KALKIRA 33
33
Lona ɦasi voɗta ana asi tuɗa
1Yawe di Moiz ana, «Aŋ u suuna halaŋ suu aŋ cukusi ay ki hu mbassa Egiptera hin li ma kogina, tuɗ hu ndaŋgara an vi vunun kaɗ a ɦaɗ maŋ Abraham, maŋ Isaak, maŋ Yakob dasi ana, An hin ɦaɗ ka ni maŋ goryogiya.#Ura 12.7; 26.3; 28.13 2An hin sun sa sunda huulona ha fokoŋu, An hin dik suu Kanaanna, suu Amoreenna, suu Hetna, suu Perizina, suu Hivna u suu Jebusna. 3Tuɗ hu mbas mayra law ki mbiira u mbul yumma, An ka ndak a tuɗ dukugiɗi kay agi ni suu yagi kaɗina, lini an tuɗ dukugiya ni daɓagi ha ki voɗo.» 4Suuna hum boy namma na ni mbuɗ tasi hahawra sa ka cuk baraw mam ma luuna tam oloɗi.
5Yawe di Moiz ana, «Di suu Israelna, agi ni suu yagi kaɗina, kak na njokŋi an tuɗ ha dukugiya, An hin daɓagi kiyo, cemi cukugi baraw magi ma luuna kolo na halaŋ, An hin wi dlara dagirara tuwa.» 6Suu Israelna fok baraw masi ma luuna ki halaŋ halaŋ, tuɗ irisi eg Ҥinira Horebba na.
Mbutluɓ ma ŋgaf tasi huna
7Moiz min mbutluɓma ha ki ŋgoo kaŋŋa na day, yam ana, li ma tokka. Sa ma min a hal Yawena kal ay ki hu kaŋŋa tuɗ ha ki eg mbutluɓ namma. 8Hu li ma Moiz kal ki a tuɗ hu mbutluɓ namma ni suuna halaŋ gegelay ni kal ay ki col ki fun ziim bunsu a gol Moiz ta ta hu li ma nam kal hu mbutluɓmana. 9Hu li ma Moiz kal hu mbutluɓmana ni ɗugulla col ay kolo na mba kuluɓ ki fun mbutluɓma, ɓak u Moiz. 10Suuna halaŋ wi ɗugulla ay ki kuluɓi fun mbutluɓma. Suuna halaŋ yow koloo, gegelay ni goɓ ga fun ziim a cenda. 11Yawe ɓak ki u Moiz ko ndal sana ɓak fun tam u ndarammara na. Moiz hoŋ ay hu kaŋŋa, may goozoŋ mamma njun umma, Josuwe ma goŋ Nunna, hin ha hu zira tokka gaw.
Bu Suuna ɓak tam u Moiz
12Moiz di Yawe ana, «Gola aŋ dan u vun taŋga ana, cuk suuna kiyo, may aŋ takan sa ma aŋ hin sunum u anna kaɗi, doli ɗini aŋŋi sa ma di ana, An waŋ ki ni u seŋ halaŋ, olo ana, Aŋ fi jivira irin wa.» 13Cemini lini an fi jivira iriŋ wa ni, aŋ takan voɗ maŋga ni an hin waŋ kiyo. Lini an fi gasi jivira iriŋ wa olo ni, aŋ gol suu asina ni ko suu maŋsina na. 14Yawe di ana, «An tuɗ ha uŋŋi u tanda a ɦaŋ koɗ tara.» 15Moiz hoŋom dira ana, «Lini aŋ ka tuɗ umi u taŋgaɗi ni hinimi a jok umi ki hu li ma daŋgi. 16Ni sana hin wi ni u me ana an u suu maŋsina fi jivira iriŋ wa nige? Lini aŋ ka dukumiya ni, an u suu maŋsina hin wi ki ana ami ki ni zeɗ u suu daŋŋa naɗi su?» 17Yawe di Moiz ana, «Boy ma aŋ dam wanna an hin li ni na may, kay aŋ fi jivira irin wa, an waŋ ki ni u seŋ halaŋ.»
18Moiz joɓ ana, «Takan bibiŋil maŋga ay gige.» 19Yawe hoŋom dira ana, «An hin li jivi manda kaŋ halaŋ, an hin njaɗ sem Yawe ha ki fokoŋu. An li jivi manda ni kay gegelay ma an minna. An li oora kay gegelay ma an min a lam oorana.»#Rom. 9.15 20Nam hin dam hu olo ana, «Aŋ ka ndak a wan vogonɗi, kay sa war ma wan u irimma ka kak iiri oloɗi.» 21Yawe dam ana, «Aŋ gola ni li ma tok egenna. Aŋ col kolo kay ɦinira. 22Hu li ma bibiŋil manda a jakka ni an hin kalaŋ ki hu zul goyra. An hin baa kon ki kaŋ hu li ma an hin jakŋa. 23An hin baa kon ki na ni aŋ hin wan ŋgoronu kay sa warna ka ndak a wan irinɗi.»
Currently Selected:
KALKIRA 33: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
