol cocoo. 4An u tanda hin tuɗ u aŋ Egipte, an hin hoŋoŋ ay vo lay. Yosef hin duguŋ iriŋŋi namu.»
5Yakob col ha hu Berseba, goryoŋ Israelna tli busi kolo hu pus pusna yow goryosi u boyogosi hu pus pus ma Faraw sunum ay a yowosi hana. 6Asi yow yoori masisina u tlegeyesi suu asi fasi hu mbassa Kanaanda halaŋ. Yakob tuɗ Egipte u suu mamsina halaŋ.#Sun. 7.15 7Nam yow goryom suu njufiina u gorɓiina halaŋ may u gor ŋgologi mamsina lay. Mbay ki u asi ga hu Egipte.
Sem goryoŋ Yakobma
8Gola ni sem goryoŋ Israel suu mbay Egiptena. Yakob u goryomu, Ruben goŋ Yakob ma ŋgolna. 9Goryoŋ Rubenna ni, Hanok, Pallu, Hesron u Karmi.
10Goryoŋ Simeonna ni, Yemuel, Yamin, Ohad, Yakin, Sohar, Kaul, ni goryoŋ caamba Kanaanda. 11Goryoŋ Levina ni, Gerkon, Kehat, Merari. 12Goryoŋ Yudana ni, Er, Onan, Sela, Peres, Zera. Er u Onan miɗ ha ni hu mbassa Kanaanda. Goryoŋ Peresna ni, Hesron u Hamul.
13Goryoŋ Issakarna ni, Tola, Puva, Yokub, Simron. 14Goryoŋ Zabulonna ni, Sered, Elon u Yaleel.
15Ni goryoŋ Lea suu vuɗusi maŋ Yakob ay hu Paddan Aramma, u goroɗta tamara Dina. Goryoɗ suu njufiina u gorɓiina halaŋ ndi dok-hindi yam hindi.
16Goryoŋ Gadna ni, Sifiyon, Hagi, Kuni, Esbon, Eri, Arodi u Areli.
17Goryoŋ Aserna ni, Imna, Iseva, Isevi u Beriya, wayasira tamara ni Sera. Goryoŋ Beriyana ni, Heber u Malkiyel. 18Ni goryoŋ Zilpa ta Laban ɦaɗ ay maŋ goromba Leara, suu ndaɗ vuɗusi maŋ Yakobma. Asi halaŋŋi doogo yam karkiya.
19Goryoŋ Rasel ta caŋ Yakobpa ni, Yosef u Benjamin. 20Goryoŋ Yosef suu nam vuɗusi ay hu Egiptena ni, Manase u Efrayim, nam vuɗusi ni u caamba Asnat ta goŋ Potifara mul ma li ɓivunna hu ɦoŋzi ma Onna.#Ura 41.50-52
21Goryoŋ Benjaminna ni, Bela, Beker, Asebel, Gera, Naaman, Ehi, Rok, Huppim, Muppim u Arde. 22Ni goryoŋ Rasel suu vuɗusi maŋ Yakobma. Asi halaŋŋi doogo yam fiɗi.
23Goŋ Danna ni, Husim.
24Goryoŋ Neftalina ni, Yassiyel, Guni, Yesser, u Sillem. 25Ni goryoŋ Bila ta Laban ɦaɗ ay maŋ goromba Rasella suu ndaɗ vuɗusi maŋ Yakobma. Asi halaŋŋi kiɗisiya.
26Goryoŋ Yakob suu mbay u nam Egiptena halaŋŋi dok-karkiya yam karkiya, ni ndum boyogi suu vi goryomma ka dukgi. 27Goryoŋ Yosef suu nam vuɗusi hu Egiptena cuk fun hu mba' may, suu vi Yakobma taɓ hu Egipte halaŋŋi dok-kiɗisiya.#Sun. 7.14
28Yakob sun Yuda ha fokom eg Yosef ana nam mba ki eg Yosef wa hu mbassa Gosenda. Hu li ma asi tew hu Gosenna 29Yosef njun pus pus mamma ful a nda ŋgaf vok bum Israel hu Gosen. Hu li ma nam wam ha na ni mboɗom hurum mboɗni, tii na gak gak. 30Israel di Yosef ana, «An waŋ iriŋ wini miɗ man ɗaŋŋi boy kaɗi, kay aŋ ka iiri tuwa.»
Yakob hu Egipte
31Yosef di gorsemma u suu vi bumma halaŋ ana, «An tuɗ ne yam Faraw ha ki fok ana gorsenna u suu vi bunna suu ay hu mbassa Kanaanda mbay ki egen wa. 32Suu asina ni suu taa yoorina kay asi u yoorina kosi cocoo. Asi mbay u timigii masisina u mbutlina lay, u tlegeyesi suu daŋŋa halaŋ lay. 33Hu li ma Faraw yagi wa dagi ana, 34Agi lagi ni sun mege? Ni agi hoŋom dira ana, suu sun maŋsina ni suu taa yoorina, ay hu goromi day ta ta cemi, ami u somoyomi lay. Ni agi hin cuk zina ni hu mbassa Gosenda. Kay suu Egiptena ka taɓ u suu taa yoorinaɗi.»
Currently Selected:
URA TIN AYRA 46: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
