KALKIRA 18
18
Moiz ŋgaf u kunumma, Jetro
1Jetro, mul ma li ɓivunna vi suu Madiyanna, kunuŋ Moizna, hum dlara Lona laɗ u Moiz u suu Israelna suu mamsinara halaŋ, Yawe cukusi ay ki hu mbassa Egiptera. 2Jetro, kunuŋ Moizna, tay Sifora, caŋ Moizza, ni dagan li ma nam tiniɗ ay kina,#Kal. 2.21-22 3u goryom suu mbana may. Ma wanna sem ana, Guerkommi ana ma tuɗ kolona. Moiz di ana, «An mbuɗ kini sa ma tuɗ ki kolo hu mbassa daŋgana.»#Sun. 7.29 4Ma mbana sem ana Eliyezer, ni ana, «Loonna njununu, kay ana Lo ma vi bunna mba njununni namu, nam suɗun ay ki ko ŋgew ma vi Farawna.» 5Jetro ma kunuŋ Moizna, goryom u caamba tuɗ eg Moiz ŋgoo bagi hu fulla asi cuki eg Ҥinira vi Lonara. 6Nam sun ha di Moiz ana, «Ni an Jetro, kunuŋŋa, an min tuɗ ha egeŋ u caaŋga u goryoŋ lay.» 7Moiz kal ay ki mba ŋgaf vok kunumma, nam goɓ gaa mboɗomu, furi tasiya, gi deɓpa tasi si si may, tuɗ cuk hu mbutluɓma.
8Moiz cuɗ dlara Yawe laɗ eg Faraw u suu Egiptena kay suu Israelnara maŋ kunumma u loɓ ma fasi ay hu voɗtana halaŋ Yawe suɗusi ay kiyo. 9Jetro furi coco kay dla mayra Yawe laɗ kay suu Israelnara, hu li ma nam buɗusi ay ki ko suu Egiptena. 10Jetro di ana, «Gi deɓ Yawe ma buɗugi ay ki ko suu Egiptena ay ki ko Faraw tamba lay, buɗ suuna halaŋ ay ki ko suu Egiptena. 11An wi ki gasi ana Yawe nam ŋgol su loogina hu njafasi lay halaŋ.» 12Jetro, ma kunuŋ Moizna, li ɓivun ma ŋgalam kina, u ɓivun ma daŋŋa maŋ Lona. Aaron u suu ŋgolo suu Israelna halaŋ mba ti fu namma fok Lona u kunuŋ Moizna.
Moiz tin muli suu kaɓakŋa
13Vin maɗiira ni Moiz kak a kaɓakŋa maŋ suu Israelna, suuna laki fok Moiz maɗii day ta ta tew fiɗigiya. 14Kunuŋ Moizna wi dlara nam laɗta na ni, dam ana, «Aŋ li u suuna na ni dla mege? Aŋ kak ki u taŋga na dew suuna coli fokoŋ ta ta fiɗigiya ni nanage?» 15Moiz di kunumma ana, «Suuna mba egenni a joɓmi Lona. 16Lini dla ay kosiya ni asi mbay egen an hin gasi ii dla ndaɗta ki may. An takasi gaɗta vi Lonara may.» 17Kunuŋ Moizna dam ana, «Dlara aŋ laɗ wanda ni ka jiviɗi. 18Aŋ hin ci taŋ kini ɦawaa, suu moli fok cana lay, sunda kal ki coco kaŋu, ni ka sunda aŋ a laɗ kay taŋ dewɗi. 19Aŋ humun vunun haa, an min takaŋ nera, ko Lona li u aŋ may. Aŋ lini a sa ma tak suu Israelna maŋ Lonana. Aŋŋi a sa ma tuɗ dlara fok Lonana. 20Aŋ ɓalasi gaɗta ki koloo, ndaɗ hin takasi voɗta u poyra jivira may. 21Duk suuna ni aŋ man suu ndaki suu li ndaa Lona, suu dlasi jivi ii suunana, suu ka ɓeŋ dla kiɗina. Aŋ tinisi fok suuna a mulina fok suu buɓma, fok suu kisna, fok suu dok-vadlna may, fok suu doogona may. 22Suu asina ni suu ka ii ɓakŋa maŋ suuna tew tewna. Dlara kal ki ŋgolla asi hin mbaaraŋga ay fokoŋ may. Ta gorira ni asi gaɗ iriɗ ha dukusiya. Feɗ nek ndaɗta ki kaŋ ɦiw, asi ndak zii nekka u aŋ may. 23Lini aŋ li na ni Lona ndak ɦaŋ gaɗ mamba aya, aŋ ndak a li jivi lay, ni suuna ndak a hoŋ vo hu ziisi u heɓpa lay.» 24Moiz hum vun kunumma, li ko nam damba na may. 25Duk suu Israelna halaŋ Moiz man suu ndakina tinisi fok suuna a mulina, suu buɓmi tin sa fokosiya, suuna kis ni tin sa fokosiya, suuna dok-vadl ni tin sa fokosiya, suuna doogo ni tin sa fokosiya. 26Suu asina ni suu kaɓakŋa maŋ suunana. Dlara su kasira asi tuɗuɗ fok Moiz may. Dlara gorira halaŋŋi asi gaɗ iriɗ vo dukusiya.
27Moiz tin kunumma nam hoŋ vo hu mbas mamba.
Currently Selected:
KALKIRA 18: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
