GALATENA TAKKIRA
TAKKIRA
Ɓiiriɗ ni Pol. Li ka ni hu basara 50. Sok boyna, Suɗ ki ni u oora.
Magaa ndaɗta ɓiiriɗ ni maŋ suu vina hu Galati. Zi namma ni duk gayra hu Azira Goora, li cuki jew hu ni suu Frigina, asi goɓmi saɓakŋa vi tlesuu hu duliyarana. Suu Juifna laki hu ɦoŋzi ma ŋgolna Galatina cocoo. Suu Galatina wasi ay ni u dlaasira cora asi laɗta, asi min a halni dlara wilira. Pol tuɗ vi suu Galatina ni hu koy mamba jewra (Sun. 13.51; 14.8-20). Ikonium, Listra, Derbe, zi namma ca ni hin Galati tani nam ii dali na ɗow. Hu li ma nam gi jaŋ koy mamba mbara ni Musuk Lonara doorom ana nam di Boy Lonana hu Aziɗi. Ni nam jak hu ɦoŋzi namma olo (Sun. 18.23).
Hu coki mayra Pol ɓii magaa ndaɗta na ni, suu vi Kristuna fi lassa kay poy masira ɗegeera u gaɗtara. Suu daŋŋa mbay hu li namma ɦay ni suu vina (Gal. 1.7; 5.10), asi min a ɓeŋ Boy ma Ayra vi Kristu kiyo (Gal. 1.7). Suɗta col ay ni ko Kristu, a fi suɗ ndaɗta ni u sunda jivira. Suu Galatina gijaŋ a vi u kaboy ma vi suu Juifna namma (Gal. 1.6; 3.1), tinisi dlara kasi ana hum u buuna, tilna, lina, u basara (Gal. 4.10). Pol doo ki kay tle asina u saɓakŋa kay ciway masira tlum gaɗta ki u vira. Wi ana u vira Abraham mbuɗ ki sa ma ɗegeena ni u vira ki jew basara 430 ni bay gaɗta vi Moizza mba tuwa (Rom. 4.1-16). Ŋgoo dagan Pol fi cora daŋga olo, sa ma vina ka mbuɗ ɗegee u humba hum u gaɗtaraɗi, Pol di ana mbuɗta ɗegeera ni u saɓakŋa vi Musuk Lonara kaki hu suu vina takasi dlaamba halaŋ (Rom. 8.5-11).
Magaara ndak a ɓorow ko wanni na
1. Takkira 1.1-5
2. Sok boy ma ŋgolna hu magaa ndaɗtana 1.6-9
3. Pol diki kay sun mamba sa vovoɗtara 1.10—2.21
4. Mbuɗ ki ɗegee ni u vira dew daŋ, ka u sunda vi gaɗtaɗi 3.1-24
5. Suu vina mbuɗ ki teteɗ ni u oora, ka u gaɗtaɗi 3.25—4.31
6. Iirira vi sa ma vi ma mbuɗ ki ɗegee u virana 5.1-26
7. Li u vira wilira faɗ u Yesu Kristura 6.1-16
8. Daɓpa 6.17-18
Currently Selected:
GALATENA TAKKIRA: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.