KALKIRA 35

ASI MIN MBUTLUƁMA

Gaɗta kay buu ma vi Lonna

1Moiz tok suu Israelna ay egem halaŋ halaŋ dasi ana, «Gola ni boy ma Yawe dam kana, kay suuna li ka u boy namma. 2Hu buuna karkiya ni aŋ li sunda, na may buu ma kiɗisiyana ki magi ni a buu ma teteɗna, ni buu ma vi Lonna. Ni buu ma koɗ tara vi Yawe. Sa ma li sunda hu buu namma lina, cam kiyo.#Kal. 20.8-11; 23.12; 31.15; 34.21; Lev. 23.3; Gaɗ. 15.12-14 3Hu li ma agi cuki huna halaŋ sa ŋgal ku hu buu nammaɗi.»

Suu Israelna ɦal tlena a min li ma vi Bu Suunana

4Moiz di suu Israelna halaŋ halaŋ ana, «Gola ni boy ma Yawe damma,#Kal. 25.1-9 5Tlesuu agi fasina halaŋ ɦasi yasi ki maŋ Yawe. Suu may suu ɦal u hurusi ma jivina halaŋ mbaarasi ay maŋ Bu Suuna, lorra, doonora u kawi ma tlawna. 6Baraw ma tam tlaw tlawna, ma wili wilina, ma tlaw keŋ keŋŋa, u ma tlawam war warna u baraw dlemba, tlimiɗ ɦugunina may. 7Bak gamlagi suu coori tlawna, bak vabak ma duk mbonana, gu akasiyana may. 8Mbul ma vo hu pindilla, mbul ma hisna ma fuura, u mbul ma ɗus ndoosna. 9Ҥinira yaɗ ana beril, ɦinira taɗ ndalira asi kalaɗ eg efod u goo mbumbu ma gaɓam gudikŋa lay. 10Suu wi yalna dukugi halaŋŋi mbay a li sunda Yawe daɗta.#Kal. 39.32-43 11Li ma kakŋa vi Bu Suuna u mbutluɓma baraw ma baari kamma, tlesuu ɓal barawna gana, gu ma zirimma u zulumba kal guna hura, mbalam ma dukŋa u kawi ma colom sem kayamma, 12Zandukka u tokolo maɗta u va ma dugi funuɗna, baraw ma cak ii lina kina, 13tabulla u tokolo maɗta u tlesuu li sunda huna halaŋ u fu ma ɓivunna. 14Pindilla li kiɗikka u tlegeyeɗ suu sunda halaŋ u mbul ma vi kura. 15Givin ma togolla ma ŋgal mbul ma hisna u tokolo mamba halaŋ, mbul ma fuura, mbidla ŋgalla u baraw ma ki caki vun hu li ma kal ha kalafina. 16Givin ma togolla ma ŋgal ɓivun ma ŋgalam kina u kawi ma tlaw ma ki ŋguy kamma, tokolora tlaɗta u tlesuu li sunda huna halaŋ, tassa ma mbussa u va ma nam tini kamma. 17Liwra ŋguy kay mbutluɓmara u guuɗ ma njaarina halaŋ, kawi ma col guna kamma, baraw ma ki cagi vun grekŋana. 18Gu ma pii a vi mbutluɓma kolona, u gu ma pii a vi liwra kolona u zew ma njunusina halaŋ. 19Baraw ma li ɓivunna maŋ suu li sunda hu mbutluɓmana, baraw ma teteɗ ma vi mul ma li ɓivunna Aaronna u baraw ma goryom cukum tasi a li sunda li ɓivunnana.»

Suuna tok tlena aya

20Ŋgoo dagan suu Israelna tuɗ ki hu liisi halaŋ hin Moiz kiyo. 21Gegelay u min mamba u saa mamba ay hurumba mbaa tlena ay maŋ Yawe, kay a min mbutluɓmara kay sunda hura halaŋ kay baraw ma teteɗna lay. 22Suuna mbay ni njufiina lay, boyogina lay. Suu hurusi furina gegelay ni mbay u va ma nam fam ay komma. Boyogina paɗ tlesuu humusina u walakka kali kosira, lorra, kawi ma galaɗina, tlena zeɗ zeɗ asi ɦasi ay maŋ Yawe, ni ɓivun ma viriwra, tak tasi fok suuna ko suuna li a ɦal lorra na. 23Gegelay ma baraw ma tam tlaw tlawna u ma tlaw keŋ keŋŋa ka komma u baraw ma wili wilina u baraw dlemba, tlimiɗ ɦugunina, bak gamlagi suu coori tlawna, bak vabak ma lus duk mbona mbaaraɗ aya. 24Lini gegelay ma ɦal doonora ɗowba kawi ma tlawna ni ɦam ay ki maŋ Yawe. Suu may suu gu akasiyana ka varasina halaŋ ɦam ay a li sunda hu li namma. 25Boyogi suu yal suu paa barawra u kosina, ɦaɗ aya, baraw ma wili wilina u baraw ma tlaw keŋ keŋŋa, baraw ma tlawam war warna u baraw dlemba dereŋga. 26Boyogi suu yalna cil tlimiɗ ɦugunina ay may. 27Suu fok suunana mbaa ɦini mayra yaɗ ana Beril u ɦinira taɗ ndalira a kalaɗ hu efod u goo mbumbu ma gaɓi gudik mul ŋgol ma li ɓivunna u sem suu Israelna. 28Ko ndaɗta na lay mbidla u mbul ma vi kura hu pindilla u mbul ma fuura u mbul ma his jivi ma ŋgalam hu li ma ɓivunnana. 29Njufiina u boyogi suu hurusi ki mali taa tlesuu li sunda ayna suu Yawe ɓakaygi ay ki kasi fun Moizna agi suu Israelna halaŋ ɦasi aya.

Betsaleel u Oholiyab gijaŋ sunda

30Moiz di suu Israelna ana, «Gola Yawe yi Betsaleel ma goŋ Urina, goŋ Hurna hu njaf ma vi Yudana.#Kal. 31.1-11 31Nam oyom u Musuk Lonara a nam fi yalna, fi mbeleŋŋa, fi wira, wi yal ma li tlena halaŋŋa. 32Tin yal ma yoo tlena zeɗ zeɗ, yoo lorra, doonora, kawi ma tlawna. 33Ceɗ ɦinira taɗ ndalira, ceɗ tlena u gugunina li sunda yal ma daŋŋa zeɗ zeɗ. 34Nam ɦam yal ma haɗ suuna hurumu, ni ko huu Oholiyab ma goŋ Ahisamak ma hu njaf Danna na. 35Nam oyosi u yalna a li sunda ceɗ ɦinira, yoo tlena, ndal barawna zeɗ zeɗ, ma tlawna, ma tlaw keŋ keŋŋa u ma tlawam war warna, baraw dlemba suu wi yal cil tlena, yow suu li sunda zeɗ zeɗ u sunusiya.

Currently Selected:

KALKIRA 35: BMS

Highlight

Copy