KALKIRA 26

Li ma teteɗ ma Lona kak huna

1Aŋ min mbutluɓma u baraw ma doɓorokŋa irim zeɗ zeɗ doogo. Suu yalna cil baraw namma u baraw dlemba ni tam ndali zeɗ zeɗ ma tam tlawna u ma wili wilina u ma tlaw keŋ keŋŋa may. Aŋ mba min Serubim hu may. 2Fiyek baraw ma dewna ni meter doogo yam fiɗi, hayammi meter mba' may, lam fiyekem halaŋ fun tam dew. 3Baraw maa vadl taɓam kel tamu, ma vadl hiŋŋa kel tam may. 4Aŋ dam vun baraw ma ki fun keɓereɗna ki u baraw ma wili wilina, dam vun ma daɓ ha ki daganna ki na may. 5Baraw ma fun keɓereɗna aŋ cil zewna funum na dok-vadl, cil fun ma mbana na dok-vadl may, zew ma fun namma lini fun tam dew. 6Aŋ dli va ma ɓal barawna kolo fun tamma na dok-vadl ni u lorra. Aŋ jak vun barawna fun tam u lorra aŋ dlaɗ ndaɗta kay a li namma li ni a mbutluɓma dewna.

Baraw ma baari kolo kay mbutluɓmana

7Ŋgoo dagan aŋ cil barawna u tlimiɗ ɦugunina, a baram ay kolo kay mbutluɓma. Aŋ cilim na zeɗ zeɗ doogo yam dew. 8Fiyek baraw namma ni meter doogo yam vadl, hayammi meter mba' may cil baraw namma halaŋ fun tam dew. 9Aŋ taɓ baraw maa vadl kel tamu, taɓ maa karkiya kel tam may. Aŋ boɗ baraw ma karkiyana vok mbutluɓma. 10Aŋ dam vun baraw ma fok jewna ki u zewna dok-vadl, ma a mbarana aŋ damam vunum ki u zewna dok-vadl may. 11Aŋ dli va ma ɓal barawna kolo fun tamma na dok-vadl u walakka. Aŋ taɓ vun barawna fun tam dew a nam mba li ni ko tam dew. 12Vun baraw ma kolo kayamma mba su kiyo, vunumba su ki ndaɗta mba cuk ha ki ŋgoo mbutluɓma dagani. 13Hu fiyek mbutluɓma na ni barawna jak ki meter dew, vunumba jak ki ndaɗta baa ha ki keŋ mbutluɓma. 14A baa yam mbutluɓ ma mbana ni aŋ ɗee ni bak gamlagina coorosi ki tlawi hin baa bak vabak ma lus duk mbona ha kolo kayam olo.

Gu ma min mbutluɓma u namma

15Aŋ min u mbutluɓma ta kaŋgara ni u gu akasiyana, pam kolo u sem ɗegee. 16Fiyek guna li meter vadl, bebeɗemmi nus meter dew may. 17Va ma njunum kolo eg tamma li eg gu ma dewna mba' mba' aŋ li gu namma halaŋŋi ko ndaɗta na. 18Aŋ ceɗ gu ma daŋŋa na dok-mba' pam ay hu keŋ ma dalina na. 19Yoo va ma njaa guna kolo kamma u doonora, yoorom na dok-fiɗi. Gu ma dewna u kawi namma um mba' mba' kay a taɓam eg tamba ma hiŋŋa mamma ha ummi na lay. 20Hu keŋ ma mbayawna na ni guna hu ni dok-mba' may. 21U doonora yoori u sesira ni dok-fiɗi may. Gu ma dewna u doono mamba um mba' mba' kay a taɓam eg tamba ma hiŋŋa mamma ha ummi na lay. 22Hu hurumba daɓ ha ki daganda u fiɗigina na ni aŋ li guna hu karkiya. 23Aŋ li gu ma daŋŋa ay kurufu hu mba' a vi mbutluɓma kolo eŋga may. 24Gu ma mba' namma umba gara ha ki ɓorowi zeɗ zeɗ yam tuɗ taɓ ha ki kolo ko tam dew. Gu ma mba' namma fiyekem fun tammi dew, nam hu ni a vi gu ma daŋŋa kolo eŋga. 25Gu ma daŋŋa kalavandi ay ŋgoo dagan u doonora yoori a njaram kayamba doogo yam karkiya may. Guna dew ni doonora u mba' mba'.

26Aŋ ka tokolo gu akasiyana na vadl kay keŋ ma jewna, 27vadl kay keŋ ma mbana may, vadl kay keŋ ma ki u fiɗiginana may. 28Tokolora duk gayra kalaɗ ni hin vun guna ki kolo fiyek nde nde. Kalaɗ ha keŋ hiŋŋa ta ta tuɗ laɗ ha ki keŋ hiŋŋa may. 29Guna aŋ lam tam ki u lorra, li zul li ma kal tokolora huna ki u lorra may, li ta tokolora ki u lorra lay. 30Aŋ min mbutluɓma ni ko ndal an takaŋŋa ay kolo kay ɦinirara na.

31Aŋ cil baraw ma cak duk lina u baraw dlemba, tam ndali tlatlaw may, wili wili may, ma tlaw keŋ keŋŋa may u ma tlawam war warna may. Cil sa sunda huulona Serubim egem may. 32Aŋ gaɓam kolo ni u guna fiɗi ni gu akasiyana, hoorom tam ki u lorra, va ma ɓalam kolo u namma yoo ni lorra lay. Col sem guna ni kolo kay doonora may. 33Aŋ cak baraw namma kurufu hu mbutluɓma, ha ŋgoo barawna dagan aŋ tin Zandukka Galamba ha huwa. Baraw ma caki namma ɓorow ii Li ma Teteɗna ki u Li ma ki Saɓaki Teteɗna.#Heb. 6.19; 9.3-5 34Aŋ dug vun Zanduk mayra Galamba u Lonara ta tini hu Li ma ki Saɓaki Teteɗna kiyo. 35Aŋ tin tabulla fok barawna na gay, tin pindilla fok tabulla keŋ bik dali na, tin tabulla mbayaw na may.

36Aŋ cil baraw ma daŋŋa a baa vun mbutluɓma kira may. Baraw namma cilim u baraw dlemba, ndali wili wili may, tlaw may, ma tlaw keŋ keŋŋa may. 37Kay baraw namma aŋ ka tokolo akasiyana vadl, hooroɗ taɗ ki u lorra, va ma ɓalam kolo u namma ni lorra lay. Aŋ yoo kawi ma tlawna a tinim sem kayamba may.

Currently Selected:

KALKIRA 26: BMS

Highlight

Copy